Mbwana ya 14

1 Ngelelambwa ngaona Mwana kondoo aimkaniye ushangunyi lokwa uye ya ifumbo i Sayuni. Kimu nacho vekeri 144, 000 vaode rina jake na ja Papa jilereghwa katika shiamunyi shavo. 2 Ngaichwa iru ifuma ruveu yerunduma cha mringa ufoje na irundue ya ikururuma. Iru ngeleuchwa nyi chakundu vakava vinubi shavo. 3 Vakeiba nyimbo sihya ushangunyi lo kitiri kya enzi na ushangunyi lo vaja vanaomwa na vasuri. Kode nama aode uwezo o kulosha nyimbo so ilakeri 144, 000 ambao veleirwa ifuma orikenyi. 4 Iva nyivaja valachafuka vavenyi ko vaka, ko kitevi vanajitunza vavenyi uye ya matendo va sinaa. Iva nyivo velemmadiya mwaimondo kokose eneenda. Ivanyivo veleirwa ifuma ko vanadamu vekeri ndunda sa kuvoka ko Makilunga na ko mwa omondo. 5 Kode urongo uleadikapo katika momunyi yavo; vapelaumiwapo. 6 Ngaona malaika ungi aketila wolosi ya ruveu, ambaye nyaode ujumbe o ruveu o habari nji cha ko ivavia vaja vadamije orikenyi ko kila orika, kabila, lugha, na vandu. 7 Kavadikira ko irundue, ''Mwogwenyi Makilunga na mningenyi umwele. Kokitevi shinyo sha hukumu shimeshika. Mterevenyi icho, icho elerunda ruveu, orika, na olubalubalu, na nduva sa mringa.'' 8 Malaika ungi - malaika o kavi kauvadya akideda, ''Umegwa, umegwa Babeli ndue, ambaye ile vaongisa orika divai ya ukahaba, ambaye ileende unangwa uye yake.'' 9 Malaika ungi - malaika o karadu - elevavadya, kadeda ko iru ndue, ''Yoyose apemtereva mnyama cho na sanamu yake ne adija alama katika kyamu ana kokonyi, 10 Nacho kavi apenywa divai unaghwa o Mkilung, divai ambayo iyandaliwa ne buswa bila isnagiranwa katika kikobo kya nyashi yake. Mndu apenywa apeteswa ko modo n modo o kibiriti ushangunyi lo malaika sake vamwele na ushangunyi lo Mwana imondo. 11 Na musu oivavwa javo ukadambuka ndarasi na ndarasi, nama veleva neitoto niso nama na msanyinyi ana kiyo - ivo vamwabuduo mnyama na sanamu yake, na kila mndu emeadija alama ya rina jake. 12 Iki nyi kidikiro kye ivedeja ne rimija ko vana amini, vaja vana tii amri sa Makilunga na imani kati Yesu.'' 13 Ngale ichwa iru ifuma ruveu ikededa, ''Regha iva: Na keba vapa vapao katika Mndumi.'' ''Nyikyo, ''Adeda Ngoo, ''Ili vadimetotona ifuma uya savo, kokitevi matendo vavo vape vavadya.'' 14 Ngelelambwa ngaona kuveode na irindi jiilye, na evekeri adamije irindinyi nyi umu evekeri na mfano o Mwana o mndu. Evekeri na itaji ja dhahabu katika mdo wake na mundu akarije katika koko kwake. 15 Malaika ungi kavi elecha akalunyi ne dikira ko iru ndue idambuka ko uja edamije katika irindi: ''Irya mundu wapo na avoke isambwa. Mekoja kigheri kyesambwa kimeshikya, kitevi mafuno yevekeri katika orika yamevira.''' 16 Uja evekeri katika irindi kavi eleusegheja mundu wake uye ya orika, na orika lukasambwa. 17 Malaika ungi kacha ifuma hekelu ja ruveu, nacho eleva na mundu ukarije. 18 Na bado malaika ungi kacha ifuma madhabahuunyi, na malaika evekeri na malaika uye ya modo. Kamdikira ko iru ndue malaika ambaye evekeri na mundu akarije, ''Irya mundu akarije na usangirye maramba va mzabibu ifuma mzabibu o orika, mekoje zabibu lwaha simevira.'' 19 Malaika eledamada mundu wake katika orika na elesangirya mafuno va sabibu sa orika na elerukuta katika ipipa jidue ja divai ja ghadhabu ya Makilunga. 20 Ichujio ja divai jileborwaborwa nnja ya mri na ndakame ikambusukya ifuma katika kimo kya hatamu ya farasi, ko stadi 1, 600.