¹ Ago mami amune anyun, che kitupche, kesirwak agobo betusiek ak kenyisiek. ² Amu ongen komie akweget ole choni betutab Kiptaiyat ku chorin ne choni kemoi, ³ Ngo mwoe iche kolen, "kalyet ak chametabge, "koityi anyun iche ng'emisiet, ku yo ityini ng'wonindo kwondo ne mache kosigis, ago magoi chililyo. ⁴ Ago akwe, tupchosiechu, ko mami eng' tuindo got kochonjok betunoto ko u chorin. ⁵ Amu akwe tugul oi werikab lapkeiyet, ak werikab bet. Ma ki bo kemoi, nda ko tuindo. ⁶ Ara anyun, matokany keruiye ko u yo ruisot biko alak, ago ongeripse ak keegu che ribege. ⁷ Amu icheget che ruisot ko ruisot kemoi, ak icheget che bogitsot ko bogitsot kemoi. ⁸ Ago ongeegu che kiribege, ache che kibo bet, kilaachi karnetab teget ne bo kayanet ak chamnyet; ak kutwet, noto ko kamang'unet ne bo yetunet. ⁹ Amu kimalewenjech Jehovah nereknatet, ago nyorunetab yetunet eng' Kiptaiyandenyo Jeiso Kristo, ¹⁰ Ne kimecheech si, ngegosuu nda ko ngeruisoti, kesopsoti koboto inendet. ¹¹ Noto anyun ogaigaige akwege eng' akwege, otechge akwege eng' akwege, mbo ko u yo oyae ak akwe. ¹² Ago kisomok, che kitupche, kele onai icheget che tinye boisiet ne o eng' kwenung'wong', ak che boiywok ak ko tigonok eng' Kiptaiyat. ¹³ Ak ogonyit icheget mising' eng' chamnyet agobo boisieng'wai. Otebi eng' kalyet akwege eng' akwege. ¹⁴ Ak ketigonok akwe che kitupche: Kele oteechi che maribege che kiging'at, ochar che nyogoren, otoret che nyolulyotin, ak oegu che tinye muitaet ak biko tugul. ¹⁵ Ogeer si meyaakchi chi chito age tugul yaitio eng' yaitio. Ago orub noto kararan kotugul, chi age eng' age, ak eng' biko tugul. ¹⁶ Oboiboitu eng' betusiek tugul. ¹⁷ Osae kotugul. ¹⁸ Omwoe kongoi eng' tuguk tugul. Amu nito magetab Jehovah eng' Jeiso eng' akwe. ¹⁹ Amogirinde Tamimiriet. ²⁰ Amosas maonatosiek. ²¹ Otiem tuguk tugul. Onan mising' noto mie. ²² Oistoege kiy age tugul ne ya. ²³ Ak ngo tabanaak eng' katabaanet ne nyitat Jehovah ne bo kalyet. Ak ngoribogis komie tamirmiriikwok ak sobonwekwok ak borwekwok, ko motinye kiy ne kimuchi kiruokunenok eng' nyonunetab Kiptaiyandenyo Jeiso Kristo. ²⁴ Inendet ne kuurok ko inendet ne kiyoni, ne yae noto agine kosulda. ²⁵ Che kitupche, osaiywech. ²⁶ Ogat tupchosiek tugul eng' ng'ututet ne tilil. ²⁷ Ang'atok eng' Kiptaiyat ale ngesoman baruani tupchosiek tugul. ²⁸ Ngotebi mieindab Kiptaiyandenyo Jeiso Kristo kobotok.