¹ Amu onget akwe, tupchosiechu itunenyo ne kigiitu olong'wong', ole ki maek buch. ² Ago kingo kakinyalilech eng' tai ko u yo ongen, ak kitewerech eng' Pilipi, ko kiginyiganitu eng' Jehovah nenyo kemwowok logoiywek che kororon che bo Jehovah eng' boriet neo. ³ Amu mo bo kateunenyo lelut, nda, ko simdo, nda ko kenisiet. ⁴ Ago, ko u yo kigoyanwech Jehovah keegu che tononchini logoiywek che kororon, kengololi, ma kou che iboiboi biko, ago Jehovah ne tieme mugulelwekcho. ⁵ Amu ki makibka ak ng'alekab kachaunetabge, ko u ye onget, nda ko ng'alekab ung'ot che bo keiyandit, baorianyo Jehovah. ⁶ Ama kicheng'e tegisto eng' biko, nda ko akwe nda ko alak. ⁷ Ago kigitoloen eng' kwenung'wong', ko u kamet ne iboiboi legukchi. ⁸ Ko u noto, kigiting'enok emosto ne bo chamnyet ne o, kigimache miising' kele kegonok, ma logoiywek che kororon che bo Jehovah kityo, ago sobonwekcho agiche, amu kioegu che chamatin mising' eng' ache. ⁹ Amu obwati, tupchosiechu, boisienyo ne korom ak bichiindo keboisie kemoi ak bet. Si ma kigochi milet chi age tugul eng' akwe keamwok logoiywek che kororon che bo Jehovah. ¹⁰ Oi baorinik akwe, koboto Jehovah, agobo ole kigitepte ache eng' kwenung'wong' akwe che oyoni eng' tililindo ak eng'imanda ko makitinye kiy ne kiruogunenech. ¹¹ Kou yo ongen ole kigiteechindoite chi age tugul eng' okwe ko u kwanda ak legukchi, ¹² kiteiywok ak kegilok, ak kebaoriani, si kobiit obendate ko u ole nyolu eng' Jehovah, ne kigurchok baunatenyi ak torornatenyi. ¹³ Amu nito anyun, kemwojini Jehovah kongoi, amu kingotaach ng'olyot ne kiogasenech, o taach ma ko u ng'olyotab biko, ago ko u ye mi eng' imanit, ng'olyotab Jehovah, noto ne boisie eng' akwe che oyani. ¹⁴ Amu akwe anyun, tupchosiechu, ko kioegu yaikab tuguk che yae kanisosiekab Jehovah che mi Judea eng' Kristo Jeiso, amu kionyoru ak akwe nyalilwogik che u choto eng' bikab emeng'wong' mbo ko u ye kinyor iche eng' Yahudik ¹⁵ che kibar Kiptaiyat Jeiso ak maotik, ak kionech ama ibaibai Jehovah ama namege ak biko alak tugul. ¹⁶ Etenech ke ng'alalji bororiosiek si kobiit kesor. Inyiiti tengekwogikwai koitita, ago nyoljini iche nereknatet agoi let. ¹⁷ Ago ache anyun tupchosiechu, nga mata kegeerge ak akwe togoch eng' betusiek che ng'ering', ma eng' muguleldo, ko kigitiem mising' kele kegeerok togoch amu emosto ne o. ¹⁸ Amu kigimache kebka olong'wong' mising', mbo ane Paulo, ko kiamache ago ta amache-ago Kiranyech Chesawil. ¹⁹ Amu tos nee kamang'unenyo, nda boiboiyenyo, nda kutwet ne bo torornatet? Tos ma akwe, eng' taitab Kiptaiyandenyo Jeiso eng' nyonunenyi? ²⁰ Amu akwe torornatenyo ak boiboiyenyo.