¹ 3 ² Umubombi Umelkizedeka aku ghelesha Uyesu kilisito umubombi wa bwila. Pakuti Umelkezedeki uyu umwene wa salemu umubombi wa Chala umukulu we akakomana nu Abrahamu, pakubwela akaghogho ababombi bala akaba saya. Nu Abrahamu akafumya ikemo chikusukpla ukuti ilyita lyake we fumu yo bwanaloli, sona mwene wa salemu kwo umwene uwa mutende. ³ We atanu wise, we Shantung'ina we atakubelengiwa ubwanaloli uwa mashiku ghake pamu ubu malilo uwa bumi bwake, wachala, uyughelile nu mwana wachala, uyu aba mubombi bwila bwila. ⁴ Po tesha umundu uyo mwo ali wisongo, we u Abrahamu ubaba wtu umukulu akamupa ikemo. ⁵ Po abene mubana aba Levi akupokela imbombo lya kubika ikemo ngati ndaghilo kwo kubakamu babo nalinga baka fuma mu musana wa Abrahamu. ⁶ Lole umwene imbepo yake yitakabele ngiwe ukuti yifumite ku abo akabika ikemo kwa Abrahamu akamusaya we ali nawe mu pangano. ⁷ Ukusita kususha umunandi aku sayiwa nu songo. ⁸ Po pano abandu bapokela ikemo lole po umwene we akamushimikisha ali nu bumi. ⁹ Sona kulingati kuyugha kwa Abrahamu nu Levi we akupokela ikemo aka bika ikemo. ¹⁰ Pakuti pala akaba mu musana wa wise po Umelkizeleki aka komana nawe. ¹¹ Linga pakaba ichikwane mubu bombi wa Levi, pakuti mula abandu bakapokela indaghilo pali ichoni sona ukuti umu bombi uyungi abepo ngati mu dongosolo lya Melikizedeki atangaba ngati mu ndondomeko ya Aloni. ¹² Pakuti ukuba mubombi, ni ndondomeko yope yikulondiwa yi ehenje. ¹³ Umwene we ishi shikuyughiwa ishake ndabe wa luko lungi uwa ili nayumo umundu uwa kubomba pa chighemo. ¹⁴ Pakuti kwamanyikwa ukuti uchala witu akafuma mu bayuda paluko ulu Umose atayughite isha kubomba. ¹⁵ Po kwamanyikwa ngani linga lingo umubombi uyungi inuka ngati wi Melikizedeki. ¹⁶ We atamubombi mulamulo ilya mazaza agha mubili, lole kumaka agha bumi busita kumalo. ¹⁷ Pakuti ashimikishiwa ukuti uwe we mubombi bwila, ngati wi Melikizedeki. ¹⁸ Pakuti kulukutagha kwake kulamulo lyo likisa kale, chifukwa icha kupotwa kwake, nukusita kupindula kwake. ¹⁹ Pakuti ilamulo litatabombole akandu kabe kata nichilema pokuli sona ukwingila nako ukulindilila ukukulu chotukupalamila nako kwa Chala. ²⁰ Po ngati mwo kutakabombiwa ukusita kulapa. ²¹ Pakuti bala bakaba babombi kisila ndaghilo payuyo we akayugha kukwake alapite uchala sona ta akalape, uwe we mubombi bwila bwila. ²² Po pafundo iyi Uyesu mufusha uwa pangano ikulu. ²³ Po abene bho bingi bakaba babombi pakuti ubufwe bukabalesha ukuti manye babepo. ²⁴ Lole umwene chifukwa ichakuti ndabepo akabalilo koshi ali nawo ububombi wa butakuchenja. ²⁵ Ukufuma kula angapoka koshi koshi bo bakupalamila kwa chala, mu yuyo pakuti ali nubumi wake bwila uwa kubiluta babo. ²⁶ Pakuti umubombi uyu atu yanite utwe, umwelu mu moyo ata nichilema, atanyashiwe atayanite naba bomba mbibi we akupululila amaghamba. ²⁷ We atanichifukwa icha kubika ikemo bwila bwila ngati babombi abakwanda chifukwa cha mbibi shabo, lyingi chifukwa cha mbibi sha bandu, pakuti ihi akabomba kamokene basi pakwifumya mwene. ²⁸ Pakuti indaghilo shikubika ababombi bitu, bobata ns maks lole amashu agha chilapo gho ghakisa mwo shenda indaghilo,akubika umwana we atani chilrma akabalilo koshi.