1 Ihuthu mburi munji andikiriye: Haghire igheri lingi ni icha mru wa kyumi analaa na mka wakwe. 2 Mira kwa fundu vya mighesho mingi uchafu kila mru wakyumi aghire mka wakwe weka na kila mvu wa kika aghire mmi wakwe. 3 Mmi aashighwa amnike mka haki yakwe ya ndoa, na kwiyo kwiyo mka na kwa mmi wakwe. 4 Thi mka we aghire imkia mwiri wakwe, ni mume. Na kwiyo kwiyo, mmi nawe aghirewe mamlaka ghemkia mwiri wakwe, nimka aghire. 5 Munaimana mukilaa hamwi, thari kole mupangie kwa igheri maalum. Bhikenyi kwiyo kimacha mupate igheri ye terebha. Kangi mwairima ibwiliana he hamwi, kimacha mbhichwa anaghe cha akamughera kwa ibhura igheri. 6 Mirakyo ni rera mburiti kwa ifura thi lathimishirenyi. 7 Nighefura kila umwi aghebhiye tha inyi fundu nikei. Mirakyo kila umwi aghire karama yakwe ifuma kwa Rubha. Iu aghire karama ii, na uya ana karama iya. 8 Kwa bharana ondoghwa na bhapfwiriwe ni bhomi niya rera iku, nikicha kwabho kole bhakalegha bila yeondoghwa, tha fundu nikei inyi. 9 Mirakyo kole arakiirima irimiliya, bhakibhashighawa bhaondogwe, kwa lia ni keba kwabho iondoghwa kuliko ighira tamaa. 10 Lubhaha kwabhaya bhaondoriwe iyashighwa ni amri, thi nyinyi mira ni Rubha. "Mka analekana na mmi wakwe." 11 Mirakyo kole aikaa kua na mmi, areghwe kwiyo bila iondoghowa, kana kibhungi, abhwiliane na mmi wakwe. Na "Mmi ananika mka wakwe talaka." 12 Mirakyo bhareghiwe, myarera- inyi, thi Rubhawe- iku kolewenyu umwi wowoshe aghire mka ara amini na aarithika iikaa nawe ikyashighwa anamleka. 13 Kole mruwa kika aghire mmi araamini, na kole arithikieje iikea kawe, anamleka. 14 Kwa mmi araaminiye aeloshwa kwathababu ya imani ya mka wakwe. Na mru araamini aeleshwa kwa bhundu bhwa mme aamini. Kibhungi bhana bhenyu bhagucha bhaeliyebho, mirakyo kwakweri bhaelesherwe. 15 Mira uroo arakyaamini akabhuka naabhuke. Bhundu bhwa mburi yo, kaka na lumbwiye akiya pfungwawe ni fiapo fyabho. Rubha afuileghe fuikae kwa amani. 16 Kwa manya kwiyaiku mru mka, yairima amkire mmi wakwe? Kana kwa manya kurya iku, mru wakyuma yairima umkire mka mkawapfwo? 17 Kila umwi du aishi maisha tha Rubha afughabhiriye, kila umwi thafundu Rubha amuileghe bho. Iu ni mwongotho wakwa hena makanitha ghoshe. 18 Haghire agheriniwe akinailaghwe iirikia? Anaghera ibhuta alama ye rinwa yakwe. Haghire wowoshe aileghwe hena miirikiliye? arana rinwa? lyashigha heyo arinwe. 19 Kwa ili achembiwe kana achembiwewe haghireho mburi. Kighire mburi niibwara maagitho gha Rubha. 20 Kila umwi areghwe hena iilagwa akinailaghwe ni Rubha imirikiliye. 21 Kughemtumwa kigheri Rubha akinakuilaghe? kunathara ihuthu. Mirakyo kole kwairima ibha huru bhika kwiyo. 22 Kwa umwi aileghwe ni Rubha tha mtumwa ni mru there mtumwa hena Rubha. Thalia umwi ake huru akina ilaghwe imanya ni mtumwa wa Kristo. 23 Mwemghuliwa kwa beinjirwe, kivyo nunabha bhatumwa bha bhanadamu. 24 Bheru bhakika na bhakyumi hena maisha ghoghoshe kila umwi weru fukina ilaghwe hena miirikilie fureghwe bwiya bhwiya. 25 Lubhaha, bhaya bhoshe bharana ondoa toona indi thighire nyi iamoro ifuma kwa Rubha. Mirakyo niamunika irunge yakwa fundu ni kei. 26 Kwa mbathi tarubha tiaminikie. Henaikyo niyafikiria kwiyo bhundu bhethumbuka, ni keba mru wa kyumi areghwe fundu akei. 27 Kupfungiwe ni mru wa kika kwa kiapo kya ndoa? Kuna shigha uhuru ifuma hena ikyo. Kughire uhuru ifuma kwa mka kana kunaondogwaphfwo? Kunakasha mka. 28 Mirakyo kole ukaondoa, kuhirire ndhune pfho. Na kole mvu mka arana ondoghwa akaondoghwa, aghi thire ndhune we. Bado bhaya bhabhoni mabhwathi gha mbare nyingi. Nanyi nikyashigha ninufuvyekwa gho. 29 Mira niyarera kwii, bhandu na bhalumbwie bhakwa, igheri iwihi. Tangia ithanya na iendelea, bhayabhaghire bhaka bhaikae thabhara ghire. 30 Bhoshe bhaghire mneko neko, bhakubhikie tha bharaghire mnekoneko, na bhoshe bhachue kicha, bhaghechue kichabho, na bhoshe bhaaghua kindo kyokyoshe tha bharanulikie. 31 Na bhoshe bhakibhashughulikia ithanga, bhabhetha bharashughulikie nabho. Kwa lia mitindo ya ithanga inafika mwisho wakwe. 32 Nikina shigha mubhe huru kwa ithumbuka ipshe. Mruwa kyumi araondorie aukuingira, hena findo fiyamhuthu Rubha, fundu anuliwa weweka. 33 Mirakyo mru wa kyumi aondorie achikuthanganya na mburi ta ithanga, findu anulitha mka wakwe. 34 Aghabhikie mru mka arakiya ondoghwa kana bikira achikubhwa na nitha findo fia mhuthu Rubha, namna yekubhika ugho ongo hena mwiri na hena ngoo. Mirakyo mru mka aondoriwe achikuingira hena findo fya mathanga, namna yemfanya mmi aichuwe kicha. 35 Niyarera kwii kwa faida yenyu mweka, na thiyabhikanyi mdegho kwenyu. Niyarera kwii kwa lia ni haki kimacha mirime iku bhika wakfu kwa Rubha bila kikwatho kyokyoshe. 36 Mirakyo kole mru akiya fikiri akairimewe imhirira kwa heshima mwali wakwe, henaikyo maririka no ghakwe ghaghire nguju mnuleka aondoane nawe tha fundu afurie. Si thambiyo. 37 Mirakyo kole andehira maamuthi ghabhura ondoa, na haghire haja ya lathima, na kole airima itawala kulu kwakwe, ahira kicha kole arakya muondoa. 38 Henaikyo amwondoa mrumpfhu wakwe ahirire kindo kicha na wowoshe uya akyathaghua ibhura ondoa aahira kicha ikela. 39 Mka apfhungiwe ni mru wa kyumi igheri akei. Mirakyo kole mmi akapfwa ake huru iondo ghwa ni mru wowoshe amfuriye, mirakyo kwa Rubha du. 40 Bado hena maamuthi ghakwa ighira iichwa kicha ikela tha akii kaa tha fundu akei. Na niya ririkana iku nanyi nieghire ngoo ya Rubha.