¹ Paulo, Silvanas nende Timotheo khu likanisa lia Tesolonike mu Nasaye Baba nende Omwami Yeso Krisito. ² Obukosia nende muleembe khurula khu Nasaye Sefwe nende Omwami Yeso Krisito. ³ Abakheerwa, khukhoyere okhwebasia Nasaye buli lwoosi khulweng'we, ngolwa kakhoyera, khulwo khubeera obusubiri bweng'we buli okhukhula lukali muno, khandi obusuubiri bweng'we khu buli mulala bwemedere. ⁴ Khukario efwe abene khubefumisirianga mumakanisa ka Nasaye khulwo bwesimirisi bweng'we nende obusubiri mukhusandisibwa khwengwe khwoosi, nende mumanyakhano akamuli khwesimirisiria. ⁵ Sino nisio esiekesia obukhalaki bukololofu obwa Nasaye, mbwe munyoole okhubalirwa abakhoyera mubwami bwa Nasaye, obukera musandisibwe. ⁶ Khulwo khuba nobwadieri mbwe, nobulungikhi imberi wa Nasaye okhurunga amanyakhano khu bala ababanyasia, ⁷ nende okhubaruunga eng'we abasandisibwa mbwe, mubulukhe ninafwe, olwa Omwami Yeso achia okhufunulibwa okhurula mwikulu nende aba amalaika baye abamaani, ⁸ mumuliro kwe chinjeserie, naruunga abo abaramanyire Nasaye, nende abo abararia ifanjili yo Mwami wefwe Yeso Krisito. ⁹ Bachia okhunyoola esinyasio siobusasikhi oburalibwayo okhurula imberi wo Mwami, nende okhurula khu luyaali lwobunyali bwaye. ¹⁰ Achia khukhola akene kano olwa achia okhwicha iyaanga eyo okhunyoola oluyaali mubatakatifu baye, nende okhuukisibwa mu bala boosi abasubira, khulwo khubeera obuloli bwefwe khweng'we bwasubirwa. ¹¹ Ne khulwe sifune sino,efwe fwesi khubalaamiraanga buli lwoosi, mbwe Nasaye wefwe anyoole khubabala okhuba abakhoyera omulaango kwengwe, ne anyoole okhusirisia buli lichoomo lilayi khu maani Kaye, nende buli mulimo kwobusuubiri. ¹² khusaba kano mbwe eliira lio Mwami wefwe Yeso Kirisito linyoole oluyaali mweng'we, nang'we muniye, okhulondana nende obukoosia bwa Nasaye wefwe nende Omwami Yeso Krisito.