¹ Pakuti umubombi weshi we akweghiwa na bandu, akubikiwa chifukwa cha bandu mufyakwa Chala, ukuti abike ikemo ni fyabupe chifukwa cha mbibi. ² Abe nichisa kubobatemenye na bobakusobo, pakuti wepe alini fya kufoka. ³ Po ichifukwa icho akulondiwa, mumalo mwa bandu, sona mumalo aghake yo mwene, ukubika ikemo chifukwa cha mbibi. ⁴ Nayumo umundu we akwichindika pa mwene, lole mwene we itishi nu Chala ngati u Aloni. ⁵ Po wepe ukilisito atakikwesha mwene ukuti abe mubombi, lole we akayugha nawe, mwana wangu wewe umusughu naku papa. ⁶ Ngati mwo akuyugha sona uwe we mubombi akabalilo koshi ngati mu ndondomeko ya Melkizedeki. ⁷ Uyo m'mashiku aha mubili wake akabika inyiputo nu kwiputila nukulila ngani na mashoshi kuwe angamupoka yuyo ku bufwe, sona akapulikiwa pakuti akamwoghopa uchala. ⁸ Napo mwana akamanyila ukupulika nasho akapulika ukubaba nasho. ⁹ Po akanoshiwa mphumphu akaba kuboshi bo bakumupulikila chifukwa cha bupokwa ubwila. ¹⁰ Itishiwe nu chala mubombi ngati indondomeko lya Melikizedeki. ¹¹ Mu mwake tuli na mashu amingi kughayugha ghakutopota ukwilula pakuti mufyufwo mwighalile. ¹² Pakuti nalinga mu bagile ukuba bamanyisi, chifukwa chakabalilo aka, numwe mukusobelwa ukuti yumo abamanyishe umwe ichakwanda icha mashu gha Chala potimube mwe bana mwe mukulonda ulu kama, ichakulya icha kutafuna hagha. ¹³ Pakuti weshi we akung'wa ulu kama atisubhishishe amashu agha bwanaloli pakuti wi bonda. ¹⁴ Lole ichakulya ichakutafuna cha bandu abosongo, bo amahala ghabo ukughabombesha, ghisubile ukulesania ichisani chibibi.