¹ Asinnaka ni arokoraka, vano kinapaalla kineerowuupusani nyuwaano dda othenga waphaama oyo kallalleyeemi wa nyuwaano, oyo mwaakhenlleenyu nave va yooyo echikhulupililwaanyu eniimella moollipa. ² Muneerovullusiwa ni othenga waphaama oyo kallalleyeemi mwawuphara moollipiha. Ddaahikhalla ddiiddo sika echikhulupiwaanyu tti yoohikhalla ni mutteko. ³ Vawi kaavelleella wa nyuwaano yoopaalleya yuullupalli eyo kaakhenlleemittho yawi Khrisitu* aakhwa ekaamba ya machimo ddaahu wonanko mmo ddilembiwe mu mawu a Mulluku*, ⁴ wi aavitthiwa nave wi aavenyihiwa wa ookhwa viviralle mallapo mararu, wonanko mmo ddilembiwe mu mawu a Mulluku. ⁵ Wi ahooneya wa Petro* nave enre ddiiddo ahooneya wa oohuddera khumi ni eelli attheene. ⁶ Enre ddiiddo ahooneya enthawi emodda wa asinnihu ni arokorihu ookhwaranya 500. Anchichi a yaayo tti akumi ophiyera vano, koma amodda mwa yaayo aakhwa. ⁷ Vano ahooneya wa Yakobo* avenyaka vaavo wa oohuddera attheene. ⁸ Voomallihella ahooneyattho wa miyaano naari kaphwanaphwanaka ni muthu ooyariwa mallapo ehinakwankhwane. ⁹ Vawi miyaano tti murummwa* ooyevesesa mwa attheene. Nginaphwanella wi keeriwe murummwa kaambiiwa kaahoosa mpingo* Mulluku. ¹⁰ Koma ni echisomo ya Mulluku miyaano kiri mmu kakhallelleemi nave echisomo aakivahilleeye kheyaari yoohikhalla ni mutteko. Koophara mutteko moollipiha ohiyana ni amurummwa amodda attheene, naari khe miyaano koma echisomo ya Mulluku eyo enaphara mwa miyaano. ¹¹ Sika vano naari kaariki miyaano apaalle alliwaayo enallalleya, attheene ninnallalleya othenga omoddave yooyo nave nyuwaano mwaakhullupilila. ¹² Othengaahu tti wawi Khrisitu oovenyihiwa wa ookhwa. Kaambiiwa tini omoddanyu munallota wi athu ookhwa khewa eneerovenya? ¹³ Koma athu wi Khrisitu khaavenyihiwe wa ookhwa. ¹⁴ Koma Khrisitu aarimi ahivenyihiwe wa ookhwa, sika ollalleya wahu khonna mutteko navettho echikhulupiliwaanyu khenna mutteko. ¹⁵ Ovirellella yeeyo, Ninnooniwa wi ninnoottha dda Mulluku, kaambiiwa naavelleella omboni wi aamuvenyiha Khrisitu wa ookhwa. Nave ddakhalla ddawoona wi athu ookhwa khenavenyihiwa, vano Mulluku khaamuvenyihalle Khrisitu. ¹⁶ Vawi athu ookhwa yaahinyihiwaka, khrisituttho khaavenyihiwe. ¹⁷ Nave Khrisitu aarimi ahivenyihiwe, sika echikhulupilwaanyu khenna mutteko navettho mu machimwaanyu ophiyera ollello. ¹⁸ Vano athu ayo yakhwille emukhulupilika Khrisitu khevullusiwa. ¹⁹ Sika naatiyerellaka mwa Khrisitu mu okumi yoollave ohirittho okumi wa muhoollo, vano niri oomoriha etakarakha omukhwaranya arive muthu mu ellapo attheene yavatthi. ²⁰ Koma yawoona tti yawi Khrisitu oovenyihiwa wa ookhwa wi akhalle awaamba wa ayo enaavenyihiwe. ²¹ Vawi okhwa waawa vatthimva oweella mwa muthu, Adamu", emoddamoddave yeeyottho ovenya wa ookhwa onawa oweella mwa muthu, Khrisitu. ²² Vawi athu attheene enakhwa ekaamba ya Adamu, emoddamoddave yeeyo attheene eneerovenyihiwa wa ookhwa ekaamba ya Khrisitu. ²³ Nave arive muthu eneerovenyihiwa va enthawaaye. Vawaamba va attheene, Khrisitu,vatulli viwa ayo eri aaye a Khrisitu va enthawi anaaweeye. ²⁴ Vano ellapo yavatthi eneeromalla; Khrisitu aneeromoononga masiva mattheene oolamulella nave avelleella omwenooyo wa Mulluku Attiitthinnya. ²⁵ Vawi Khrisitu anaphwanella alamulelle ophiyera Mulluku aagonjihalle adani attheene ni waahiya m'mattani mwa Khrisitu. ²⁶ Mudani oomallihella woonongiwa tti okhwa. ²⁷ Vawi mawu a Mulluku enallota wi, "Mulluku aahiya ddeko ddittheddene m'mattani mwaye." Neve tti ddoodduwanyeya khalle wi mawu awi, " ddeko ddittheddene" khenamwaaka ni Mullukweene oyo anahiya ddeko ddittheddene m'mattani mwa Khrisitu. ²⁸ Nave ddeko ddittheddene ddineerohiyiwa m'mattani mwaana, Khrisitu, vano mwaanooyo aneerewiivelleella m'mattani mwa Mulluku, oyo ahiyalle ddeko ddittheddene m'mattani mwa mwaana, wi