¹ لە بەر ئەوە، با ئەو بابەتە سەرەتاییانە لەبارەی مەسیح، بەجێ بهێڵین و بەرەو پێگەیشتنێکی کامڵ پێشبکەوین. تا نەگەڕێینەوە بۆ ئەو بناغانەی پێشتر کە فێریبوین، کە ئەمانەن: پاشگەزبوونەوە لەو کارانەی دەبنە هۆی مردن، باوەڕبوون بە خودا، ² ئەو ڕێکخستنەی تایبەتە بە ڕێوڕەسمی لەئاوهەڵکیشان. دەست لەسەر دانان، و هەستانەوەی مردووان، و سزای هەتا هەتایی. ³ وە ئەگەر خودا ڕێگا بدات، ئەمانەش دەکەین! ⁴ ئەمەش لەبەر ئەوانەیە کە جارێک بەر ڕووناکی باوەڕی مەسیح کەوتن، تامی بەخشینی ئاسمانییان کرد، بوونە هاوبەشی گیانە پیرۆزەکە، ⁵ تامی وشەی باشی خودایان کرد. و پەرجوی «جیهانی داهاتوو» یان بینی، ⁶ پاشان هەڵگەڕانەوە، ئەستەمە جارێکی تر نوێ ببنەوە و پاشگەزببنەوە. چونکە ئەوانە ڕۆڵەی خودا بۆ جاری دووەم لەخاچ دەدەن و شەرمەزاری دەکەن. ⁷ سەیر نییە، ئەو خاکەی کە چەندین جار لەو بارانە دەخواتەوە کە بەسەریدا دەبارێت، پاشان ڕووەک بەرهەم دەهێنێت کە سوودی بۆ ئەوانە دەبێت کە دەکێڵن، بەرەکەت لە خودا وەردەگرن! ⁸ بەڵام ئەگەر دڕک و گیای کێوی بەرهەم بهێنیت، ئەوا ڕەتدەکرێتەوە و شایەنی نەفرەت دەبێت، کۆتاییەکەی جگە لە ئاگر هیچی تر نابێت. ⁹ ئەی خۆشەویستان، هەرچەندە مەبەستم بوو بەو شتانەی لێرەدا گوتم ئاگادارتان بکەمەوە، بەڵام باوەڕم وایەو گومانم لە ڕزگاربوونتان نیە. چونکە کارێکی باشتان کردووە کە هاوتای ئەم ڕزگاریەن. ¹⁰ خودا زۆردار نییە کە کارەکانتانی لەبیربچێت لە پیشاندانی خۆشەویستان بۆی لە ڕێگەی خزمەتەکەتان بۆ پیرۆزکراوان بۆ ڕێزگرتن لە ناوەکەی، کە پێشتر کردوتانە، ئێستاش دەیکەن! ¹¹ هیوادارین هەر یەکێک لە ئێوە تێکۆشانی هاوشێوە پیشان بدات تاکۆتایی بۆ پاراستنی متمانەی تەواوی بە هیواکەی. ¹² ئەمەش بۆ ئەوەیی تەمبەڵ نەبن، بەڵکو لاسایی ئەوانە بکەنەوە کە بەڵێنی خودا بەمیرات وەردەگرن، لە ڕێگەی باوەڕو و ئارامیەوە. ¹³ با بەڵێنی خودا بۆ ئەڤراهام بە نموونە وەربگرین. کاتێک ئەو بەڵێنەی پێیدا، سوێندی بەخۆی خوارد، چونکە کەس لە خۆی مەزنترنییە سوێندی پێبخوات. ¹⁴ پێی فەرموو: «من بەرەکەتدارت دەکەم و نەوەیەکی زۆرت پێ دەبەخشم!» ¹⁵ بەم شێوەیە، ئەڤراهام بە ئارامییەوە چاوەڕێی کرد و ئەو بەڵێنەی پێدرابوو وەریگرت. ¹⁶ لەڕاستیدا مرۆڤەکان سوێند بە مەزنترینەکان دەخۆن و بۆ ئەوان سوێند کۆتایی بە هەموو ناکۆکییەک دەهێنێت و بابەتەکان یەکلایی دەکاتەوە. ¹⁷ بەهەمان شێوە خودا ویستی بە شێوەیەکی یەکلاکەرەوە بۆ میراتگرانی بەڵێنەکەی کە هەرگیز ناگۆڕێت، بە سوێند بیسەلمێنیت. ¹⁸ لەسەر بنەمای بەڵێن و سوێندی خودا، کە بابەتی جێگیر و نەگۆڕن و ئەستەمە خودا درۆیان تێدا بکات، هاندانی بەهێز بەدەست دەهێنین، دوای ئەوەی پەنامان بردە بەر چەسپاندن بەو هیوایەی کە لەبەردەممان دانراوە. ¹⁹ ئەم هیوایەمان هەیە کە وەک لەنگەرە بۆ دەروونمان، چەسپاو و ڕاگرە. دەچێتە ناو شوێنی هەرەپیرۆز لە پشت پەردەکە. ²⁰ لەوێدا یەشوا پێشتر و لەبری ئێمە چوە ناوی دوای ئەوەی بوە سەرۆکی کاهینان بۆ هەتاهەتایە لە پلەی مەلخیسەدەکە!