Sura ya 4

1 Hena ikyo vambwie, fufwamuvikia ikuji na imutereva kwa Yesu Kristo. Tha fundu mghuhirie vundu fumuvorere vundu kyamutara ighenda na imnulitha Ruva, mughendie njia yo na ihira kicha ikela. 2 Kwa ku muichi ku ni findo fiki fumurorere iiria Mndumi Yesu. 3 Kwa ku ifi nifyo Ruva afurie: ieleshwa yenyu iku mulekane na shinde, 4 iku kila umwi wenyu aichi vundu aikaa na mka wakwe weka ne iela nashima. 5 Kunaghira mka vundu vwa ngina ya mwiri (tha vamathanga varamuichi Ruva). 6 Hanaghira mndu aghekela mwaka akamkothea wavo hena kindo ki. Ang'u Mndumi niwe achivwighiria mndu hena findo fi fyoshe, the fundu fulethongorie imukanya na imuvililia. 7 Ang'u Mndumi afuilaghirie uchafu we mira hena iela. 8 Hena ikyo itho akyalegha kindo ki akyalegha mndu we, mira akyamlegha kuva achimunika mbeho mcha. 9 Hena mburi yefunana kivumbwie haghireho haja ya mndu wowoshe ikhandikia, ang'u mufundishirwe ni Ruva ifurana imwe kwa imwe. 10 Keni, mlehirire fyoshefi kwa vambwie va Makedonia yoshe, mira fufwamutereva vambwie muhire na ikela. 11 Fufwamutereva mughire macha gheishi miikalie ya vumboa, mjali ndima tdhenyu, na ihira ndima kwa mavoko ghenyu, tha fundu fulemuamarie. 12 Hira findofi netha uirime ighenda nicha na kwa heshima hena vaya vakebwang'a ya mwitikijo netha kunaduikiwa ni kindo kyokyoshe. 13 Fufwashighafwe iku imwe muelewe there fo vambwie veru hena mburi ya ivo valee netha munachephifwa ngoo tha vengi varaghire hakika ya igheri lichie. 14 Kole miirikilie yeru ni ku Yesu aphwie na kangi akaruka, ni kwio Ruva achevaende voshe hamwi na Yesu, ivo valee hena kiphwa kwakwe. 15 Fundu fwa ifyo fufwamuvia imwe kwa kirero kya Mndumi, iku ifwe fukei na fwaghekolewa igheri Mndumi akichecha, keni yoshe fwachevathongolea fwe vaya vathongorie ilaa hena kiphwa. 16 Kwa ku Mndumi weka acheghara ifume ipfo kaghu. Achecha na irwi irwe, hamwi na irwi ya malaika mrwe, hamwi na igunda ya Ruvu, na vaya valephwie hena Kristo vathongoa ifuma hena ngoma. 17 Na ifwe fuke na moo, fureghiwe fwachethangania mailwinyi imghuhia Mndumi ipfo kaghu. Kwa njia ifwacheva na Mndumi mifiri yoshe. 18 Hena ikyo, vikianenyi mrwe imwe kwa imwe kwa firero fi.