¹ Wan, bagawi baimbai lawan Sidin, kami jua mandorong ikam supaya kada manyia-nyiakan anugarah Allah. ² Sabab, Sidin bafirman: "Pada waktu Aku bakanan, Aku mandangar ikam, wan pada hari kasalamatan, Aku manolong ikam." ³ Kami kada maolah urang tasandung supaya palayanan kami kada dicela, ⁴ malainkan dalam sagala cara kami manunjukakan diri kami sabagai palayan-palayan Allah, awan katabahan dalam sabarataan pandaritaan, kasasakan, kasukaran, ⁵ pukulah, pamanjaraan, karusuhan, jerih payah, kada guring, kalaparan, ⁶ lawan penuh kemurniah, pangatahuan, kasabaran, kamurahan, Roh Kudus, kasih nang tulus, ⁷ pandiran nang bujur, kuasa Allah, sejata kabanaran di tangan kanan dan kiri, ⁸ kamuliaan wan kahinaan, caci maki wan pujian, dianggap sabagai penipu-penipu padahal kami bujur. ⁹ Kami kaya kada dikenal tapi terkenal; nang kaya nyaris mati, tatapi lihatlah, kami hidup; kaya urang nang dipukuli, tapi kada mati; ¹⁰ nang kaya badukacita, tatapi salalu basukacita, kami miskin, tatapi maolah urang lain sugih, kada baisi apa-apa, tatapi baisi sagala sasuatu. ¹¹ Kami sudah mambuka muntung kami ka ikam, hai urang Korintus, hati kami tabuka lebar. ¹² Ikam kada dibatasi oleh kami, tatapi ikam dibatasi oleh hati ikam saurang. ¹³ Wayahini, gasan balasan nang sama -- ulun baucap kaya lawan kakanakan ulun -- bukalah jua hati ikam lebar-lebar. Pasangan nang Kada Saimbang ¹⁴ Jangan jadi pasangan nang kada saimbang lawan urang-urang nang kada parcaya. Sabab, parsamaan apakah nang ada antara kabanaran wan kajahatan? Atawa, parsamaan apakah nang tadapat antara tarang lawan kadap? ¹⁵ Kasapakatan apakah nang dimiliki Kristus lawan Belial? Atawa, bagian apakah nang ada antara urang parcaya lawan urang nang kada parcaya? ¹⁶ Wan, kasapakatan apakah nang ada antara Bait Allah lawan barhala-barhala? Sabab, kita adalah Bait Allah nang hidup, kaya firman Allah, "Aku pacang badiam di dalam buhannya wan bajalan di antara buhannya, wan Aku pacang manjadi Allah buhannya, wan buhannya pacang manjadi umat-Ku." ¹⁷ "Karana nitu, kaluarlah ikam dari tangah-tangah buhannnya, wan bapisahlah," ujar Tuhan. "Wan, janganlah manjapai apa nang najis, maka Aku pacang manarima ikam." ¹⁸ "Wan, Aku pacang manjadi Bapa gasanikam, wan ikam pacang manjadi anak-anak-Ku lalakian wan anak-anak-Ku babinian," kayaitulah firman Tuhan nang mahakuasa.