1 Anye nili murume unu nalolele jinyako emwalo ya ligongo lya lifululuko lya Ratabhugenyi. 2 Amambilimya no kunana okulibhata muchisute bhutabhee mubweru. 3 Chimari amanyindulila okubhoko kwaye ku bhwani rindi na rindi, rusiku lwone. 4 Akola omubhili gwani no lususu lwani okuwelela; abhutula amawa gani. 5 Amombaka amakumo aga mayaru kulwanye, ka nansingira no bhusungu no bhukomeye. 6 Amankola nikale mumbara jo bhusute, lwa bhalija abho bhafwe kara. 7 Amombaka olukuta okunyiinda ka nitakutula kuloroka. Amakola emikufu jani jisitoele. 8 Ka nolwo kutyo enibhilikila no kulilila okusakilwa kasimya okusabwa kwani. 9 Ameshya injila yani kwo lukuta lwa mabhui go kubhalika; amakola injila yani mbibhi. 10 Omwene ali lwa idubu inu ilindile okundwana, intare mubhwiseleko; 11 Amaindula kumbali jinjila jani amankonja tuyu 12 Amekotisya obhukoma bhwaye ka nankola anye lwa lilingelo lyo musimu gwaye. 13 Amafumula amanyi gani kwe musimu jo mufuko gwaye 14 Naliga nili chikesyo ku bhanu bhari bhone, chyejekanyo cha kujimibhwa kwebhwe rusiku rwone. 15 Amanyijusya kwo bhungu no kusinyilishwa okunywa amanji amalulu. 16 Abhutuye ameno gani na jinkogoto; amansukuma emwalo muruteri. 17 Omutima gwani gwinulwe omurembe; nilambwiwe okukondelwa niki. 18 Kutyo ka enaika, "Obhwigumirisya bhwani bhusingarikile ka one obhwisige bhwani ku Ratabugenyi". 19 Ijuka jinyako jani no kusurubhenda kwani, amanyi amaruru no bhusungu. 20 Enigendelela okwijuka ka namenama munda yani. 21 Nawe enikwesa linu mubhwenge bhwani ka kutyo ninaobhwisige. 22 Obwenyi bhulumatene obhwa Ratabhugenyi bhutari na bhutero ka lisasila lyae litakuwa. 23 ni myaya bhuri katondo, obhulengelesi bhwao ni bhunene. 24 Ratabhugenyi ni mwandu gwani," Naikile kutyo nilimwisigilile. 25 Ratabughenyi ni bhwana kwabho abhamulinda, ku unu kanuga. 26 Ni kisi okulinda obhwitonde kwo bhukisya bhwa Ratabhugenyi. 27 Ni kisi ku munu okugega ingurwema ku bhusigaji. 28 Siga enyenje enyele ku bhutekane, anu eibha itulilwe inguru yae. 29 Siga atule omunwa gwae muruteli- okutule okubha kuchaliwo okubha no bhisige. 30 Siga asosye litama lyae ku mwene unukamubhuma, ka ejusibwe leke kwa jinswalo. 31 Kwo kubha omukama atakuchilema kajanende, 32 Nawe nolwo kutyo katulamo obhusulumbae, alibha na chigogo kwo kulubhana no bhwafu bhwo kwenda kwae kunu kusimbarikile. 33 Kwo kubha atakulamula okusoka mumwoyo gwae aamwi okunyasya abhone bho mwana munu. 34 Okutaja emwalo yo kugulu abhabhoywe bhone bhe chalo, 35 Okumwima echimali omunu imbele yo kubaho kwa unu ali inguru. 36 Okumwima echimali omunu- Omukama achali kwikirisya ebhinu lwebhyo! 37 Niga unu alomele ka nijikumila, labha tiwe omukama alomele? 38 Atalikusoka mumunwa gwa unu inguru amabhibhi na makonde agaja? Omunu unu akobhele katula kutiki okubhambala? 39 Omunu unu katula okubhambala kwa indamu ya bhibhibhi bhaye? 40 Chilole jinjila jeswe no kujilegeja, na chimusubhile Ratabhugenyi. 41 Kachinamusya emyoyo jeswe na mabhoko geswe ku Ratabhugenyi murwire.: 42 Chiyabhize no kukaya, ka uchalikusasila. 43 Wiswikiye no kubhiililwa no kuchibhilimya, witile ka utatesisye. 44 Wiswikiliye ne lile koleleki ati kusiga kubhao esabhalinu elitule okulabha. 45 Uchikolele lwo bhujabhi ka mamu mugati mu mayanga. 46 Abhasoko bheswe bhone bhachilailiye, 47 Obhubha na lyobho lichijie, okufwa no bhunyamuka. 48 Ameso gani agagala ka omigelesi eja masiga kulwa injuno ya abhanu bhani. 49 Ameso gani agasosya amasiga kulaliwo kusigila; kutaliwo kwifungwamo, 50 Okukinga ao alilola emwalo ka Ratabhugenyi alilola okusoka murwire. 51 Ameso gani agadetelesisya obhusulumbae kulwa injuno ya bhayarakaji bho musi gwani 52 Enifwimibwa lwa inyonyi abho bhaliga bhali bhesoko bhani, abhanfwima italiwa njuno. 53 Bhandasa mulyobho ka nibhandasila ubui, 54 Ka amanji nigeteka inguru yo mutwe gwani. Naikile ati , "Nitemelwe kura!" 55 Nalibhilikiye lisina lyao, Ratabhugenyi, Okusoka obhulela bhwe lyobho. 56 Wonguwe obhuraka bhwani, Wongwe obhuraka bhwani nejile naika,"Wasiga kwigala kutwi kwao kwe chililo chani echo kusakilwa" 57 Wejile ayei olusiku lunu nakubhilikiye," Wakileati, "Wasiga kubhaya" 58 Omukama, wetegeleyo ku kesi yani, wakisiye obhulame bhwani! 59 Ratabhugenyi, worola ama bhibhi ganu bhankoleye, lamula ikesi yani. 60 Walola ebhifuni bhyebhwe, emitegeka kwebwe okunjako. 61 Wongwa obhujimya bhwebhwe, Ratabhugenyi, ka okwitegeka kwebhwe okunjako. 62 Eminwa eja bho abhemuka chitasikene naye, ka amasitako gebhwe,agaja kulwa anye rusiku lwone. 63 Nulole lwa kutyo abhenyanja ka nibhemuka, abhanyinya na jinyimbo jebhwe 64 Bhalipisye, Ratabhugenyi, kwo kwingana na ganu bhakolele. 65 Ulisiga emyoyo jebwe jitana chikayo, Indamu yao ibhe inguru yebhwe. 66 Oubhabhilimya kwo bhusaye ka nubhanyamuka emwalo yo rwire, Ratabhugenyi!