Sura ya 12

1 Hena icho namutereva vandughu, kwa huhruma tha Ruva, ifunyenyi miiri yenyu ive itathi likirie, lielie, liivikiliwe kwa Ruva, ili niyo mtatho wenyu ughire maana. 2 Wala munaivaria namna ya ithangali, mira mughalutire kwa ihirwa vushaa nia tenyu, hirenyi kwihi muirime imanya kikundire kya Ruva kicha, kyemndu litha na kikamilifu. 3 Luvaha narera, kwa mburi ya mbora niinikiwe, ku kila mndu ake maghari yenyu akyapaswawe ifikiri nicha vundu vwakwe ikela vundu akyashighwa idunganya. Mira, kimvaie idunganya kwa hekima, sa vandu Ruva ammkie kila umwi kivinganya kilive cha miirikilie. 4 Kwa ku fughire marungo mengi, hena mwiri umwi, mira si fyoshefo vighire ndima imwi. 5 Hena kuyo, ifwe fuke vengi, fu mwiri umwi hena Kristo, na viungo kila umwi kwa uravee. 6 Fughire fipawa fitofutiene kwa kadiri ya mbora funikiwe, kole kipawa kya mndu ni unabii, na kihirike kwa kadiri ya miirikilie yakwe. 7 Kole kipawa kya mndu ni huduma na itumike, kole ungi aghire kipawa kyefundisha, bathi afundishe. 8 Kole kipawa cha mndu ni ifariji bathi afariji. Kole kipawa cha mndu ni ifunya, aghire kuyo kwa ukarimu. Kole kipawa kya mndu ni iongotha, na kitendeke kwa uaminifu. Kole karama ya mndu ni hena irora huruma, na ihirike kwa ifura. 9 Ifura linaghira na ikombere. Chukiwenyi kivichwa, vwarilienyi ficha. 10 Ihuthu ifura ya kindughu, furanenyi imwe mweka. Ihuthu heshima heshimianenyi mweka. 11 Ihuthu bidii, munava valethi, ihuthu mbeho ghirenyi hamu, ihuthu Mndumi, mhirirenyi. 12 Furahinyi hena ujasiri muughire ihuthu mifiri ichie. Mughire uvumilivu hena mavwathi ghenyu. Muthike hena iomba. 13 Mushiriki hena mahitaji gha vaumini. Shighenyi njia nyingi terora ukarimu. 14 Vyashighienyi ibarikiwa voshe vakyamurisha vwasi, muvabariki wala munavareghea laana. 15 Furahiwenyi hami na vaghefurahiwa fughenyi na vaghefugha. 16 Mughire nia imwi imwe mweka munadunganya kwa ikukwera mira vaivikienyi vandu vya hali yambai, munaghira fiugho kaghu ya madunganyo ghenyu mweka. 17 Munamliha mndu yeyoshe kivichwa kwa kivichwa. Hirenyi findo ficha mithonyi kwa vandu voshe. 18 Kole kyairimika, vundu kivikiwe kwenyu mughire mborere na vandu voshe. 19 Vapenzi, munalihira kisasi mweka, mira pishenyi iding'a ya Ruva, kwa liya kiandikiwe, kisasi ni kyakwa, inyi naliha, arerie Ruva." 20 Mira kole mnzo wapho ana njaa, umlishe, akaichwa laka, umnyweshe, kwa kuu ukahira kuyo, kwampalia makaa gha movo kaghu ya mrwe wakwe.'' 21 Kunakelwa ni vuvichwa, mira ukele kivichwa kwa vucha.