1 Ekhe khyo andagile uYahwe. Lola, ekhotondo ekhya sekeincha khenchuva! 2 Akhata, "Vwukhohevona khekhi, Amosi?" Nekhata, "Ekhetondo ekhya seke incha khenchuva." Pwu uYahwe akhambola, "Avanuvango Israeli vafikhe kha mwisyo; sanekhavalemancha alonge. 3 Inyembo incha mu tembile yanchiva filelo mu linchuva elyo vwu inchova Untwa Yahwe. Emifimba yagiva mingi, valagataga khemienye!" 4 Mupolekhenchange ele, yomwe mukhovakanya avaganchu nu khong'encha uganchu pa khelunga. 5 vanganchove ukhuta, "Vwugwisila omwenchi ompya, pwu tuwesya ukhuguncha ifinu? Elinchuva elya Sabato vwulesilile, pwu tuvombe ukhuguncha enganu? Tuvombe ekhepimelo ekhedebe nu khutoncha ebei, tusyorage mufipimelo ifyavulyasi. 6 Olo lutwesya okhoguncha enganu embivi, ukhugola uganchu ne khyuma, nu uganchu ne vilato." 7 Yahwe edyegile khu vononu uvwa Yakobo, "Lweli sanelasamwa imbombo inchavene na yeleyemo." 8 Khukhota ekhelunga sakhelatetema pa ele, khelayomo uveitama ukhulelela? Goni ago galeema ndu Lugasi ulwa Naili, pwu gelugatanchiva nu khukepa ndo lugasi ulwa Misri. 9 Lelincha elinchwa yeyo -uvu vuvonchofi uvwa Ntwa Yahwe- ukhuta yanivomba elinchuva leseme pamusi, nu huyevekha ehisi munkelunga pamusi. 10 Yanikhugasyetula amanchuva agakhohovokha khwenyo ukhuva llususuvalo. Mwevoni pwu yanifyalaga amagunila nu khupuyula emitwe gyenyo. Yanikhogavomba aga ndu ukhundelela umwana uve ale mwene, mu manchuva aga luvavo olwa mwisyo. 11 Lolaga, amanchuva agihwincha -inchova Untwa Yahwe- opoyanipela enjala mu khelunga, enjala sio eye nkate ama ekhyomilwa ekhya magasi, khiva ekhya khopolekha elimenyu elya Yahwe. 12 valayogaga ukhuhuma khu nyanja na nyanja valanyila ukhuhuma khu khege ukhuluta khu vwusemo khulonda elimenyu lya Yahwe, pwu savakhalepate. 13 Pa linchuva elyo avakhenja avanonu na vademi valanchilikha khu njala. 14 Vavo vikhudyega khu mbivi iya Samaria valagwa savalasisimukha akhange."