¹ Paulo, omurumwa waYeso Kirisito khulwo khwenya khwa Nasaye; khu batakatifu abali Ebuefeso, nende khu bala abasubira mu Kirisito Yeso: ² obukoosia bube khweng'we nende omuleembe, khurula khu Nasaye wefwe, nende khurula khu Mwami Yeso Kirisito. ³ Afumisibwe Nasaye Khandi Samwana Omwami wefwe Yeso Kirisito, owaruberesia chikhabi chioosi echio mumwoyo musialo sia Roho mu Kirisito. ⁴ Okhuba olwayarulobola muniye omuse kwesialo nikusiarebwao, mbwe khube abatakatifu, Khandi ababula esiuku imberi waye mubukheeri: ⁵ Okhuba yarangirira okhurulobola narukabula okhuba abaana baye khulwa Yeso Kirisito, okhulondana nende obulayi bwokhulioyerwa khulwelienya liaye. ⁶ Khulwe yifuma yoluyaali lwobukoosia bwaye, owamunibwo yarukhola okhufukirirwa mu ula owayekheera. ⁷ Owa muniye khunyoola obununulwi okhubirira mumabaanga Kaye, obulekherwi bwebionono, okhulondana nende obuyiinda bwobukoosia bwaye. ⁸ Owomunibwo yarwichusiamo obukesi bwoosi nende oburekerefu; ⁹ Namalire okhurumanyisia amakhuwa kekisa akelienya liaye, khulondana nende obulayi bwobulioyefwe bwaye obwayali niyekesie muniye: ¹⁰ mbwe mumadaara kebikha biolerefu anyale okhubuusia alala ebiindu bioosi mu Kirisito,ebili mwikulu nende ebili khusialo, Kata muniye: ¹¹ Owa muniye khandi khwanyoola obulaame, olwa khwali khulondana nende elichoomo liaye okholaanga ebiindu bioosi khulondana nende elikerako lielienya liaye omwene: ¹² mbwe khunyale okhuba khulwe yifuma yoluyaali lwaye, abarangirira okhwesika kirisito. ¹³ Owa muniye engwe mwesi mwesika olwamwali nimubuliire elikhuwa liobwadieri, ifanjili yobuonia bweng'we: eya muniyo mwesi olwamwasubira, mwabalikhwa nende Roho mulafu owakhwasubisibwa, ¹⁴ oli omusingo kwobulaame bwefwe, khulwo khurera obununuli bwemiandu kiaye, okhuba ifuma yoluyaali lwaye. ¹⁵ Khulwa kene ako, esie siesi Kori ngolwa ndabulira khulondana nende obusubiri bweng'we mumwami Yeso, nende obukheeri khu batakatifu boosi, ¹⁶ siri okhwakama okhukhuba orio khulweng'we, nimbarumbula mumalaamo kange; ¹⁷ mbwe Nasaye wo Mwami wefwe Yeso Kirisito, Samwana woluyaali, anyale okhubaberesia Roho wobukesi nende obufwimbuli mubumanyirisi bwaye: ¹⁸ echimoni chieng'we chiobumanyirisi chirebwemo obulafu; mbwe munyale okhumanya elinaaya liokhulangwa khweng'we, nende akobuyiinda bwoluyaali lwobulaame bwaye mubatakatifu, ¹⁹ nende obulayi bwobukhoongo bwobunyala khwefwe abasubira khulondana nende ikhola yamaani kobunyala bwaye; ²⁰ akayakhola mukirisito, olwayamulamusia okhurula mubafu, namwikhasia khumukhono kwaye mulungi mwikulu; ²¹ akulu okhira oburuki bwoosi, nende obunyala, nende amaani, nende obwami, nende buli liira mbwe elirumbulwa sinimusialo muno mwongene, arali kata nende musialo esichia okhwicha; ²² nara ebiindu bioosi asi wamakulu Kaye, khandi namuberesia okhuba omurwe khubiindu bioosi khulikanisa; ²³ eliri omubiri kwaye, obwolerefu bwaye owichusianga bioosi mubioosi.