Sura ya 2

1 Hena ikyo vikenyi batenyi vuvichwa voshe, vulembi, kingua, funu na kashfa. 2 Mughire kulu ka mariva mecha gha ngoo tha vana vadu kimacha muirime ilehea voshi na ikirwa, 3 kole muthaghie ku Mndumi ni mcha. 4 Nnjonyi kwakwe ngewe ighwe likei ngeyo lindedahiwe ni vandu, mira undethombowa ni Ruva na ni ya vughuvi vurwe kwakwe. 5 Na imwe mu tha mawe ghakei ghakyaaghiwa kaghu ghave nyumba ya kimbeho, kimacha live itathi lielie lichifunya itathi ya ngoo yairikiwa ni Ruva iiria hena Yasu Kristo. 6 Kirero kikyaghamba kwii, "Lambua, nivikie hena Sayuni ighwe ya pembenyi, irwe na lithaghuriwe na ya vughuri wowoshe airikirie hena we akavone we iraghwa". 7 Henaikyo shima ni yenyu imwe muirikirie. Mira, "ighwe lidaiwe ni vagheagha, ili niyo lindeva ighwe irwe ya pembenyi"- 8 na, "niyo ighwe ye kutuna na mshararabwe we kutuna." Navovakikutuna vakileghie kirero, hena kia ngekyo valethomboloriwe kwayo. 9 Mira imwe mu mbare ithomboriwe, vaghetatha va kimangi, mbare ielesherwe, vandu va ibumba ya Ruva, kimacha muirime ighamba mihiro ya kirumo ya uya amuilaghie ifuma mmenyi muche hena kilanga kyakwe kya kirumo. 10 Imwe kuvoka mule vandu mwe, mira luvaha imwe ndeva vandu va Ruva. Imwe mulehughirie mwe mbonea, mira luvaha mundeghuhia mbonea. 11 Vambwie, nimuileghetha vaghenyi na vaghebung'a bung'a mukikuima ifuma hena ngwina mbichwa ta thambi, ngeto titakavana fira hena ngoo tenyu. 12 Mmwashighwa mughire miikalie micha hena vamathanga, kimacha, kole vamurera ku muhirire findo fivichwa, vakitilambue ndima tenyu njicha na vamtogola Ruva hena mifiri wakwe wecha. 13 Kuvikenyi thinyi ya vaghire nguju vundu vwa Mndumi, kwaku niwe mangi mrwe, 14 Kwaku vaghererea ithanga varumiwe ishasha vahirire fivichwa ivatumbisha vaya vahirire ficha. 15 Kwaku ni fundu Ruva afurie ku hena ihiva kicha mufunge virero vya vandu vaetie na mafire. 16 Kwaku mu randu vake huru, munaondoa uhuru lwenyu lukava mtiru wethughana vuvichwa vyenyu, mira muve vahiri ndima vecha va Ruva. 17 Heshimunyi vandu voshe. Furenyi ndughu. Ovohenyi Ruva. Mheshimuni mangi. 18 Vathoro, vairikienyi vadhuri venyu kwa shima toshe, nanga thi vadhuri vecha na vahoodu mira na vaya ngevavichwa. 19 Kwaku ni matumbi hena wowoshe arimilia mifiri akyaya vwasi kiramvaie vundu vwa ikudua yakwe kwa Ruva. 20 Haghire faida njiki kole mndu ahira thambi kunu aendelee inyanyirwa? Mira kole muhirire ficha nikyo mukalithwa vwasi na inyanyirwa, igha ni matumbi mecha hena Ruva. 21 Hena iki muleileghwe ang'u Kristo nawe alenyanyiriwe fundu fwenyu, amureghelie fwanyanyi vundu vwenyu muivasie marioko ghakwe. 22 Ahirire thambi we, nesi avonirwe akyalemba ifuma hena mumu wakwe we. 23 Igheni akyaimbiliwa, we aravwighirie we iimbilia, akinyanyarwa,araovoshe mira akakufunya we weka kwa mchili wa kitea. 24 Akurukie thambi teru we weka hena mwiri wakwe hena mthalaba, kimacha funatarwa he hena thambi na ku fuikae hena kitea. Hena ikavwa yakwe imwe mundekia. 25 Voshe mulekyabung'abung'a tha magonji gharekie, mira luvaha mundevwia kwa mgheria ngoo tenyu.