1 Petro, mthoro wa Yesu Kristo, kwa vaghenyi varekene, kwa vateule Ponto yoshe, Galatia, Kapadokia, Asia, na Bithinia, 2 ifumana naimanya ya Ruva, Papa, kwa ieleshwa ni mbeho mcha kwa utiifu wa Yesu Kristo na kwa inyunyiriwa ndhakame yakwe, mbonea iikae kwenyu na mborere yenyu iongereke. 3 Ruva Papa wa mudumi weru Yesu Kristo na abarikiwe hena vumwe na mbonea yakwe, 4 kwa urithi urakuangamie ukaghireho ichafuka kana ipungua uthughenwe ipho kaghu vundu vywenyu. 5 Kwa uguju tha Ruva mwariwa hena miikalie yenyu yemukira nayo ike tayari itambarurwa hena luva lwa mwisho. 6 Niiliwenyi hena iki, mira luvaha ni lathima kwenyu mukuichwe uvichwa hena mighesho ya aina uyingi. 7 Iki, ni kwa kuya miirikie yenyu iirime igheshwa, miirikie ngevo ni ya vughusi ikela dhahabu, nayo ichisekea hena moro uchighesha miikalie yenyu. Ifi fifumirie kimecha miirikie yenyu heshima hena manukuro gha Yesu Kristo. 8 Munamvona mwe weka, mira mumfusie, mumvovuhiwe luvaha mira miirikie yenyu ni hena, we kangi mughise inuliwa lirairima ighambika iichuvwe ngazo. 9 Luvaha mwapokea mweka matokeo ya miisikie yenyu ikiswa ya nafsi tenyu. 10 Manabii valeshighie na iulitha nicha ihusu mwisikio uu, ihusu mbosa amvayo igheva yenyu. 11 Valeshighia imanya ni aina njiki ya mwisikio waghecha. Washighie pia ni rufisi ruki mbeho wa Kristo akevoshi yavo alechirera iki navo. Iki kilechifumia ighesi alechivavia kuvuka ihusu iteswa ya Kristo na ngazo iya yaghamwivasia. 12 Manabii valefunuliviwe imanya ku vachihisira mambo gho, na ifwe kwa ajili yavo voka, mira kwa ajili yavo migaiwe ya findofi iisia vaya vagheende injili kweru kwa njia ya mbeho mcha alerumiwe ifuma kaghu kaghu, findo hata malaika vachitamani vifunuliwe kwakwe. 13 Hena icho phungenyi fiti vya kasiongo tenyu. Mutulie hene madunganyo ghenyu. Mughire ngufu tikamilikie hena neema ghagheendwe kwenyu mfisi wefunuliwa Yesu Kristo. 14 Tha vana vatiifu, munaphungwa ni madunganyo ghaya mulechighaivasia mifisi iya mura leghire imanya. 15 Mira vundu uya afuilaghe aelee na ifwe fuve fuelie hene tabia teru toshe maishani. 16 Kwa ku kiandikiwe, "Elenyi kwa kua na myi rielie. 17 Na mikailagha Papa uya anyamasie kwa kitea akifwananisha na ndima ya kila mtu, tumia maghe gha ndambo yapho hena ikuduisha. 18 Miuchi ku kivie kwa matundu au dhahabu - findo fichikondeka, mira mukisirwe ifuma hena miikalie yenyu na ieta liya mulejifunzire ifuma kwa vandio venyu. 19 Mira fukirirwe kwa ndhakame ya heshima ya Kristo, sa ya gonji liraghise ikombese wala ibashi. 20 Kristo alesaghusiwe kabla ya misingi ya ithanga, mira mifisi iya mwisho afunuliriwe kwenyu. 21 Muchimwisikilia Ruva iiria hena we, ngewe Ruva amfufusie ifuma hena ngoma ne ngewe alemnikie ngatho kimecha miisikelie yenyu na nguju tive hena Ruva. 22 Mundehisa nafsi tenyu tikaela hena iirikia kwesi, nikyo kirumie ifura ya kindughu ligholikie, hena icho furanenyi kwa bidii ifuma ngoonyi. 23 Mundemghiswa ka kavi, si kwa rubeghu yekondeka, iisia hena ngiyu na kiseso kya Ruva kireghue. 24 Kwa liya miisi yoshe ni tha masa, na ngatha yakwe yoshe ni tha iova yahena ivingo. Ivingo lichinyasuka na iova lichipupundika, 25 mira kirero kya Ruva kichiikaa telele.'' Ii ni mbusi iya iletengedhwe tha injili kwenyu.