¹ Bulano khubasaba abakheerwa , mbwe okhulondana nende okhwicha khwo Mwami wefwe Yeso Kirisito, nende okhwebusia khwefwe khuniye, ² mbwe murabeyabeya kose khukanakana mulwangu, khulwe irokho, kose likhuwa, kose ibarwa eyifwana kori eyirula khwefwe, obeera ori inyaanga yo Mwami yamala okhuula. ³ Omuundu yeesi yeesi areecha ya mubacha mungeri yosi yosi, khulwo khubeera inyaanga eyo khasi yakheche, okhuula kori nga khwakhabe nende obukhayi mani omuundu ula owe imbi yakhafunulwe, omwana wo khusasia. ⁴ Uno niye okhayaanga nende okhwekingula omwene akulu wa buli siindu siosi esilangwa mbwe Nasaye, kose sila esinamirwa. He khulwa kene ako, yekhale mukhekalu lia Nasaye, niyelolesia omwene kori Nasaye. ⁵ Khasi mwichulisia mbwe kori olwa ndali nisiri nang'we, ndababolera amakhuwa kano?. ⁶ Bulano mumanyire esiamukaira, mbwe anyoole okhufunulwa sa mubikha bikhoyera. ⁷ Khulwo khubeera amebiso ko bukhayi kali okhukhola emirimo; arali aliwo owamwikalira ebikha bino, okhuula kori yakharusibweyo khungira. ⁸ Ne olunyuma omukhayi oyo yakhafunulwe, owo Mwami Yeso yakhere nende emiuya kio omunwa kwaye, nende okhumusasia mukhufunulwa khwokhwicha khwaye. ⁹ Okhwicha khwomukhayi khufwanana nende ikhola ya sietani mubunyala bwoosi, nende bilolero, nende amangalima kobubacha, ¹⁰ alala nende buli mabi akabachaanga abo abasasikha; khulwo khubeera khaya okhukheera obwadieri, mani banyoole okhuonisibwa. ¹¹ Khuwe sifne sino, Nasaye abarumira obukoyaani bwa maani, mbwe banyoole okhusubira obubacha; ¹² mbwe bala boosi abarasubira obwadieri, arali babukula isangaalo mumabi banyoole okhukhalakirwa. ¹³ Arali khukhoyere okhubira Nasaye orio buli lwoosi khulweng'we, abakherwa, abakheerwa nende Omwami , khulwo khubeera Nasaye yabalobola kori nga ebiamo biamberi mbwe munyoole okhuonisibwa okhubirira okhulabisibwa murokho, nende okhusubira mubwadieri; ¹⁴ Yabalanga khulwa kene kano khubirira muifanjili yefwe, mbwe munyoole oluyaali lwo Mwami wefwe Yeso Kirisito. ¹⁵ Bulano, abakheerwa, mweme sirungi, mani mudiire mwomisie emilukha ekiamwekesebwa, kata nikali mbwe nikhubirira mu likhuwa kose mubarwa yefwe. ¹⁶ Bulano Omwami wefwe Yeso Kirisito omwene nende Nasaye Sefwe, owarukheera, khandi yaruberesia okhudinyisibwa khwe chinyaanga chioosi nende linaya lilayi khubirira mubukoosia, ¹⁷ adinyisie nende akhuru amaani mumioyo kiengwe mu buli mulimo mulayi nende likhuwa.