Sura ya 5

1 Fuichi ku kole kenyi yeru ya ithangenyi furue iyakondwa, fughire nyumba ingi ifuma kwa Ruva. Ni nyumba ira chembiwe ni mavoko gha vandu, mira ni nyumba ya telele hena Ruva. 2 Kwa ku hena ifuru lii fuchivaviwa, futamani ku futikwe hena kenyi yeru ipfho kaghu. 3 Fuaitamani ang'u fukamiingia pfho fwavonekana fwehe ku fuke ruhu. 4 Kididi wakati fuke hena ifuruli lee, fualwa na ifwelewa. Fuashigha ifunywa fwe mira fuashigha irawa, kimetha kia kilepfwie kiirime imirwa ni ngalamo. 5 Alefuandalirie ifwe kindokyo ni Ruva, ewe afunikie Mbeho tha ahadi ya kia kiacha. 6 Hena ikyo mughire ujathiri mifiri yoshe. Mulolie ku wakati fuke kenyi hena mwiri, fuke kua na mfumwa. 7 Kwaku fuaghenda kwa muitikijo thi kwa ivona yo. Hena ikyo fughire ujathiri. 8 Ni keba fuve kua ifuma hena mwiri na kenyi hamwi na mfumwa. 9 Hena ikyo fuavika ilengo yeru ku kole fuke kenyi kana kua, funulie kwakwe. 10 Kwa ku ni lathima voshe fwake mothia ya kipfhumbi kyenyanyiria kya Kristo kimetha ku kila umwi airime ighuia kia kimvaie kwa findo afihirire hena mwiri, kole ni ficha kana fivichwa. 11 Hena ikyo kwa ikimanya kiovosha kya mfumwa fuavashawishi vandu. Fundu fukei kivonikane wathi kwa Ruva. Niatumaini ku kiaeleweka hena ngoo tenyu. 12 Fuagherahe fwe imushawishi ku fu vandu va keni. Badala yakwe fuamunika imwe thababu yekubaha vundu veru, kimetha muirime ivajibu vaya vyakyakubahia ivonekana ya bbwang'a badala ya kia kike voshi ya ngoo. 13 Kwa ku kole funderukwa ni akili lee ni vundu vywa Ruva. Na kole fughire akili teru timamu ni kwa ajili yenyu. 14 Kwaku lukundo lwa Kristo luafushurutisha kwaku fughire uhakika lu ku mndu umwi alepfhwie fundu fwa voshe na hena ikyo voshe vapfhwie. 15 Na Kristo alipfhie fundu fwa voshe kimetha ku vaya vakyaishi vanaishihe fundu vavo voka badala yakwe vaishi fundu fwa uya alephfwie na akavutwa. 16 Hena kwio idungia luvaha na iendelea fuamhukumu mndu kwa ilolea kibinadamu fwe, ingawa iho kuvoka fulechi mlolea Kristo kikwio. Mira luvaha fuchimhukumu mndu kikwiohe fhwe. 17 Hena ikyo kole mndu ake voshi ya Kristo, we ni kiumbe kihya. Findo vya kala findeira, lolea findeva fihya. 18 Findo fyoshe fi fifumie kwa Ruva. Alefupatanishire ifwe nawe weka iiria Kristo, na afunikie huduma yepatanisha. 19 Kwio ni ighamba hena Kristo Ruva alelipatanishire ithanga nawe weka na thi ivatarira mateshanyo ghavo vo. Andevika kweru mburi yo yepatanisha. 20 Hena ikyo fundethaghuliwa tha vawakilishi va Kristo tha ku Ruva akyahira rufaa yakwe iiria ifwe. Fuamulomba imwe fundu fwa Kristo: "Mupatanishwe kwa Ruva!" 21 Alemfanyire Kristo ave itathi fundu fwa thambi teru. We niwe aralehirire thambi. Alehirire kwio kimetha fuirime iva haki ya Ruva hena we.