Mullukuve aalamulelle athu attheene. ²⁹ Vano, athu ookhwa yeeki ehivenyihiwe, enaaweereye tti tini wa athu ayo enabatiziwa munipuroni mwa athu ookhwa? Kaambiiwa tini athwaayo enabatiziwiiwa munipuroni mwa athu ookhwa? ³⁰ Nave wa hiyaano, kaambiiwa tini ninakhalleehu mu ddawoopiha enthawi ddittheddene? ³¹ Asinnaka ni arokoraka, okhwa kinneetana nllapo ni nllapo! Wuukotellani waka, ekaamba ya Khrisitu Yesu* Apwiihu,onnakeeriha ollota yeella. ³² Moollikana ni oganiza wa athu, yoowanella ni enama dda muhakani wonanko keerelleemi wa Efeso tti tini? Nave athu ookhwa yaarimi ehivenyihiwe vano hankoni neere wonanko mmo athu enallotelliiwa wi, "Hankoni niche nave niwirye vawi osiisello nineerokhwa." ³³ Muhillekiwe. Waattana ni athu oonanara onnoononga makhallello aphaama." ³⁴ Muhokollweelle o makhallellwaanyu aphaama nave muhiye ettilla ddanyu ddoochimwa. Kinallota wi kuuwulliheni muru Kaambiwa amodda a nyuwaano khamunamudduwella Mulluku. ³⁵ Muthu mmodda akoha wi, "Athu ookhwa enaavenyihiwe mwawiidde? Enaakhalle ni mwiilli wawiidde?" ³⁶ Ookarangeya we! Wamidda mmiddo, khonamella waahaamba okhwa. ³⁷ Khaninamidda yoomella ettheene eyo enunnuwa, koma mmiddove, tirigu apaalle mmiddo mmodda. ³⁸ Mulluku annavaha mmiddo yooyo mwiilli anapaalleeye;annavaha orive mmiddo mwiillaaye. ³⁹ Nave miilli khaddinakhalla ddoophwanaphwana; ddimodda dda athu, ddimodda dda enama, ddimodda dda epallame nave ddimodda dda ehomba. ⁴⁰ Nave vookhalla miilli ddooddullu navettho miilli dda vatthimva; ntitimiho na miilli ddooddullu tti noohiyana ni oreera wa miilli dda vatthimva. ⁴¹ Nndduwa nookhalla ni owala wiwa, mweeri wookhalla ni owala wayiwawayiwa nave etheneeri ddookhalla ni owala woohiyawayiwa nave etheneeri ddookhalla ni owala woohiyana etheneerinnddo. ⁴² Ddinaakhalle mwawi ddiidda athu ookhwa yavenyihiwa. Mwiilli oyo onamiddiwa voovitthiwani, onnuunta koma wavenyihiwa khokhalla wawuunta. ⁴³ Waamiddiwaka onakhalla woonanara ni woofooka koma wavenyihiwa onaakhalle wooreera ni wamasiva. ⁴⁴ Onamiddiwa ori mwiilli woomuthu koma onavenyihiwa ori mwiilli wa Munepa. Vawi vookhalla mwiilli woomuthu, sika vookhallattho mwiilli wa munepa. ⁴⁵ Vawi mawu a Mulluku enallota wi, "Muthu awaamba, Adamu, aari muthuve." Koma Adamu oomallihella, Yesu tti Munepa woovaha okumi. ⁴⁶ Khe yamunepa enawa vawaamba koma yoomuthu nave vatulliviwa yamunepa. ⁴⁷ Adamu awaamba awoopiwa ni ethaya aari avatthimva koma Adamu aneepiilli, Yesu aari ooddullu. ⁴⁸ Arive muthu ari va ellapo yavatthi ari wonanko Adamu awaamba, koma ooddullu eri wonanko Adamu aneepiilli. ⁴⁹ Vawi ninnaphwanaphwana ni muthu awoopiwa ni ethaya, sika nineerophwanaphwanattho ni muthu ooddullu. ⁵⁰ Eyo kinaakeemi, asinnaka ni arokoraka,tti yawi yawoopiwa ni mwiilli ni nikhame khewora waakhella omwene wa Mulluku nave yoomalla khewora waakhella yoohimalla. ⁵¹ Ngiiwesesani, kinnawuupuwellani yookhuweya yawoona ella. Khanikhwa attheene koma nineerovullusiwa, ⁵² mu enthawi yooyeva, mwawaakuva wonanko ominyalla wa niittho nipallapata noomalliha noopiwa. Vano athu ookhwa eneerovenyihiwa ni mwiilli woohimalla, hiyanottho nineerotthattusiwa. ⁵³ Vawi yoomalla etthattusiwa yoohimalla, eyo enaakhwe etthattusiwa yoohikhwa. ⁵⁴ Sika ddenndda ddeereya yoomalla yatthattusiwa yoohimalla, eyo enaakhwe yatthattusiwa yoohikhwa , vano mawu a Mulluku eneerokwakhwanihiwa awi, " ⁵⁵ Okhwa woomiryiwa voogonjihiwani!" Okhwa we, opambana wawo ori wuuwi? Okhwa we, murophaawo ori wuuwi?" ⁵⁶ Murophi wa okhwa tti machimo nave machimo enakusa masiviiwa ovenyera omalamuloni*. ⁵⁷ Koma nimuthokoze Mulluku oyo ananipambaniha oweella mwa Apwiihu Yesu Khrisitu! ⁵⁸ Sika vano, asinnaka ni arokoraka ookondiwa,khallani oohhitikheya* vawi munnadduwella wi oweella mwa alliwa, muttekwaanyu onnakhalla ni mphuro.