¹ Eng'we abaana, murie abebusi beng'we mumwami, khulwa khubo ekene kano niko akakhoyera. ² Ria soo nende mao; elilako lino nilio elilako liamberi eliri nende elilakano, ³ mbwe onyoole echikhabi, Mani omenye echinyaanga chinyingi musialo. ⁴ Nang'we eng'we abasamwana, murarangananga abaana beng'we; arali mubakhusie mubiima bilayi nende khubakeraka mumwami. ⁵ Eng'we abakholi bemirimo, murie abami beng'we mungeri yomubiri, murie nende khurengerekha, mubukololofu bwomwoyo, kori nga okhuria Kirisito; ⁶ ne muraria sa khubukholi bwokhulolekhana kori ngolwa belioyanga khu baandu, arali kori nga abakholi ba Kirisito, nimukhola kala akakheresia Nasaye mumwoyo; ⁷ mulichoomo lilayi kori nga khukholera Nasaye ne khasi nikhukholera omuundu khaba; ⁸ nimumanyirisia mbwe buli likhuwe lilayi eliomuundu akholanga, Omwami achia khumuberesia eliene elio, kata nali omukholi kose mulekhule. ⁹ Nang'we eng'we abami, mwesi mubakholere akene ako, mulekhe okhubarisia,nimumanyirisia mbwe Owami bwabwe ninang'we ali mwikulu, naye abula injaulo. ¹⁰ Olunyuma, muchiririre okhuba nende ichwoni mumwami nende mubunyala bwamaani Kaye. ¹¹ Mwefwale ebilwaniro bia Nasaye bioosi, munyale okhwikalira obubacha bwa Sietani. ¹² Khulwo khuba okhulwana khwefwe khasi nikhwamabaanga nende mubiri khaba; arali ni khuburuki nende obunyala, nende khubakhoongo besirima siliwo sino, khubeliiyie bebikhieno bimaanu musialo sia roho. ¹³ Khulwe sifune esio, mwefwale ebilwaniro bia Nasaye bioosi, munyale khudinya inyaanga yobubi,ne nimumala okhusirisia koosi, mweme sirungi. ¹⁴ Bulano mweme, nimweboyere obwadieri mubibuno bieng'we, nende okhwefwala esireega siobulungifu khu sirifu, ¹⁵ nako amakulu kabe amarekekhe khulwe ifanjili yomuleembe; ¹⁶ ne okhira koosi mubukule ingabo yobusubiri, eyamunanyala khusimisiria obuyiingo bwo muliro bwoosi obwo mumaanu ula. ¹⁷ Khandi mubukule ikofia yobuonia nende olugaanga lwa Roho oluli elikhuwa lia Nasaye; ¹⁸ mumalaamo koosi nende khusaba buli bikha muroho, nimuba meeso mulikhuwa elio, nende khuchiririra khulaamira abatakatifi boosi; ¹⁹ nende esie siesi, mbwe mberesibwe likhuwa eliokhufunula omunwa kwange, mani nyoole okhuyaala eliobwekisi lie ifanjili yila nende ichwoni; ²⁰ eyikera esie ndaba omurume oweminyororo; khandi nyoole ichwoni yokhulomaloma kori ngolwa bikhoyera khulomaloma muniye. ²¹ Khulwesio, eng'we mwesi munyoole khumanya amakhuwa kange, ngolwa kafwana, naye Tikiko, omusiani wefwe khandi omukholi mwesikwa mumwami, achia khubeekesia amakhuwa koosi; ²² owanduma mbwe yeeche abekesie amakhuwa ako mbwe munyoole khumanya kori ngolwa khuli, naye achia khubalemia emioyo. ²³ Omulembe kube khubakheerwa, nende obukheeri, alala nende obusuubiri oburula khu Nasaye Sefwe nende Omwami Yeso Kirisito. ²⁴ Obukoosia bube nende boosi abakheera Omwami wefwe Yeso Kirisito mubukheeri oburanyasikha.