1 Kwiiki, bhahiri bhaane mushomerwe ko omonene. Tenkomaha nyankohe kobhang'oora ng'oora kwiki amang'ana gharaghaara. Amang'ana ghayo ngarabhahane obhohoru. 2 Mwiraarere ne esese. Mwiraarere na bhano bhakokora emeeremo abhaghogho, mwiraarere na bhaara bhataihanshire emebhere gyaabho. 3 Ko-bhoora bheeto mbo esaro bheeto mbo tokomosengera Waryobha ko okotooribhwa no umwika. Bhano tokwihemeera ku Kiristo Yeesu, na bhano totaana obhokare ko-omobhere 4 Hata igho Singaaho omoonto kutwikereerya omobhere ghono, oni nenkakoore igho bhokoong'u. 5 Kobhora nasaarwe urusiko rwa monane, nebhoreeywe mu kyaaro kya Abhaisraeli. No owaekeghaambo kya Benjameni nde nomwebhorania wa Abhaebhorania ku ukuhiikya obhoheene, na umughiiro ughwa Musa nareenga Farisayo 6 Ko- Obhokaraaru bhwaane narinyankeeri risengeero, ku ukwiighwa obhoheene bhu umughiiro. 7 Kose komang'ana ghoonswe ghano namahaanga ghaana ehoorohoora ku-woni naghaghere nkyu ubhunyaanku ko bhoora namomanya Kiristo. 8 Ko-obhohene, ndaghaghera amang'ana ghoonswe mbosa kukughira kwa ubhuuya ubhwa komomanya Kiristo Yeesu omonene waane. Kukughira kwaye natigha amang'ana ghoonswe, ndaghagheera kyu ubhunyaanku kose mnyoore Kiristo. 9 Kwiiki niyorooki monse yaaye tene na bhoheene bhwaane mwene kuurwa ku imighiro, kasi neena obhoheene bhono bhuukurweera ku ubhukuuumya. 10 Bhoono ndatuna komomanya wwe na singuru sya ukuryooka kwaaye na obhomwe bhwa inyaanko yaaye ndatuuna isyooribhwi na Kiristo kutubhaa no na Uruuku rwaye. 11 Ahooko ntore koghaanyeera ukuurya oka ukwa abhaku. 12 Te bhoheene igha namarakuunyoora amang'ana ghaayo, kose igha ndenge muuya ko ghaayo, nkyo nkokaraara nyoore keera kukurweera na Kiristo Yeesu. 13 Bhaiiri bhane tenkomanya igha namarakunyoora amang'ana ghaano kose ndakoora ng'aana emwe ndeebha agha kaare ndamaheera agha mbele. 14 Ndikong'eerya kohekera ekerengere koore nyoore imituho ighya obhobherekeerwa ubhwa Waryobha ku Kiristo Yeesu. 15 Bhoonswe bhano twabhokeeneye obhohooru, toratoora kwitegheera igha, nyoore uwoonde araitegheera bhoonde ko ng'ana yoyonswe, Waryobha wonswe nararyooroki ko bheeto. 16 Kubhuyo ritambooka reno twahekeye toghendeeri kya bhuuyo bhuuyo. 17 Bhahiri bhaane munyeeghe oni mobhamaheere bhuuya bhaara bhaakuya ku kutubhana bhoona toore bheeto. 18 Abhaaru bhanobhaaho mbaara mbatebheeri hakehake, na bhoono ndabhateebhya kya abhabhiisa bho omosalabha ghwa Kiristo. 19 Umuhiko ghwaabho no obhosaarya kobhora Waryobha wabho ne enda, ne ekeghaka kyabho kereenge mo sensoni syaabho. Bhalitegheera amang'ana gha mukyaaro. 20 Asi amaikaaro gheeto nkighoro iyo eno tokoghaanyeera omotoorya weito Yeesu Kiristo. 21 Ariighisyoorya emebhere ghyeeto emeroseeru gheebe kyo omobheere ghwaaye tighwa obhohoreeru, ko obhoto bhoorahoora bhono bhookomotoorya konaghya ebheento bhyoonswe.