¹ Mwe bana, pulikila abapapi pakuti iyi yoyo mbombo yinu mwa khristu ukuti muyibombaghe. ² Ghindika ughuso nu nyoko ulu lolo lulaghilo lwabwandilo lo luli mulufingo ulwa kuti, ³ "Umwakuti kubabile akisa, sona amashiku ghinyu tise ghabe mingi muchisu." ⁴ Mwe bapapi manye mubakalishaghe abana binu, lole mubalele akisa muchimanyisho namulukasho lwa bu khristu nukubalongosha kwa Malafyale. ⁵ Mwe batumwa, mupulikile abanyafyale binyu aba muchisu, mube nubwogho nukutetema nindumbula inyelu, isamwo mumupulikila ukhristu. ⁶ Manye mubombaghe pala bakubabona pene nashiku ukuti bahobokaghe numwe. Lole ngat batumwa ba khristu, mubombaghe numwoyo ghoshi fyo uChala akulonda. ⁷ Mubombaghe nindumbula ihobofu, isamwo mumubombela u Malafyale ngati isamwo nandi mukubabombela abandu nashiku. ⁸ Mutakumanya ukuti koshi akisa ko nandi umundu akubomba, koko tise ambilile kwa Malafyale, napo mutumwa napo mwabuke. ⁹ Numwe mwe banyafyale, sho mubabombelagha shishi abatumwa binyu, manye muboghofyaghe, mumanyaghe ukuti mweshi muli numalafyale yumuywene yo ali kumwanya, yo atakubasalila abandu mubundu bwabo. ¹⁰ Pabumalilo umalafyale abakashe mu maka ghake amakulu. ¹¹ Mufwalaghe ifilwilo fyoshi ifya Chala, ukuti mumanye ukwitoteka kubuchefu bwa satana. ¹² Nama ubwite bo tukulwa tutakulwa nabandu bamubili nibanda, lole tukulwa nabanyafyale, mabamaka sona nabalaghila chisu icha muchisi chichichi, tukulwa nifilundilo fyambepo inyali ishamumwanya. ¹³ Po buno buno mweghaghe ifilundilo fyoshi ifya Chala, fyo fibapelelaghe ukwima pishiku ibibi, bwo mushimalishe shoshi, pomwimaghe. ¹⁴ Popapo mwimilile nu kwitoteka, sona mupinye nu kumba wabwanaloli mumusana winyu, nukufwala ichela chabugholofu pachifuba chinyu ukuba chakuba fighilila. ¹⁵ Pakulumbilila ubulumbilili ubwisa ubwa lutenganio bo bube ngati filato fya mutulundi. ¹⁶ Pamwanya pa ishi mweghe ni chilwilo chalwitiko ngati chilwilo chinyu cha kushimikisha indapisha mulilo sha mubibi yula. ¹⁷ Mubwambilaghe ubupokiwa bobube ngati Chipewa chinyu chabwite nupanga wa mbepo ghagho gho mashu gha Chala. ¹⁸ Mwiputaghe akabalilo koshi ukulongoshiwa numbepo pamupene ninyiputo shoshi nu lapyelesho. Pachifukwa ichi kalaghashe nukufwilapo munyiputo, pakubiputila abandu boshi ba Chala. ¹⁹ Munyipulila nuneshe ukuti uChala abike amashu ghake mumulomu wangu nandi nguyugha, ukuti mbamanyanyishe abandu isha muchisi mubulumbili ubwisa nu bukifu. ²⁰ Po bule ne wakupinyiwa, lole nipelite ukuba mwimilili, ukuti imbe mukifu ukuyugha, isamwo mbaghile ukughayughila. ²¹ Lole ukuti umwe mumanye mwo mbelile une, sho tababule shoshi uwamwitu umughaniwa utikika, umubombeli umusubiliwa wa malafyale,. ²² Yo mutumite kukwinyu panongwa yiyiyi, ukuti mushimanye ishitu mwo tubelile, nukuti ashisubishaghe indumbula shinyu. ²³ Ulutengano lube na banyitu, nulughano, pamupene nulwitiko, fyo fikufuma kwa Chala. Tata na kwa malafyale Yesu khristu. ²⁴ Ilipyana libe nabo boshi bo bamughanite umalafyale witu Yesu khristu, nulughano ulusita shila