¹ Nebo let anyun, che kitupche, kesomok mising' ak kiteiywok eng' Kiptaiyat Jeiso, ko u ye kiotach eng' ache ole kanyol obeetite, ak obaibaite Jehovah mbo ko u ye obendoti si kobiit obaraitu mising'. ² Amu onget ng'atutik che kigigonook ache eng' Kiptaiyat Jeiso. ³ Amu nito magetab Jehovah, noto katabaaneng'wong', si kobiit oistoegee sokset. ⁴ Si kobit konai chi tugul eng' akwe komuch koribge, korib bortanyi eng' tililindo ak teegisto, ⁵ Ma eng' ng'etkong', (mbo ko u Bororiosiek che meenget Jehovah). ⁶ Ama tayai chi kachililut nda koyachi ne ya tupchenyi eng' ng'olyondonito. Amu Kiptaiyat yaktaindetab mugetut eng' tuguchuto tugul, ko u ye kisib kiteiywok ak kebaorian. ⁷ Amu kimagurcheech Jehovah simdo ago tililindo. ⁸ Inendet ne tae ko ma tae chi, ago tae Jehovah, ne konok Tamirmiriet ne tiliil. ⁹ Ago ma nyolu kesirwak agobo chamnyetab tupchosiek, amu onetotin akwe eng' Jehovah si ochamnye. ¹⁰ Amu oyae kunoto iman oyachini tupchosiek che mito Makedonia komugul. Ago kiteiywok tupchosiechu, kele obaraitu kosiir. ¹¹ Ak onetgee otebi eng' mutyonet, ak oyai boisionikwok, ak oboisiee eunekwok ko u yo kiging'atak. ¹² Si obendate eng' oret ne nyolu eng' taitab icheget che mi sang' si mo banan kiy age tugul. ¹³ Magimache anyun tupchosiekcho oegu che matinye naet agobo icheget che ruisot, kele amoarogense ko u biko alak che matinye kamang'unet. ¹⁴ Amu nge yani kele, kime Jeiso ak kong'eet kogeny, ko u noto anyun eng' icheget che ruisot eng Jeiso, imutu Jehovah koboto inendet. ¹⁵ Amu kimwowok ni eng' ng'olyotab Kiptaiyat kele, ache che kisapsoti che king'etunotin, ko magoi kindoe icheget che kigoruiyo. ¹⁶ Amu choruge Kiptaiyat inendet eng' Kipsengwet, koboto twegunet ne o, ak kutitab Malaikayat ne o, ak iriagetab Jehovah, ak sib kong'etsot che kibek eng' Kristo: ¹⁷ Ak ache anyun che kisapsoti, che king'etunotin, keganabech koboto iche eng' bolik, ketuiye ak Kiptaiyat eng' barak. Ak ketebi anyun koboto Kiptaiyat koigeny. ¹⁸ Noto anyun ogaigaige akwege eng' ng'alechito.