¹ Popapo une ne mupinyiwa panongwa ya kumubombela umalafyale, ngubapyelesha ukuti shiwa ko mwitishiwe. ² Mulyiyisho lwoshi nubutengamoyo, nubufindang'oma, mufifanilaghe ilyoyo mulughano. ³ Mwiyulaghe ukubamwe banyamundu bwa mwa mbepo, lubapinyaniaghe lo lutenganio; ⁴ Papo umubili ghuli ghumuwene, nu mbepo yumuywene, isamumwo numwe mwitishishe mulusubilo lumulwene lwa kwitishiwa lumulwene; ⁵ U Malafyale ali yumuywene, ulwitiko luli lumulwene ulosho yumuywene. ⁶ u Chala yumuywene u wise wa boshi, yo akwendela boshi, Sona alimukati muboshi. ⁷ Lole tweshi mwo tubelile tupomeliti ichisa ukuyana nichighelelo Cha chabupe ichi atupile khristu. ⁸ Nama lisimbibwe lyo likuti, "Bwo akumwela kumwanya, akabuka nabo abakoliwa, akabapa abandu afyabupe." ⁹ Ilyakuti, "Akakwela kumwanya," likung'anamula ukuti akanda ika pasi, kokuti pasi mufighaba fya pasi ngani pachisu. ¹⁰ Yo akika weyuyo akakwela kumwanya ukinda icha kumwanya choshi ukuti isulaghe yuyo muchisu choshi. ¹¹ Sona weyo abapile abandu ichi kungilwa, akabimika bamu ukuba batumiwa, abangi akuba basololi, abangi ukuba bulumbilili, abangi ukuba, batimi na bangi ukuba bamanyishi. ¹² Panongwa ya kubatendekesha abitika kumbombo yabubombeli, kokughusenga umubili wa khristu. ¹³ Pakufika papo tweshi tise tufikaghepo pabunya mundu bwa lwitiko, nakubumanyi bwa kumanya umwana wa chala, ukufika pachighelelo Cha bukusi ubwanaloli bwa khristu. ¹⁴ Po manye tuba bakeke bo bakwembela ukuya kuno nakuno nimbepo ya luko lwoshi lwa lumanyisho, nubushobi bwa kutusofya. ¹⁵ Lole tubukongaghe ubwanaloli mulughano, mushoshishe tukulilagha mumwake, yo weyo wi khristu umutu witu. popapo mwake umubili ghukulukana nukupinyana pamupene ningole. ¹⁶ Popapo nandi ichighaba choshi chikubomba akisa imbombo yake, Po umubili ghoshi ghukukula nu kusengibwa mu Lughano. ¹⁷ Popapo mu ngamu ya malafyale ngubasoka ngati, manye mwendaghe ngati bapanja bo inyinong'ono shabo shabu. ¹⁸ Sona inyinong'ono shabo shili mu chisi. Bagheni kubwumi bo uChala akabopa, pakuti bapotwe ngani Sona indumbula shabongafu. ¹⁹ Batanisoni, bakwiyipa ukubomba isha kushi ukana indaghilo, ububombambilo Sona bimi, Sona bakubomba amabunyali ghaluko nuluko no kwikola. ²⁰ Lole tamwomwo mukamanyilila ukhristu. ²¹ Nandi naloli mwapulikite Sona mwamanyishiwe mwake, ubwanaloli bo buli mwa Yesu. ²² Popapo tishamwo akayilo kinyu akakale, ubundu bwinyu ubwakale, bobukomanikite nifyakwiyaya fyake ifyabushobi. ²³ Indumbula shinyu ninyinong'ono fibaghile fyanduke fipya. ²⁴ Mubaghile mufwale ubundu ubupya, bo uChala akabupela mu chifwani chake mubwanaloli namubwelu ubwenecho. ²⁵ popapa Sona pakuleka ukuyugha ubumyashi, weshi ayughaghe ubwanaloli bwene kumupalamani wake pakuti tweshi tuli kambakasha kamukene. ²⁶ Kalipa, lole manye mutulaghe inongwa sona manye mubukilile pakukalipa pa kwingisha isuba ukali ukalalite. ²⁷ Sona koma ukumupa usatana ulusako. ²⁸ Yo mwifi aleke ubwifi, lole chisapo ukuti iyulaghe ukubomba imbombo inyisa nutukono twake yuyo ukuti abe nafyo fimo ifyakuti amupa yo atanafyo. ²⁹ Ilishu lyoshi ilibibi manye lufumaghe pa mulomo winyu, lole nandi lilipo limo, lyo liba lyisa ilya kubasenga po nandi pabaghile, ukuti fyo mukuyugha fimanye ukubomba ubwisa kubo bakupulika. ³⁰ Sona manye mumupelelaghe ubusulumanie umbepo uMulelu uwa Chala kuyo mwitishiwe ukufika pishiku lya bupoki. ³¹ Mubulekaghe ubukali bwoshi, ilyoyo, ulubengo imiywegho, namahelu pamupene nububibi bwoshishe; ³² Lole muba bololo uyu kumunine, muba nichibabilishi, muswanaghe isamwo uChala abaswelile mwa khristu.