Sura ya 10

1 Imwe veru na valumbwia vakwa nnashigha ku mumanye ku papa veru valeke thinyi ya ilwi na voshe nairilie hena bahari. 2 Voshe vapatithirwe vave va Musa voshi ya ilwi na voshi ya bahari, 3 na voshe walighie kijo kiakia kya mbeho. 4 Voshe vanyughie kyenywa kiakia kya ngoo. Ang'u vanyughie ifuma hena mshararabwe wa mbeho uvai varie, na mshararabwe tho ni Kristo. 5 Mira Ruva achuekichawe na vaya mata, na fimba vyavo fikathathajwa nyika. 6 Bathi mburi yoyoshe ivie mifano kweru kimetha ifwe funava vwandu vetamani fivichwa tha fundu navo vahirire. 7 Munaghira ndho na ngoma, tha fundu vaya vengi valekei. Kwii ni thafundu kiandikiwe, "Vandu waleikee mbai wakaya na inywa, na vakavukia wakafina na inyeghetha." 8 Munashinda tha vaya vengi navo vahirire. Wakapfwa mfiri umwi wandu viku makumi avi na firaru, kwa ihira kwio. 9 Mira funamghera Kristo, tha fundu vengi vavo vahirire na vakakondwa kwa njoka. 10 Kangi munadughunyika, tha vaya vengi navo waledughunyikie na vakakondwa ni malaika wa kifwa. 11 Bathi vindofyo vihirikie tha mifano kweru. Viandikiwe kimetha fifurunge ifwe - fukoleriwe ni mifiri ya mwisho. 12 Hena ikyo kila akuvoni ku amki alolie anaghwa. 13 Haghire mighesho imuchirie imwe there ya kawaida ya vandu. Mira Ruva ni mmwaminifu. Amuleka we mugherwe ikela kiringanyo kyenyu. Hamwi na mighesho we amunika mbenge ye fumia kimetha muirime irimilia. 14 Hena ikyo, vakunde vakwa, muiriche mitatho ya ngoma. 15 Nnarera na imwe tha vandu vaghire akili, kimetha muamue ikyo nnareva. 16 Kikombe kya mfono fuchikibariki, thi ushirika wa ndhakami ya Kristo? Mkate wia fuchiubandua, thi ushirika wa mwiri wa Kristo? 17 Kwaku mkate ni umwi ifwe fuke vengi fu mwiri umwi. Ifwe voshe fwaghuhia mkate umwi handu hamwi. 18 Valolieni wandu va Israeli: He! Vaya voshe wachiya dhabihu thi washirikivo hena madhabahu? 19 Nirere iki luvaha? Ku ngoma ni kindo? Kana kijo kifunyirwe itathi kwa ngoma ni kindo? 20 Mira nnarera hena findo fia vachififunya itathi vanu vangoma vwa Mataifa, ku vwachifunya findofi hena mapepo na thi kwa Ruva ho. Nainyi nidhashighanyi ishirikiana na mapepo! 21 Mwairinamwe ikinyughia kikombe cha Mndumi na kikombe kya mapepo. Mwairima mwe iva ushirika hena metha ya Mndumi na hena metha ya mapepo. 22 Hang'u mfwambikia Mndumi funu? Fughire nguju tikelele takwe? 23 ''Vindo fyoshe ni halali," mira thi fyoshe fyavafyo. "Findo fyoshe ni halali,'' mira thi fyoshe fichiagha wandu fyo. 24 Haghire hata umwi aveghigha vicha fyakwe du. Badala yakwe, kila umwi aveshigha ficha fya uvwe. 25 Mwairima iya kila kindo kikyakumbwa ifuva bila ivetha -vetha kwa ajili ya dhamiri. 26 Ang'u "ithanga ni mari ya Mndumi, na fyoshe filiichurire." 27 Na mndu araghire mwiitikijo akamurarika iya, na mmwashigha ighenda, yenyi kyokyoshe amunika bila ivetha mathwali gha dhamiri. 28 Mira mndu akamuvia, "Kijo ki kifumene na itathi ya vangoma," munaya. Kwii nitha fundu ifo amurie, na kwa ajili ya thamiri. 29 Nainyi thimaanishirenyi thamira tenyu, mira thamiri ya wia ungi. Ang'u haniiki uhuru wakwa uhukumiwe ni thamiri ya mndu ungi? 30 Kole kwa nahavache inyi naya kijo, haniiki niimbiliwe kwa kindokyo, ngekyo nighambie nahavache kwa kyo? 31 Hena ikyo, kyokyoshe mmwaya kana inywa, kang'u kyokyoshe mmwakihira, hirenyi fyoshe kwa ajili ya ngatho ya Ruva. 32 Munavareta Wayahudi kana Wayunani, kana kanitha ya Ruva. 33 Gherenyi tha inyi fundu nichighera ivanulitha vandu woshe kwa mambo ghoshe. Nthashigha faida yakwa njekanyi mira ya vengi. Nainyi mahira kwii kimetha vakirwe.