¹ Vawi munaphwanella wi mullipihelleke okhalla ni echikondi. Murimaanyu okhalleke va emphaso dda Munepa Waweella, makamaka wi mukhallena emphaso yoollotella. ² Ayo enallota ellotello ddoohidduwanyeya* khenallota wa athu amodda koma wa Waweella sika anaallotiha ddookhuweya. ³ Koma ayo anallotella enallota wa athu wi yaakavihere, yaallipihe ni waakaraatthiha murima. ⁴ Ayo enallota ellotello ddoohidduwanyeya eniillipiha weekhiiwa, koma ayo enallotella enallipiha mpingo* muttheene. ⁵ Nave kinnapaalla nyuwaano attheene mulloteke ellotello ddoohidduwanyeya, koma ohiyana ni yeella mwaakhanllekena emphaso yoollotella. Vawi muthu anallotella tti oopaalleya wunchichi ohiyana ni oyo anallota ellotello ddoohidduwanyeya waahikhalla muthu oottaphullella nnddo analloteeye wi mpingo muttheene ollipihiwe. ⁶ Asinnaka ni arokoraka, vano kawa wa nyuwaano killotaka ellotello ddoohidduwanyeya, munaapindulevo tini? Khekhallavo naari eng'onong'ono yaahiivelleella othenga oyo Mulluku akupullullelleeye apaalle odduwella, apaalle ollotella, apaalle ohuddiha. ⁷ Ethiyo ezida ddawiipella machipo ddoohikhalla ni okumi, echtolilo apaalle gitala ddaahiyanihiwa phaama miipellweene, muthu anaadduwelle mwawiidde nchipo niniipiwanno? ⁸ Nave ethiyo muthu anoopa nipallapata nakhoto oopa ddoohidduwanyeya, ttaani anaakhozekelle ekhotweeyo? ⁹ Emoddamoddave yeeyo, muthu aniiwesese mwawiidde eyo munalloteenyu,othengaanyu woollotiwa mu ellotello ddoohidduwanyeya? Mawaanyu enaakhulle okusiwa ni ephevo! ¹⁰ Vookhalla ellotello ddinchichi ddoohiyanahiyana mu ellapo yavatthi nave kheyiivo yoohikhalla ni ottaphullella wiwa. ¹¹ Koma kahiidduwella ottaphullella wa ellotello enallotiweeyo, ayo enallota ellotellweeyo enaakhalle elleto wa miyaano navettho miyaano kinaakhalle mulleto wa alliwaayo. ¹² Vawi murimaanyu ori va waakhella emphaso dda Munepa, munaphwanella weeseesa ollipihella ophara mutteko va nnddo ddinakavihera omaka mpingo. ¹³ Vano muthu anallota ellotello ddoohidduwanyeya anaphwanella avekellelle emphaso yoottaphullella. ¹⁴ Vawi kaavekellaka mu ellotello ddoohidduwanyeya, munepaaka onnavekella koma maganizwaaka kheneeravo ello. ¹⁵ Vano kinaphwanella keere tini? Kineerovekella ni munepaaka nave kineerovekellattho ni maganizwaaka. Kineerowiipa ni munepaaka nave kineerowiipattho ni maganizwaaka. ¹⁶ Mwaamuthokozaka Mulluku m'mnepanive, athu amodda eneere "Amen*" mwawiidde mwawaakhullella othokoza wanyu yaahidduwella eyo munallotaanyu? ¹⁷ Naari oothokoza wanyu tti waphaama, athu amodda khenallipihiwa. ¹⁸ Kinamuthokoza Mulluku kaambiiwa kinnallota ellotello ddoohidduwanyeya wunchichi ohiyana ni nyuwaano attheene. ¹⁹ Koma m'mipingoni, weere okhalla phaama wa miyaano ollota mawu atthanu awiiweya phaama waahuddiha amodda ohiyana ni mawu 10,000 mu ellotello ddoohidduwanyeya. ²⁰ Asinnaka ni arokoraka muhinaganizaka wonanko anamwani. Mukhalleke wonanko anamwani ahinadduwella ello va yoonanara nave mukhalleke oowaraalla