1 Ko ikyo mundumi, emanya ke Mafarisayo wameichwa ke Yesu ameowikia walosho wafojie ko Yohana, naiwabatisa, 2 (Kake Yesu amonyi alebatisa po kake walosho wake), 3 Nyaletija Uyahudi kaenda kawi Galilaya. 4 Nacho einyarie naide olosi o Samaria. 5 iho mri o Samaria, uchilaghwa Sikari, kufui na mdeme uja o Yakobo alemnenga Yusufu mwanake. 6 Naiho kuwode kisima kya Yakobo nyekeri amechoka kitevi kya kiaro kyake, kadamia kudi kudi kisimenyi. Naiho kigheli kya saa sita. 7 Kacha mudumuka Msamaria achedaha mringa, Yesu kambia, ''Nginenga mringa nginywe.'' 8 Amu walosho wake weledambuka mjini ndeura kando. 9 Koi kyo mka oja Msamaria kambia, ''Ko kuda iwe Myahudi oshigha mringa kokwa, nainyi mndumuka Msamaria?'' Amu Wayahudi wakusangirania na Wasamaria po. 10 Yesu kamtalwa kambia, ''Mbele omanya karama ya makilunga, nacho nyunga akenakwia nginenga mringa nginywe, nyicho omtererewa macho ekunenga mringa urukye.'' 11 Mka oja kambia, ''Mudumi uode kedamia, po na kisima kileghye. Nguku outia mringa cho urukye? 12 Ko ikyo iwe mdue, koida Papa odu Yakobo, ajinengie kisima ki, nacho kanywa mringa u na wana wake, na nyamandu sake?'' 13 Yesu kamtalwa kambia, ''Icho apenywa mringa ichu apeichwa uyoda sepo, 14 Kake icho apenywa mringa ichu apeichwa nyoda po ndarasi kwke mringa icho ngapemnenga nyupewa chemchem ya mringa o msino na moo ndarasi.'' 15 Mka uja kambia, ''Mundumi, nginenga mringa cho ngaichwa nyoda na ngalachedahase .'' 16 Yesu kambia, ''Enda undemwende mia po uche nacho.'' 17 Mka uja kamtalwa kambia, ''Ngaode mii po.''Yesu kambia, ''Odeda loi ke uode , 'Mii po;' 18 Ke umewa woni watanu, naicho ukeri nacho lwaha mia po po iho odeda loi!'' 19 Mka oja kambia, ''Mundumi, ngawonie ke iwe nabii. 20 Wandyedu wakinedasa ifumbunyi iji. Nainywe mkenemba ipo Yerusalemu nyiandu kuinyarie idasia.'' 21 Yesu kambia, ''Mkyeku, ngidikenyi, kigheri kinacha mpeche dasa se Papa ifumbunyi ichu po, nama ipo Yerusalemu po. 22 Inywe mkenedasa kindo mlakiichi, ise jikinedasa kindo diichi, amu nyukinefuma ko Wayahudi.'' 23 Ke kigheri, kikenacha na kigheri, kikeri ke iwo wakinedasa ko loi wapedasa Papa ko ngoo na loi, amu Papa nyakenawashigha wandu chakundu iwo wandasye. 24 Makilunga nyi ngoo, nawo wakinendasia nyicho iwainyarie mundasye ko ngoo na loi.'' 25 Mka oja kambia, ''Ngaichi akenacha Masihi, (achilaghwa Kristo). Nacho kamecha nacho apejitambalwa shindo shoose.'' 26 yesu kambia, ''Inyi ngakenededa naighwe nyicho.'' 27 Iho kudo wakacha walosho wake. Wakarijwa kitewi nyakerideda na mundumuka kake mndu akendeda ke, ngikyo ukinadeda nacho.?'' 28 Basi mka oja katija nungu yake kaenda mjini, indewawia wandu, 29 ''Njoonyi muone mudu angiwia shindo shose ngileuta, na kipewa icho nyicho Kristo?'' 30 Wakafuma mjini wakambadia . 31 Ipo anawawia waloshi wake wakamterewa weamba, ''Rabi uje kando.'' 32 Kawawia, ''Inyi kaode kando mlakiichi.'' 33 Ko ikyo walosho wake wakawiana, ke kode mndu amemwendie, ''Kando?'' 34 Yesu kawawia, ''Kando kyakwa nyiiki, ngiute, okundo lwake icho alengiduma ngimanje uya wake. 35 Inywe mpemba mieri ina nyiho kuche mbora?' Lambwenyi inyi ngamewawienyi mteshwe meso wanu mlambwe mideme, ke imeilaa, tayari ko mbora! 36 Naicho nyapeadija mshahara nasangirye matunda ko nwo o ndarasi matika icho awaja nacho nasambwe naworokya andwamu. 37 Ko ikyo kidedo kyo kya loi, 'Amuu kyacha kasambwa ungi.' 38 Inyi ngalewaduma msambwe shija mlaleshirundya, wengi walelunda nainywe mkaingia ukiwenyi uwawo.'' 39 Na mri oja Samaria wafoje walalemwadija kitevi kya kidedo kya mndumuka uja alededa ke nyalengiwia shindo shoose ngaleuta.'' 40 Ko ikyo Wasamaria waja wewadia Yesu wakamtelewa nadamie kwawo nacho kadamia mfuri iiwi. 41 Wandu wafoje wakamwidikija kitevi kya kidedo kyake. 42 Wakambiamka oja, ''Lwaha nama kitevi kija shidedo shapo tu po, amu jaichwa jiwenyi, jiichi ke ichu mkira o uyana chu.'' 43 Na mfuri iyo yeiwi kakure ipo, kaenda Galilaya. 44 Amu Yesu amonyi nyelededa ke mwiroti awde waria orikenyi kwake amonyi po. 45 Wafuma Galilaya, Wagalilaya wakamwadija. Amu wameona shirundo shose aleshiuta ipo Yerusalemu kigheri kya ndina amu walenda ndimenyi. 46 Basi aleshika kawi kana ya Galilaya nyiho andu aleghalusa mringa uja ukawa divai. Na wekeri na diwani umu mwanake nyewelue ipo Kapernaumu. 47 Nyiho andu aleichwa Yesu amecha ifuma Uyahudi mpaka Galilaya, kammbadia, kamterewa nasoke nandemchira mwanake amu nyekerikufui ipa. 48 Nyiho Yesu kamtria, ''Mlemeona ikunya na injwa mpeidikija po. 49 Diwani uja kamtria, ''Mudumi, soka mwanakwa alachepa.'' 50 Yesu kambia, ''Enda mwana po nyarukie.'' Mudu ja kaidikija kidedo aongojwa Yesu nacho kaada njia. 51 Hatabakenesoka, wambele wake wakambia wakaamba mwanake nyarukye. 52 Saa inga nawo wakambia, ''Iwo saa saba homa ilemlekeja.' 53 Ndie kamanya ke saa sija alewiwa mwanapo arukye, ''Kaidikija icho na wose wakanyi kwake. 54 Ikyo nyi kikunya kya kaawi aleuta Yesu akeri amefuma Uyahudi kashika Galilaya.