Sura ya 7

1 Kileke kwii ku Melkizedeki, mangi a Salemu, kuhani wa Ruva wa kaghu alethengene na Abrahamu akifuma ighevwagha va mangi na embariki. 2 Abrahamu alemnikie ifungu ya ikumi ya vindo fyoshe alefitekie. Irina yakwe "Melkizedeki" mana yakwe ni "mangi wa haki" kangi "mangi wa Salemu" mana yakwe ni "mangi wa mborere." 3 Aghire ndiewe, aghire maewe, aghire vamghiri ewe wala aghire mwanzo nanga mwisho wa maisha yakwe. Badala yakwe areghue ku ni kuhani wa telele tha mwana wa Ruva. 4 Luvaha ririkana fundu mndu u nighe mrwe. Mghefughira weru Abrahamu alemnikie ifungu ya ikumi ya findo ficha alefiondorie hena fira. 5 Na kididi mbare ya valawi valeghuhirie ofithi yo ya vukuhani valeghire amri ifumie hena sheria yevunganya ifungu ya ikumi ifuma kwa vandu ambavo ni Vaisraeli vyarwee hamwii naku navo ni mbare ya Abrahamu. 6 Mira Melkizedeki, therele wa mbare ifumie kwa Valawi, aleghuhirie ifungu ya ikumi ifuma kwa Abrahamu, na embariki ngewe aleghire ahadi. 7 Iho kyaleghwakyo ku mndu mdu achibarikiwa ni mrwe. 8 Kwa mburi ii mndu akyaghuhia ifungu ya ikumi hana mfiri apfwa mira kwa ughongo lungi mndu alenikiwe ifungu ya ikumi ni Abrahamu kyeelethwa ku aekei. 9 Kwa fundu mgayo ukei ni ku Lawi alenikiwe ifungu ya ikumi, pia nawe alifunyire ifungu ya ikumi kwa Abrahamu, 10 kwa ku Lawi aleke hena viti vya ndie Abrahamu igheri Melkizedeki alethengene na Abrahamu. 11 Luvaha kole ukamilifu luleirimikie iiria ukuhani lwa Lawi, (hena ikyo thinyi yakwe vandu vachighuhia sheria), haleghire haja njikihe kwa kuhani ungi baada ya ukuhani uya wa Melkizedeki, na thi iilaghwayo baada ya mpango uya wa Haruni? 12 Hena ikyo vukuhani vukighaluka na sheria nayo ni lathima ighaluke. 13 Kwa umwi ambaye findo vilekeriwe ihuthu ikabila lingi, ifuma kwakwe haghireho alehudumie hena mathababu. 14 Luvaha ni wathi ku mfumwa weru alefumie hena Yuda, mbare eyo Musa araleirerie hena makuhani. 15 Na ifi fuarera ni wathi ku kuhani ungi afumia kwa mfano uya wa Melkizedeki. 16 Kuhani u msha thi uya andeva kuhani hena mthingi wa sheria tiahuthu mbare ya mndu, mira ni mthingi wa nguju ya maisha gharairima ikondeka. 17 Hena ikyo maandiko ghakyashuhudia imhuthu we: "Iwe ku kuhani telele baada ya uya wa Melkizedeki." 18 Kwa ku amri ilethongorie ilevikiwe mbarinyi vundu vywa ku ileghire ngujuyo, na ilechiva yo. 19 Hena ikyo sheria yo ilehirire kyokyoshe kikamilikieyo mira haleghire ujathiri mcha na henatho fulechimu ivaria Ruva mpaka havwihi. 20 Na ujathirilo mcha lulefumirie lo bila igayiya kiapo, hena ili makuhani vengi valeondorie kiapo kyokyoshevo. 21 Mira Ruva aleravie akirera imhuthu Yesu, "Mfumwa anderava ku akaghalute mawatho ghakwe we ku iwe ku kuhani telele." 22 Hena ili Yesu kangi achie igheva thamana ya ipatano icha. 23 Kwa hakika kipfwa kichiringilia makuhani ikaa telele. Ii niyo thababu ku makuhani vengi, umwi baada ya ungi valechie. 24 Mira kwaku Yesu we achi ishi telele lee, vukuhani vwakwe vuchighalukalo. 25 Hena ikyo we pia airima ikamilisha pere ivakira vaya vakyamuivaria Ruva hena we, kwaku we achi ishi telele na ilomba vundu vwavo. 26 Hena ikyo fuashighwa fughire kuhani wa mbare ii. Araghire nzune, aelie, avikiwe kua na vaghire nzune na ake kaghu ikela ipfo kaghu. 27 We aleghire haja we tha makuhani varwe ku kila mfiri afunye itathi kwanza ya nzune takwe weka niho anafunye itathi ya nzune ta vandu. Alehirire kyo kamwi du kwa voshe akinakufunye we weka. 28 Kwa sheria vachithaghuliwa vandu vyashokere iva makuhani varwe, mira kwa kirero kya kiravo kilechie baada ya sheria alemthaghurie mrana alefanyirwe iva akamilikie telele.