Sura ya 3

1 Kwa irira lyi imwe vaka mmwashighwa mukuingire kwa vomi venyu mweka, hata kole vengi venyu varanawara kirero, liria mighendie yavaka vavo vairima ighomoghwa, haraghire kirero, 2 heikyo vovoka vava vande vona mighendie yenyu micha namwi na iovohwa. 3 Iki kihirikethi kwa maambo gha bwang'a isuka njwii, vito vya dhahabu nguvo thinulirie. 4 Heikyo kihirike hena mndu wa voshi vwa ngoo, na ikela hena vucha vwe muovoha Ruva. 5 Kwakuvaka vaelesherwe valeku pambie kwa kiavia ki. Valaghire miirikilie hena Ruva na waichwavoni vavo voka. 6 Kwa vunduvu Sara akamwiichwa Abrahamu na imwiilagha "mmi" wakwe. Imwe luvaha muvana vakwe kole mukahira ficha, na kole muraovohe fivichwa. 7 Heikyo naimwe voni mmwashighwa muikae na vaka venyu mukimanya ku vovaghire ngujuvo, mukivamanya vo kunithavaghenikwa thawadi yekia telele na telele. Hirenyi kwii netha itereva lyenyu lyinaleghwa. 8 Na luvaha imwe voshe, muve kindo kimwi, mughire mbonea, ifura na weru vahoo, na vaghethia. 9 Munaliha kivichwa kwa kivichwa, iimbilia kwa iimbilia. Ughongo lwakwe murime ireraficha kwalia muleileghwe kimacha mwiirime ivona ficha. 10 "Wia afurie ivona kicha naivona mfiri mcha imithari aringilie ulimi lwake kwafivichwa na myumu yakwe irera fivichwa. 11 Na aghaluke naileka fivichwa na ihira findo ficha. Ashighe mborere naiivaria. 12 Mitho gha Mrumi ghachivona mndu mcha na marwi ghake ghachiichwa itereva lyakwe. Mira kyamu kya Mrumi kike ughongo kwa vaghehira fivichwa." 13 Niitho airima imuvika uvichwa imwe, kole mmwashigha fia ficha? 14 Mira kole mukaya vwasi kwaficha, mwavona mborere. Munaovoha fia vo vakyafiovoha. Munaghira mineko neko. 15 Mira mumvike Kristo Mrumi hena ngoo yenye tha vaelesherwe. Kila mfiri muve tayari imjibu kila mndu, akyamuvetha imwe haniiki mughire ikuji kwa Ruva. Hirenyi kwii kwa vumboa na vucha. 16 Mughire findo ficha netha vandu vachikonda miikalie yenyu micha hena Kristo vairime irawa kwalia mvarera kinyume kyenyu ku mulechihira fivichwa. 17 Nikicha mnu kole Ruva akyashigha ku kumwaya vwasi kwa ihira ficha, ileka kwa ihira fivichwa. 18 Kristo alighie vwasi kando kamwi vundu vwa thambi. We arahirire fivichwa alighie vwasi kwa vundu vweru, ifwe furaleghire ficha, kimacha afuende kwa Ruva. Alefwie hena mwiri mira alevikiwe iva mrwe hena mbeho mcha. 19 Hena ngoo aleghendie ighebirikira ngoo thike hena kifwungo. 20 Thileghire lirania the irimilia Ruva igheri lyevera Nuhu, kigheri kyeagha ibweta, na Ruva ale kirire vachache ngoo mnane. Ifuma hena Mringa. 21 Ili ni alama ya upatizo uwamukira imwe luvaha, thithaithambaikwe ifuma mwirinyi, mira nitha itereva kindo kicha kwa Ruva, iiria ufufuo wa Yesu Kristo. 22 We ake kuvokwa kwa kumndumi kwa Ruva. Aleghendie kaghu kwa Ruva. Malaika, vumangi na nguju vimithari fimwiaranie we.