1 Paulo, mndumi wa Yesu Kristo, aileghwe iva mrumwi, na akajimbikwa kwa mburi ya injili ya Ruva. 2 Injili ii niyo ileahidiwe kala iiria manabii vakwe hena maandiko maelie. 3 Ni ihuthu mwana wakwe, aleghiriwe ifuma lukolo lwa Davidi kwa jinsi ya mwiri. 4 We aletengethwe ifuma mwana wa Ruva kwa nguju ya mbeho mcha kwa ufufuo wa vaphie, Yesu Kristo Mndumi weru. 5 Iiria hena we fupokevie mbora na urumwi kwa iichwa ya miirikilie maghari ya vakaaminire voshe kwa mburi ya irina yakwe. 6 Maghari ya iva varaaminiye na imwe muileghwe muve va Yesu Kristo. 7 Barua i ni kwa voshe vake Rumi, vafuriwe ni Ruva, vaileghwe vave vandu vaelie. Mbora na ive kwenyu, na mborere ifuma kwa Ruva papa weru na Mndumi Yesu Kristo. 8 Luvaha, namshukuru Ruva wakwa hena Yesu Kristo kwa mburi yenyu voshe, ang'u miirikilie yenyu iyabirikivwa hena ithanga ithima. 9 Kwa liya Ruva shaidi wakwa, uya niamhirira kwa ngoo yakwa hena injili ya mwana wakwe, vundu niaendelea hena ivararera. 10 Mifiri yoshe nichiomba hena thala takwa ku kwa njia yoyoshe mwisho nipate ighira ifanikiwa kwa kikundire kya Ruva hena icha yenyu. 11 Hena icho nichue macha, imuvona nesa niivime imum kwa imwe fiugho mata vya ngoonyi, niivime ivadindija. 12 Mira naverelea inikwa ikuji ngoonyi ghamwe na imwe, kwa mburi ya miirikilie ya kila mmwi weru yenyu na yakwa. 13 Luvaha, vandughu, thashighanyi muvare imanya ku, kando kengi niku thudivie icho kwenyu, mira nndeleghewa mpaka ithanya. Nilekyashigha kwii netha gharire ndunda kwenyu vundu kikeho hata maghari ya vandu vya kiithanga. 14 Nalaviwa na Vayunani na vaghenyi navo, vakagharie na mafire. 15 Hena ikyo, kwa upande wakwa, niketayari itangatha injili kwenyu na imwe muke ipho Roma. 16 Hena ikyo thikavonienyi iraghwa injili, kwa ku ni nguju ya Ruva yeende ikirwa kwa kila airikilie, kwa Myahudi kwanza na kwa Myunani nawe. 17 Kwa liya haki ya Ruva idhihirishwe ifuma, miirikilie hata miirikilie, vundu kiandikiwe, "Mgheishi kwa haki aishi kwa miirikilie." 18 Hena ikyo iding'a ya Ruva lindemanyishwa iduma kaghu kwa Ruva vundu vwa ireka na wa fivichwa fyoshe fya vandu, ambovo kwa njia ya vuvichwa vukalele vachithughara keni ya Ruva. 19 Iki ni kwa liya, fyoshe fyairima imanyika vundu vwa Ruva firughukie kwavo. Kwaku Ruva andevamanyisha. 20 Ang'u mburi takwe tirachivonikana nicha, tindeva wazi tangia ivumbwa ya ithanga. Tichieleweka iiria findo fivumbiwe. Findofi ni nguju takwe ta telele na asili ya Ruva. Matokeo ghakwe, vanduva vyaghirevo udhuru. 21 Iki ni kwa liya, ingawaje valeichi ihusu Ruva, valechimheshimuvo tha Ruva, wala valechimnikavo shukrani, badala yakwe vandeva vapumbavu hena madunganyo ghavo, na ngoo tavo tighire ieta, tivikiriwe mma. 22 Valekuileghe ku vakagha vie, mira vakava mafire. 23 Valeubadilishire utukufu wa Ruva araghire vuvichwa kwa mfano wa sura ya binadamu aghire uharibifu, na ya ndeghe, ya vanyama maghire marende ana, na ya fiumbe fyabulutika. 24 Hena ikyo Ruva alevalekie vaivarie tamaa ta ngoo tavo la uchafu, kwa miiri yavo ifedheheshwe baina yavo. 25 Nivo vaghalutire keni ya Ruva mongo, na kangi valechitatha na ihirira fiumbe badala ya mgherumba, astahiliye isifiwa telele. Amina. 26 Kwa mburii, Ruva alelekie vaivarie tamaa tavo ta iraghwa kwa liya vaka vavo valebadilishire matumithi ghavo gha asili kwa kya kike kibanga na asili. 27 Kuyo kuyo, vandu va kika, na iakwa tamaa kati yavo voka, iva ni lee vandu vakiumi valechihira na wandu va kiumwi vavee firavatarire, kangi valepokerie adhabu ifwenene na vuvichwa vwavo. 28 Kwa ku valemleghie Ruva hena madunganyo ghavo, alevalekie vaivarie kariongo thavo tiravie, vahive findo firafaie. 29 Waichurwe ni fivichwa fyoshe, tamaa, vaichurwe ni funu, ivwagha, ilwa, ilemba, na dhamiri mbichwa. 30 Vaya navo ni vaghelinganya, vaghelembetera, na vaghemchukiwa Ruva vaghire vurugu, kiburi na ikukwera. Voni vaghetunga fivichwa kangi varachivaichwa vathima vavo. 31 Vaghirevo madunganyo, varachi chiaminika, varaghire ifura ya asili, na varaghire huruma. 32 Vaeleriwe kanuni tha Ruva, ku vandu vaghehira findo fya mbareyo vakyastahili kiphwa. Mira thiku du vakyahira mambo gho, kangi vakyairikiana na vaghehira mambo gho.