¹ Vano kinaaka mudduwelle dda ddoovelleella makobiri awaakavihera athu a Mulluku o Yudeya* nnddo mwalembilleenyu. Munaphwanella weera kalamulalleemi mipingo mu Galataya* wi ddeere. ² Nirive Nllapo Namulungu arive muthu anyuwaano akuseke makobiri mamodda moollikana ni mmo muphwanyereenyu nave musunge wi vihikhalle opaalleya ovelleella makobiri kaawaaka . ³ Kawa kiphiya,kineerowiinnya makalata Ayo mwatthoonllenyu nave kineerowaaruma wi yavelleelle emphaswaanyu o Yerusalemu*. ⁴ Waphwanella wi miyaano kiyeewottho, ethaanana ni miyaano. ⁵ Kineerowa wa nyuwaano kakhwaranya echigawo ya Masedoniya* vawi kinaayeelle o Masedoniyanko. ⁶ Apaalle kineerokhalla wa enthawi ni nyuwaano, apaalle enthawi ettheene ya nakhuttu wi mukikavihere voovirellellani olendwaaka orie weko kineereemi kiyeewo. ⁷ Nginapaalla owoonani wa enthawi yooyeva kaaviraka koma kinatiyera okhalla ni nyuwaano wa enthawi yoorekama, Apwiya* yaakhullella. ⁸ Kinaakhalle wuno o Efeso ophiyera nllapo na Pentekosite. ⁹ Vawi wuno mullako wookihulleyella miyaano wa mutteko muullupalli ni woopaalleya, naari oovaanyihana eriwo anchichi. ¹⁰ Timoteo* aphiya owaninyunko, moonesese wi olliye oone wi moomwaakhella variyari vanyu, kaambiiwa olliye anapharattho mutteko wa Apwiya, wonanko miyaano. ¹¹ Ahikhallevo muthu anaamuvelle koma munaphwanella mumukavihere ovirellella voolendonaaye m'murendelleni, wi ahokollweelle wa miyaano, vawi miyaano vamodda ni mpingo* wuno ninnamutiyerella. ¹² Vano dda munnihu Apolo*, kaanamullipiha murima wunchichi wi awe owaninyunko ni ookhulupilila amodda koma olliye khaapanlle wi awe veneva. Nave aneerowa akhalla ni enthawi. ¹³ Chenjerani, khallani oohitikheya mu echikhulupililo, khallani oohoova nave khallani amasiva. ¹⁴ Erakani erive ello ni echikondi. ¹⁵ Munnadduwella dda Stefanasi ni nibanja naye wi yaari ookhulupilila awaamba mu Akaiya* wi yahiivelleella weekhiiwa oorumeyella athu a Mulluku. Asinnaka ni arokoraka, kinimuuvekani ¹⁶ wi mwiiwellelleke olamulello wa athu wonanko yaalla ni arive muthu oyo anaphara mutteko ni urumeyella ni alliwaayo. ¹⁷ Koohakallalla ni owa wa Stefanasi, Fortunate,ni Akayiko vawi yaawa mu nipuroni mwanyu. ¹⁸ Nave yaakillipiha murima, wonanko mmo yuullipihalleenyuni. Athu yaalla enaphwanella waavaha olemu. ¹⁹ Mipingo dda mu echigawo ya Asiyaddinnuuvahani mooni. Akwila*, Prisila ni mpingo onatthukumana mpa mwiwa enuuvahani mooni wunchichi mu eyaattano ni Apwiya. ²⁰ Asinninyu ni arokorinyu attheene wuno ennuuvahani mooni. Muvahaneke mooni mwa echikondi ya ookhulupilila. ²¹ Miyaano Paulo* kinalemba dda moonoolla meekhaami. n ²² Oyo ahinaakonda Apwiya ekhalle ootembeleliwa. Apwiihu waani! ²³ Echisomo ya Apwiya Yesu* ekhalle ni nyuwaano. ²⁴ Echikondaaka ekhalle ni nyuwaano attheene mu eyaattano ni Khrisitu* Yesu.