¹ Noto anyun, yo kingo matagemuch kemuite, kebwat kele mie kebagaktech achege eng' Atene. ² Kigiyogu Timoteo, tupchenyo ak ko kiboitiotab Jehovah eng' logoiywek che kororon che bo Kristo kogimitok, ak kogaigaak agobo kayaneng'wong'. ³ Si ma itimtimok chi eng' nyalilwogichuto. Amu ongen akweget ole kigilewenech amu nito. ⁴ Amu iman, kingemi kobotok, ko kisib kemwowok kele kinyoru usisiet ko u ye kigobiit, ak ongen ak akwe. ⁵ Amu nito, kingomatamuch amuita, ayogu kut, ale si kobiit anai agobo kayaneng'wong'. Ale nda matiemak yomindet, ak koek buch boisienyo ne wiy. ⁶ Ago kingonyo Timoteo kobunu olong'wong', koibwech logoiywek che bo boiboiyet che bo kayaneng'wong' ak chamnyet, ak otinye kabkatet ne kararan ne obwatech kotugul, oting'enech emosto omache ogeerech, ko u yo kimache agiche kegerok. ⁷ Amu ng'olyondonito anyun, tupchosiechu, ko kigigaigaech eng' akwe eng' bichiindonyo tugul ak nyalildanyo amu kayaneng'wong'. ⁸ Amu kisapsoti ra, ngot olumdege eng' Kiptaiyat. ⁹ Amu kongoi nee ne kimuchi kegochi Jehovah kogeny agobo akwe, amu boiboiyet tugul ne kiboiboitune ko amu akwe eng' taitab Jehovah nenyo? ¹⁰ Kisae mising' kemoi ak bet si kobit kegeer togochikwok, ak kewong'u noto ne rartaat eng' kayaneng'wong'. ¹¹ Ngondochi anyun Jehovah Kwandanyo inegee bandanyo, ak Jeiso Kristo. ¹² Ngogonok Kiptaiyat otesage ak obaraitu eng' chamnyet akwege eng' akwege ko u ache eng' akwe. ¹³ Si kobiit kogimit mugulelwekwok, ko motinye kiy ne kimuchi kiruogunenok eng' tililindo eng' taitab Jehovah nenyo ak ko Kwandanyo, eng' nyonunetab Kiptaiyandenyo Jeiso Kristo koboto chechi che tililen tugul.