¹ Lole umutu wa ishi sho twayugha nughu, tulinawe umubombi uyu we akikala kunyobe lya ndyelo ya chitengo cha bumwene uwa kumwanya. ² Umubombi uwa pamalo amasayiwa nuwa chitembe icha bwanaloli cho uchala akachipinya ta mundu. ³ Pakuti umubombi weshi abikiwe ukubika ikemo, po pakulondiwa ukuti uyo abe nachimo icha kubika. ⁴ Po umwene linga akikala pa chisu ngali ata mubombi pakuti balipo bo bakusopa mu ndaghilo. ⁵ We akubomba ichifwani ni chifuni icha kumwanya ngati wi Mose bakumuchefya mwo akalonda uku zenga ichitembe shoshi mukuyana kwo kukalangi shiwa kukwako kwighamba. ⁶ Lole ulu umwene apokela imbombo inyisa ngani ngati mwo ali mubombi wa pangano ilyisa kulusha lyo lyikashiwa pa mapangano amashisha. ⁷ Pakuti ilya bwandilo lila linga litakaba ni chilema ngali atakalonda amalo agha chibila. ⁸ Pakuti pakubitishisha ichifukwa, bakuti tesha ghakwisa amashiku uchala akuyugha, potingapangane ipangano ilipya ni nyumba ya Yuda. ⁹ Talyolilyo lyo ngalibomba na bapapi babo ishiku ilyo ngabakola inyobe kubalongosha, bafume mu chisu cha Eguputo, utibakali batikile mu ndaghilo shangu, po une ndabasaghile, uchala ayugha. ¹⁰ Pakuti ulu lulaghilo lwa tinga laghile inyumba ya Izilayeli ape linga ghenda amashiku ghala uchala akayugha, tingabike indaghilo ukubalangisha amahala ghabo sona pamoyo wabo tingabasimbe po une tingabe chala wabo, po abene tibakabe bandu bangu. ¹¹ Po takamanyishe weshi musatuke umunine na weshi umukamu wake nukuti mumanye uchala pakuti boshi tibakamanye une ukwanda umwana nu songo. ¹² Ukuti tingabafwile ichisa imbibi shabo, sona imbibi shawo tangashi ku mbuke. ¹³ Pakuyugha lipya ichabwandilo shamala lole cho chimalite amaka nukushila chikupalamila pakushila.