1 Nikwimagha pa simbili ijavuloleli napikujivika june pakyanya kyongo panyuma ja vuloleli, napilola kulughinisio kulolo umwene iti kiki kulyune na ndani nisyetuka kuhuma kulupiko lwango. 2 UYahwe akamula nakuuti, "lemba amavonolo agha, kange ulembe ikyang'ani pakibavo neke kuuti juno kyale ikwimba ndeponu ikimbila. 3 ulwakuva sino ghukusivona isi sijighe nakunsiki ghuno ghukwisa pe ilijovagha kisila kughua nambe jilidilagha, ujighulilaghe,. ulwakuva kuvwakyang'ani vukwisa kisila kudila. 4 Loolagha! jula juno uvunoghelua vwa mwene navuling'ine munkate mwa mwene pano itumila munkate mwa mwene ningufu. loli uvunyakyang'ani ikukalagha nulutengano. 5 ulwakuva uluhuje lweluhendami lwa soleka umunyamatingo ulwakuuti aeke pinoghela looli peikwisia uvunoghelua vwamwene ndavule kukwilana umwene ikukong'ania mufipelela kange ikong'ania mulwamwene avanhu vooni. 6 isi sooni nasingatende uvujofi kukusyojola ulwimbo ulwamasyojola luno lunoghile, "iga kwa jula juno ikwongelesia fino nafyamwene kunsiki ghuliku ghuno ghukwongelesia uvusitu kusino ghupingikile? 7 Vala vanovighula kulyuve nakalingi navikwimagha? navano vitetemia kusisimuka? ghuvisagha ntamu vwimila avene. 8 ulwakuva ughomile avaanhu vinga, amasighasi ghoni aghavaanu ghikukughomagha uve. ulwakuva ukung'ile idanda nyinga javaanhu nakuvomba uvugalusi vwa muiisi, vuno navulutana ni iisi, amakaaja na vooni vanovikukala nkate jake. 9 iga kwa jula juno ihongola uvukavi nuvuhosi vwimil vwa nyumba jake, pa uluo anoghile pinosia ikvwaso kyake pakyanya pikumbuka umwene nulutengano patali namavoko ghavuhosi. 10 utendile isoni ku nyumba jako, navikuvadumula avaanhu vinga kange avombile uvuhosi mulwako ghwemene. 11 ulwakuva ilivue lihumisie ilisyo kuhuma kuluvumba, nilipalo lya lubavo lilikuvamula kuuti, 12 iga kwa jula juno ijengagha ilikaaja nidanda, najuno inywilisiagha ilikaaja nuvuhosi. 13 Ulu naluhuma kwa Yahwe unyafipugha kuuti avaanhu vavombe imbombo nu mwoto nifipelela fyoni isinge sisakala sene kisila kimonga. 14 Iisi jijighagha jimemile uvumanganyi nuvwimike vwa Yahwe ndavule amalenga ghimemia inyanja. 15 Iga kwa jula juno ikimbila umanyani ghwake aghale, uve ghwe juno ghukwongelesia isumu vavike vaghale ulwakuuti ukagule kulola uvufuli vwavanave. 16 Ghutumbilagha, isoni sako kukila uvwimike. kunyua isio vulevule, nakufwikula uvufula vwako juve. Ikikombe kya luvoko lya kundio lwa Yahwe lukwisa lukukugalukila uve, nisoni sifunikilagha uvwoghopua vwako. 17 Uvugalusi vuno vukavombilue kulebanoni vikukufunikilagha nuvunagifu vwa fikanu vukukwoghofia. Ulwakuva ukungile idanda savanu kange uvombile nuvugalusi mwisi jila, makaja, navoni vano vikukala mumuo. 18 Ikihwani kino kikachongilue kukuvumbulila kiki? ulwakuva jino akahongwile ikyo nambe juno akanosisie nakuyeyusia imetali, ghwem'bulanisi ghwa vudesi; ulwakuva ghukujitika imbombo ja mavoko ghake pano ghitenda amanguluve ghano naghijova. 19 Iga kwa jua juno ijova kulitupa, sisimuka nambe kulivue lino nalijova ima! ifinu ifi fivulanisia lolagha, iki kikupikilue nisahabu nindalama, loli munkate mukyene nakikumela nambe, 20 Looli uYahwe alimunyumba jake inyimike ijakufunyila! iisi jooni jinyamalagha pamaaso ghake.