¹ Bulano, abakheerwa, murusabire, mbwe elikhuwa lio Mwami lichiririre, khandi liberesibwe oluyaali, kori olwa liri ninang'we, ² Khandi mbwe khunyoole okhununulwa okhurula mumabi nende abaandu bamaanu; khulwo khubeera khasi ni abandu boosi abali nende busuubiri. ³ Arali omwami nomwesikwa, ochia okhubaraamo amaani , nende okhubaliinda khurulana nende owamabi. ⁴ Khuli nende ichuoni mu Mwami okhulondana ninangwe, mbwe mwesi mukhole khandi muchia khuchiririra okhukhola ebiindu bia khubalagira. ⁵ Omwami yemirire emioyo kieng'we mu bukheeri bwa Nasaye, nende mukhwesimirisia khwa kirisito. ⁶ Bulano khubalagira, abakheerwa, muliira lio Mwami wefwe Yeso krisito, mbwe mwerusie khu khubuli mukheerwa orakhola esiindu siosi, nende okhuramenya khulondana nende emumilukha kiamwanyola khurula khwefwe. ⁷ Khulwo Khubeera eng'we bene mumanyire nga olwa mukhoyere okhurulonda; khulwo khuba efwe bene khasi khwali abaandu bo khwikhala sa ngolwa khwali ninang'we. ⁸ Khasi khwaliakho omugaati kwo muundu yeesi ebikhaya, arali khwakhola emirimo siro sideere mubudinyu nende okhunyakhana,mbwe khuruba omukuku khu mulala khweng'we. ⁹ Khasi khwakhola khurio mbwe khulwo khuba khwabula obunyala, arali khwakhola khurio mbwe khube esilolero khweng'we, mbwe munyoole okhuruloonda. ¹⁰ Khulwo khuba kori nga khwali ninang'we, khwabalagira mbwe, "omuundu ula oradakha okhukhola emirimo, aralia dawe." ¹¹ Khulwo khubeera khubuliire mbwe baliwo abandi akari weng'we abekhalao sa, sibakholangakho emirimo khaba, arali bakendaananga sa nende amakhuwa ka bandu bandi. ¹² Bulano abaandu bali nende ebiima ebio, khubalagira nende obakeraka mu Mwami Yeso Kirisito, mbwe bakhole mirimo nibabulerere, khandi balie omugaati kwabwe bene. ¹³ Arali eng'we abakherwa, murajoonga okhukhola ebikhole bilayi. ¹⁴ Naye nikali mbwe omuundu yeesi yeesi khasi aria elikhuwa liefwe mu ibarua yino, mumanyirisie omuundu oyo, khandi muraambanakho ninaye, mbwe anyoole okhudiirwa nende chisoni. ¹⁵ Kata kario muramubala kori omusuku, arali mumulabule kori omukheerwa. ¹⁶ Bulano Omwami wo muleembe omwene ababeresie omuleembe buli lwoosi mu ngeri chioosi. Omwami abe ninang'we mweesi. ¹⁷ Esie, Paulo, nyandiika kano nende omukhono kwange mwene, ne sino nisio esmanyiro mubuli ibarwa ya nyandiika; Niye obwandike bwange. ¹⁸ Obukosia bwo Mwami wefwe Yeso Krisito bube nang'we mwesi . kabe kario.