¹ Karana kita ampun janji-janji ini, hai nang tarkasih, marilah kita mambasuh awak kita matan sabarataan kacamaran awak wan roh sambil manyampurnakan kakudusan dalam takut lawan Allah. Sukacita Paulus ² Julunglah wadah gasan kami di hati ikam. Kami kada basalah ka siapa haja, kada marusak siapa haja, wan kada mangambil untung matan siapa haja. ³ Ulun kada baucap ini gasan manyalahakan ikam, karana sabalumnya, ulun sudah baucap ka ikam bahwa ikam ada dalam hati kami, gasan mati baimbai wan hidup baimbai. ⁴ Kayakinan ulun ganal atas ikam, kabanggaan ulun ganal tahadap ikam, ulun dipenuhi lawan panghiburan, ulun malimpah lawan sukacita dalam sabarataan kasusahan kami. ⁵ Bahkan, waktu kami sampai di Makedonia, awak kami kada mandapat katanangan, melainakan ta aniaya dari sagala sisi, yaitu bakalahian dari luar wan katakutan dari dalam. ⁶ Akan tatapi, Allah, nang mahibur urang nang putus asa, mahibur kami lawan kadatangan Titus. ⁷ Kada lawan kadatangannya haja, tatapi karana panghiburan nang maolahnya tahibur di dalam ikam, kaya nang inya kisahakan ka kami manganai kaganangan ikam, dukacita ikam, samangat ikam gasan ulun sahingga ulun magin basukacita. ⁸ Jadi, biarpun ulun sudah maolah ikam sedih karana surat ulun, ulun kada manyasalinya. Kalaupun uluh suah manyasalinya, nitu karana ulun malihat bahwa surat nitu menyedihkan hati ikam biarpun hanya satumat. ⁹ Wayahini ulun basukacita, bukan karana ikam basedih, tatapi karana ikam basedih gasan partobatan, karana ikam basedih sasuai lawan kahandak Allah sahingga ikam kada dirugiakan dalam hal apa haja oleh kami. ¹⁰ Sabab, kasadihan nang sasuai lawan kahandak Allah mahasilakan partobatan nang kada disasali wan mamimpin ka kasalamatan, Namun, kasadihan duniawai mahasilakan kamatian. ¹¹ Sabab, parhatiakanlah banyak banar kasedihan nang sasuai lawan kahandak Allah nitu manggawiakan gasan ikam kasungguhan nang ganal, pambuktian bahwa ikam kada basalah, sarik, takutan, kaganangan, samangat, wan pambalasan. Di dalam sagala hal, ikam sudah mambuktiakan bahwa ikam kada basalah dalam hal ini. ¹² Jadi, biarpun ulun manulis surat gasan ikam, hal nitu bukan gasan kapantingan urang nang babuat salah wan bukan jua gasan kapantingan urang nang disalahakan, tatapi supaya kasungguhan ikam tahadap kami dinyataakan gasan ikam dihadapan Allah. ¹³ Nitulah sabanya, kami tahibur. Di samping panghiburan kami nitu, kami labih basukacita atas sukacita Titus karana rohnya sudah disagarakan oleh ikam barataan. ¹⁴ Sabab, jika ulun suah mambangga-banggakan ikam ka Titus, ulun kada disupanakan. Namun, sabagaimana ikam mamadahakan sagala sasuatu ka ikam dalam kabanaran, kaya itu jua kabanggaan kami di hadapan Titus tabukti bujur. ¹⁵ Wan, kasih sayangnya tahadap ikam batambah, apabila inya mangingat kataatan ikam sabarataan, kaya apa ikam manyambut kadatangannya lawan takut wan gentar. ¹⁶ Ulun basukacita karana dalam sagala hal ulun baisi kayakinan di dalam ikam.