¹ Popapo pakuti mwe bana ba Chala abaghaniwa, mubaghile ukughela ukuba ngati we yuyo. Sona endaghe mulughano ngati mwo ukhristu akatughaghanila utwe. ² Posona akiyipa chifukwa Cha utwe ukuba chabupe nikemo lya munushi umwisa kwa Chala. ³ Pakuti mwe bandu ba Chala, ta chisa hagha ukuti ubwomalaya nubunyali boshi pamu ichinyonywa, manye fiyughibwange mamwinyu nashiku. ⁴ Sona manye mwitikisha amakonyofu pamu isunga imboshamino, fyo fitabaghile; lole chisapo ukuwa ulupi. ⁵ Cho Mumenye chakuti umundu weshi yo wimalaya,munyali,akunyonywa( pakuti akunyonywa ali ngati yo akwiputa ichifwani) uwangu yuyuyu akabwingile ubunyafyale bwa khristu nu Chala nashi. ⁶ Atakabeko nayumo abashimbule namashu ghabubushe. Pakuti pabutunongwa isabubu bobo bukwisa nubukali pabandu ba matata. ⁷ popapo muleke ukwenda nabandu ngati bababa. ⁸ Umwe numwe kale mukaba muchisi, lole apa muli mu bwelu pakuti mwe bandu malafyale. popapo mubaghile ukwenda ngati bandu bo bali mubwelu. ⁹ Pakuti mubwelu momwo mukufuma ubwisa, ubugholofu nu bwanaloli. ¹⁰ Ghela ukumanyila cho chikumuhobosha umalafyale. ¹¹ Manye mukomanaghe mumbombo Sha muchisi isita seke nashimo. Lole chisapo ukushikana pabwelu. ¹² Nama sha soni nukushiyugha sho bakubomba kubutitu. ¹³ Lole ifindu fyoshi, nandi fyegheliwa kubwelu, fikuboneka ngati mwo fibelile naloli. ¹⁴ Pakuti choshi chochikuboneka pabwelu chikwanduka chelu. chocho chifukwa asimbo ghakuti, "We uli nutulo, nyatuka nyatuka kubufwe. Po ukhristu ti akubalile." ¹⁵ Popapo muchebe mo mukwendela. Manye mwendagha ngati muta namahala, lole mwendaghe ngati bandu bamahala. ¹⁶ Akabalilo kinyu koshi kaba kakubombela imbombo inyisa, pakuti agha mashiku mabibi. ¹⁷ Manye muba bakonyofu, lole unawa bubelile mubwaghaniaghe mwo bubelile ubwighane bwa malafyale. ¹⁸ Manye mukolwaghe nubwala papo momwo muli ukwibululusha, lole mukolwe numbepo. ¹⁹ Muyughisaniange namashu gha mumasalimo, munyimbo, namunyimbo Sha mbepo, imba nukukobelana mu ndumbula shinyu po mukumupala umalafyale. ²⁰ Namashiku ghoshi sona pa chindu choshi mupalishange kwa chala uTata mungamu ya malafyale witu Yesu khristu. ²¹ Mwiyishaghe uyu kumunine uyu kumunine chifukwa chalughindiko mwa khristu. ²² Mwe bakashi, mwiyishaghe kubalume binu isamwo mukunyishikisha kwa Malafyale. ²³ Pakuti umulume weyo mutu wa mukashi isamwo ukhristu weyo mutu wa chipanga, Cho gho mubili wake. ²⁴ Lole isamwo ichipanga Cha Chala chikunyisha kwa khristu, popapo momwo abakashi babaghile ukwiyishila kubalume babo mufindu fyoshi. ²⁵ Mwe balume baghane abakashi binu isamwo ukhristu akachighanila ichipanga nukuchifwila. ²⁶ Akabomba ichi ukuti aghusuke nukuchiswepesha ichipanga ichi na mashu namishi. ²⁷ Ukuti buboneke pamaso pake, muchipanga ichishisha ichisita kabushi, pamu ububibi akandu kamu koshi kokuchinyasha. Lole ukuti chibe chelu chisita kabibi nakamu. ²⁸ Popapo momwo abalume babaghile ukubaghanila abakashi babo ngati isamwo bakuyighanila imibili yabo. Yuyo akamughana umukashi wake, akwiyighana mwene. ²⁹ Pakuti nayumo atakughubenga umubili wake, lole akughuswila nukughutendekesha, isamumwo ukhristu akubombela muchipanga. ³⁰ Nama utwe tuli tumbakasha twa mubili wake. ³¹ Popo leka umundu tise amulekashishe umukashi, Po babili bababa tise babe mubili ghumuwene. ³² Isha kubutitu shishishi sho shisha naloli, une lole ingugha isha khristu muchipanga. ³³ Lole numwe, umundu weshi amughanaghe umukashi wake isamwo ighanile mwene; Umwene umukolo lole yo abaghile iyishaghe kumulume.