Mbwana ya 4

1 Baada ya shindo shi ngalelambwa, ngaghona kee moongo nyuvekeri urughujwa ruveu. Na iruu ja kuvoka, ikededa nainyi cha oghanda, ikededa, ''Njoo iha ngapekulora isho shipefumia baada shindo ishi.'' 2 Ko haraka ngavekeri ngonyi, ngaleghona kuvekeri na kitiri kya enzi kiderijwa ruveu, na mndu akilaje. 3 Umu avekeri akilaje nyalevonwa cha inghoja yaspi na akiki. Kuveghode uda oovasi ukitengetye kitiri kya enzi. Uda oo vasi nyuleghonwa cha zumaridi. 4 Ikitengeta kitiri kya enzi kuveghode na shitiri sha enzi shingi ishirini na shina, na vavedamije shitirinyi sho sha enzi vekeri vasuri ishirini na vana, vararikye nguvo siilie na itaji ja dhahabu midonyi yavo. 5 Ifuma kitirinyi kya enzi kulefuma mwangasa o kinag'aru, ikururuma na kinagaru nataa saba sivekeri sinaaka mbele ya kitiri kya enzi, taa so nyi ngoo saba sa Makilunga. 6 Na mbele ya kitiri kya enzi kuveode olubali bali, iariye cha kioo. Vose itengeta kitiri kya enzi kuveode varukie vaana, vaghode meso mbele na numa. 7 Kiumbe o kuvoka arukye nyavekeri cha ngatunyi kiumbe okavi arukiye nyavekeri cha ngache, kiumbe o karadu arukye nyaveghode kyanu cha kya mundu, nooja aghode uhai o kaana nyavekeri cha mtonyi ukepurunduka. 8 Shiumbe sho shighode uhai shina kila umu nyaveghode makungo sita, vaichurie meso uye na gwanda aake. Kio na msanyenyi vapeeimuka dedapo, ''Mwele, mwele, mwele nyi mndumi Makilunga, mwitorie uye ya vose, uja avekeri, na akeri na ujaapecha.'' 9 Kila kigheri shiumbe shighode uhai vefuna utukufu, heshima, na itereshe mbele sa uja akeri adamije iho kitirinyi kya enzi, icho apeishi milele na daima, 10 Vasuri ishirini na vaana valesujudu vavenyi mbele yaake uja akidamije kitiri kya enzi. Valerama gwanda ko icho apedamia milele na daima na ikumba gwanda taji savo mbele ya kitiri kya enzi vakededa, 11 ''Nyustahili igwe, Mndumi odu na Makilunga odu, iadija utukufu na heshima na oru. Ko kuwa nyuleshiumba shindo shose na koikunda japo, dhivekeri na shileumbuwa.''