m'maganizoni mwanyu. ²¹ Mu mawu a Mulluku, moolembiwa wi, Apwiya, enallota wi, "Kineerollota wa athwaaka oyeella mu athu oollota ellotello ddoohidduwanyeya. Kineerollota oyeella mu eyano dda elleto, Koma naari kenre ddiidda athwaaka kheniiwellella." ²² Sika vano ollota mu ellotello ddoohidduwanyeya,tti echezindikiro wa athu oohikhulupilila, ohiri wa ookhulupilila. Nave yoollotella othenga wa Mulluku tti echezindikiro wa athu ookhulupilila, ohiri wa oohikhulupilila. ²³ Vano mpingo muttheene watthukumana vamodda nave arive muthu aamba ollota mu ellotello ddoohidduwanyeya nave athu oohikhulupilila apaalle athu amodda yavollowa,khellota wi nyuwaano tti allupa anepa? ²⁴ Koma arive muthu allotellaka nave athu oohikhulupilila apaalle athu amodda yavollowa, eneerovaanyihiwa ni ddittheddene eniiwiiwa. Nave eneeeroweeluziwa ni ddittheddene eniiwiiwa. ²⁵ Dda m'murimani mwanyu ddineerewuupullulliwa nave ekokhora omullapella Mulluku waakhullella wi, "Ddawoona Mulluku ari variyari vanyu!" ²⁶ nAsinnaka ni arokoraka, ella sika kinaakeemi. Mwaatthukumanaka wi muvekelleke, muthu mmodda okhalla ni nchipo, mmodda ni yoohuddiha, mmodda ni yawuupullulla yoovenyera wa Mulluku, mmodda ni othenga wa mu ellotello ddoohidduwanyeya navettho mmodda okhalla ni yoottaphullella nnddo. Erive ello enaphwanella ddikhalleke yoollipiha mpingo. ²⁷ Athu yaapaallaka ollota ellotello ddoohidduwanyeya, athu eelli apaalle ookikhwaranya araru enaphwanella attaphullelle ddinallotiwannddo. ²⁸ Nave aahikhallavo mmodda oottaphullella, vano ayo enallota ellotello ddoohidduwanyeya enaphwanella emaalle mu mpingoni nave elloteke ni murima wa Mulluku. ²⁹ Athu eelli apaalle araru ellotelle nave amodda yeeluze enallotiiwannddo. ³⁰ Koma mmodda arina va mutthukumanooyo aakhella othenga woovenyera wa Mulluku, oyo anallotooyo amaalle. ³¹ Vawi attheenenyu ttuuwora ollotella,mootiyerana, wi arive muthu ahuddere ni ollipihiwa murina. ³² Emphaso yoollotella enaphwanella elamulelliweke ni oollotooyo, ³³ kaambiiwa Mulluku khenapaalla wi hiyaano nikhalle oohitthopoowa Mulluku khanapaalla wi hiyaano nikhalle oohitthopoowa koma amurendelle. M'mipingoni ddittheddene dda athu a Mulluku. ³⁴ Atthiyana enaphwanella ehilloteke va mutthukumano. Khenaakhullelliwa ollota vawi moollikana ni malamulo* a Ayuda, ehilamulelleke. ³⁵ Yaapaallaka odduwella ello emoddeene, enaphwanella yaakoheke amamuniwa owaani. Tti ello yoowulliha muru mutthiyana ollota mumpingoni. ³⁶ Apaalle mawu a Mulluku yavenyenre wa nyuwaano? Apaalle yuuweelleni nyuwaanove? ³⁷ Muthu mmodda aaganizaka wi olliye tti namallotella* apaalle ookhalla ni emphaso ya Munepa Waweella, anaphwanella adduwelle wi kinuulembelleenyuni tti lamulo na Apwiya. ³⁸ Koma aahiiwellella yeella, olliyettho muhimwiiwellelle. ³⁹ Sika vano, asinnaka ni arokoraka, murimaanyu okhalleke va ollotella nave muhaahiihe ollota mu ellotello ddoohidduwanyeya. ⁴⁰ Erive ello enaphwanella yeeriweke moophwanellella ni mootthopoowa.