1 Henaikyo luvaha haghire inyanyiriwa kaghu ya vaya vake hena Kristo Yesu. 2 Kwaku kanuni ya mbecho mcha wekira ike hena Kristo Yesu indenjifanya wa huru hacha na thambi na kifwa. 3 Kwalia kiya sheria ilehererwa iki hira kwa lia iveke hena vuthaifu hena mwiri, Ruva alehirire. Alemrumie mwana wakwedu hena mviri wa thambi ave itathi lya thambi, naakainyanyi na thambi hena mwiri. 4 Alehirire kwii kimacha maagitho gha sheria ghahirike voshi yeru, ifwe furachighenda kwa iivaria mwiri, mira kwaiivaria findo fya ngoo. 5 Vaya vakyaivaria mwiri vachiririkana findo fya mwiri, mera vaya vakyaivaria ngoo vakyaririkana findo fya ngoo. 6 Kwaku macha gha mwiri ni kifwa, mira macha gha ngoo niikia na mborere. 7 Kwa lia macha gha mwiri ni mnzo wa Ruva, kwalia irakyaivaria sheria ya Ruva, kangi yairima iichwayo. 8 Vaya vagheivaria mwiri vakairema imnulitha Ruva vo. 9 Hata kwiyo muke hena mwiri mwe mike muke hena ngoo, kole ni keni mbeho wa Ruva achiikaa voshi yenyu. Mera kole mndu araghire mbeho wa Kristo, we thi wakwewe. 10 Kole Kristo ake voshi yenyu mwiri ufwie na findo fya thambi, mera ngoo ikei hena findo fya keni. 11 Kole ngoo ya wia amvuthirie Yesu ifuma hena kifwi achiikaa voshi yenyu, wiawia amvuthirie Kristo ifuma hena kifwa anika miri yenyu yefwa kwa irira lya mbeho wakwe, achiikaa voshi yenyu. 12 Henaikyo veru vakwa, ifwo fuvathile, merathi kwa mwiritho kufuishi kwa vundu vwa mwiri. 13 Mera kole mfwaishi kwa vundu vwa mwiri, muke hawihi ifwa, mera kole hena ngoo mmwahira mihirire ya mwiri, namwe mwakia. 14 Kwalia vengi venyu mmwatikwa ni ngoo ya Ruva, iva ni vana va Ruva. 15 Kwa lia murairikirie ngoo ya utumva he hata muovohe. Kivungi kyakwe, mulenikiwe ngoo yeva vana, ningeyo heyo mfwafugha, "Abba, Papa!" 16 Mbeho weka akyashuudia hamwina ngoo iva vana va Ruva. 17 Kole fuvana heikyo fuvarithi va Ruva. Na ifwe fuvagherithi hamwi na Kristo, ikiva kwa keni mfwalya vwasi nawe kimacha fuirimbe itumbishwa hamwi nawe. 18 Kwaku nnatara mavwasi gha igheri lyi ku thikindokyo nikia nanitha na vurwe mvwagherughuliwa kweru. 19 An'gu fiumbe vyoshe mfya vera kwa macha mnu nairughuliwa kwa vana va Ruva. 20 Kwa lia ivumbwa lilevikiwe mbai ya vuvichwa, thi kwa ifura yo mira ni kwa vundu vwake afikelele. Hena mborere 21 ku ivumbwa lyoka nalyo lyavikwa huru ifunywa hena ufumwa we kondekewa, naiingirwa hena uhuru lwa vurwe lwa vana va Ruva. 22 Henaikyo fuichi ku iumbwa nalyo mkwalwaa nailya vwasi hamwi na luvaha. 23 Thikwio duyo, mira naifwa fughire malimbuko gha ngoo - ifwe nafwe mfwalwaa hena nafsi theru, fukivera iilaghwa vana yani ikirwa lya miri yeru. 24 Kwa lia ni kwa matumaini ghekirwa. Mira kindo kivekyaverwa kikavoniwa haghire ilya vwasi, kwalia minga akyakitegemea kia akyakivona? 25 Mera fukakitegemea kindo furakivoni, mfwa kivera kwa saburi. 26 Hena kwiyo kwiyo, Mbeho nawe achifuteha hena iherwa lyeru. Kwa lia furaichi ilereva fudu kikyashighwa, mera mbeho weka achi futerevea kwailwa kuravie irerwa. 27 Nawe mghelolea ngoo theru aichi mariri kano gha ngoo, kwalia achilia achitereva vundu vwa vaya vairikilie ianana na ifwa lya Ruva. 28 Nafwe fuichi ku kwa vaya voshe vamfurie Ruva, weachihira findo fyoshe kwa vucha, kwa vaya voshe vaileghwe vundu vwake. 29 Kwalia vaya voshe avevaichi idungi kuvoka, kangi vaananithwe fwanani ya mwana wakwe, netha ave mgheghirwa wevoka kighari kya vambwie vengi. 30 Navaya alevathaghurie idenga ivoka naivo availeghe navo. Navaya avevaileghe ivo avataririe keni. Navaya alevataririe keni ivo navo akavakwera. 31 Fughambe ng'u iki hena findofi? Ruva akiva ughongo lweru niitho ake kaghu yeru? 32 We arachimlekelea mwana wakwe weka mira alemfunyire vundu vweru ifwe voshe aleka kwia ivughavia fyoshe hamwi nawe? 33 Niitho airima ivathitaka vaghe thaghurwa va Ruva? Ruva niwe mghevatariria keni. 34 Niitho airima ivanyanyiria kwai kavwa? Kristo Yesu niwe afwie vundu vweru, nakangi wewe weka alevuthirwe. Nawe akyamkia hamwi na Ruva, handu hecha, na kandi niwe mghefuombea ifwe. 35 Niitho airima ifuvatha hena ifura lya Kristo? Vwasi, ilemewa, naifwi wa ni ngoo, kana njaa, kana ruhu kana hatari, kana ipanga? 36 Fundu kiandikiwe kwa faida yafwo mfwa waghwa mthaghari mthima fuletaririwetha igonji nlyatikwa ighechinjwa." 37 Hena findofi fyoshe ifwe fukelele vaghemkia hena we alefufurie. 38 Henaikyo nindemimanyi ku wala kifwa, nanga ikia, nanga malaika, nanga vumangi, nanga findofikeho nanga findo fichie, nanga nguju, 39 nanga fike kaghu nanga fike mbai nanga kindo kingi kyokyoshe kikairime ifufunya na ifura lya Ruva, ningewe Kristo Yesu Mndumi weru.