1 Hena ikyo kughire kyakuringilia iwe kuchihukumu, kwaku hena ghaya kukwa hukumu vengi kukwa kuingira kweka hena hukumu. Ang'u iwe kukwa hukumu kuchihira findo ifyo ifyo. 2 Mira fuichi ku hukumu ya Ruva ni ya keni kaghu yavo vahira findo fyo. 3 Mira iwe ririkana iki, iwe ngewe kukwa hukumu vaya vachihira findo fyo hamwi na ku na iwe kuchihira findo ifyo ifyo. Ngetha kwaepa hukumu ya Ruva? 4 Kana kukwadunganya kadu mnu kaghu ya vucha vwakwe, ichelewa ya adhabu yakwe na irimilia yakwe? Kana kuichi pfo ku vucha vwakwe vuwashighwa fumulotie hena toba? 5 Mira kwa kadiri ya vukuji wapfo na kwa ngoo yapfo uraghire toba vakuvikia voka akiba ya iding'a ya mfiri uya welihira idinga, yaani mfiri uya werughuliwa wa haki ya Ruva. 6 We amliha kila mndu kiringanyo kienene na mihiro yakwe: 7 hena vaya kwa idinda ya mihiro yavo micha vandeshigha nguma, shima na irakondeka, avanika ikia telele. 8 Mira hena vaya vakufurie voka, varachiichwa kweri mira vachihira makombero, iding'a ikai lichie. 9 Ruva aende msononeko na vwasi hena kila nafsi ya mndu wa mathanga ahirire fivichwa, ivoka kwa Myahudi na kwa Myunani nawe. 10 Mira nguma, shima na mborere fyacha kwa kila mndu ahira mihiro micha, ive kwa Myahudi na kwa Myunani nawe. 11 Angu kwa Ruva haghire upendeleo ho. 12 Kwa ku thafundu vengi vakothie bila sheria, na kole fundu vengi vakothie iivariana na sheria, valachilwa kwa sheria. 13 Angu thi vaghearania sheria vaghire kitea mothya ya Ruva, thereku ni vaya vachiivasia vatarirwa kitea. 14 Kwa ku vandu va Mathanga, ngevo varaghire sheria, vachihira kiki asili findo fya sheria, vo vandeva sheria kwa nafsi tavo, hamwi na ku vo vaghire sheria vo. 15 Hena iki vakyarora kumihiro ngeyo iyatarwa hena mujibu wa sheria fiandikiwe voshi ya ngoo tavo. Thamiri tavo nato titavareria vo, na maririkano ghavo vovoka ghachivalaha, kana ivaria vovoka 16 na kangi hena Ruva. Ifi vyafumia hena mfiri ngetho Ruva atihukumu mbitho ta vandu voshe, tha fundu na injili yakwa, kwa njia ya Yesu Kristo. 17 Fughambe ku kukwa kwiilagha iwe kweka Myahudi, amki hena sheria, kava ngululu kwa ikubaha hena Ruva, 18 fimanye fifurie fyakwe, na findo firafwene ne nafyo, baada yeagithwa ni sheria. 19 Na fughambe ku kughire nguju iwe kweka ku mrongori wa varachivona, kilanga wa vaya vake mmenyi, 20 msahihishaji wa mafire, mloshi wa vana, na ku kughire hena umanyi wa elimu na kweri. 21 Bathi iwe kuchibirikira vengi, ngetha kuchikulosha kweka pfo? Iwe kuchibirikira ithaiva, ngetha iwe kuchiiva? 22 Iwe kuchighamba kunashinda, ngetha kuchishinda? Iwe kuvihiriwe ni ngoma, ngetha kuchiiva hekalunyi? 23 Iwe kuchikubaha fundu fwa sheria, ngetha kuchimraghwisha Ruva hena ikonda sheria? 24 Kwa ku "rina ya Ruva linaraghwishwa kati ya vandu na mataifa kwa vundu vwenyu,'' savundu kiandikiwe. 25 Kwa maana Irinwa kweni kwafaa kole ukatimitha sheria, mira kole iwe kura mtimitha sheria, irinwa yapfo kwava ni ithairinwa. 26 Henaikyo kole mndu arariniwe endelea ivwara sheria, ngetha irarinwa kwakwe kuka tarwe tha ku ariniwe? 27 Na uya arariniwe kwa asili akakuhukumuwe kole sheria? Akyaivaria iki ni kwa ku kuure maandiko ghaandikiwe kwio ni urino mira bado ku mraivaria sheria! 28 Kwa ku we thi Myahudi afwenene kiyahudi kwa bwang'a; nanga irinwa thi liya ya bwanga du hena mwiri. 29 Mira we ni Myahudi wa voshi, na urino ni lwa ngoo, hena ngoo, thi hena maandiko. Nguma ya mndu wa namna yo ifumene yo na vandu thereku ifumie kwa Ruva.