¹ Karana kami tahu bahwa jika kemah, wadah badiamnya kita di bumi ini dirobohakan, kita baisi sabuah bangunan matan Allah, sabuah rumah nang kada diolah lawan tangan, nang kekaldi surga. ² Salawas kita ada dalam kemah ini, kita baaduh karana kita kaganangan gasan mamakai wadah kadiaman surgawi kita. ³ Sabab, waktu kita mamakainya, kita kada lagi batilanjang. ⁴ Salawas kita badiam dalam kemah ini, kita baaduh wan tababani karana kita kada handak tilanjang malainakan babaju supaya nang fana nitu ditaguk oleh hidup. ⁵ Wayahini, Sidin nang manyiapakan kita gasan tujuan ini adalah Allah, nang manjulung Roh gasan kita sabagai jaminan. ⁶ Karana nitu, kami salalu tabah wan manyadari bahwa waktu kami mandiami awak ini, kami barada di luar Tuhan. ⁷ Sabab, kami hidup oleh iman, bukan oleh panglihatan. ⁸ Akan tatapi, kami tabah wan labih nyaman badiam di luar awak ini lalu badiam lawan Tuhan. ⁹ Oleh karana nitu, kami bausah supaya kami bakanan gasan Sidin, entah kami badiam di dalam rumah ini atawa di luar. ¹⁰ Sabab, kita sabarataan harus dihadapakan di depan kursi pangadilan Kristus supaya satiap urang kawa manarima pulang hal-hal nang digawiakan dalam awaknya, sasuai lawan apa nang sudah digawiakannya, entah nitu baik atawa jahat. Palayanan Pandamaian matan Allah ¹¹ Karana kami tahu artinya takut lawan Tuhan, maka kami mayakinakan urang lain. Namun, kami sudah nyata gasan Allah wan ulun baharap nyata pula gasan hati nurani ikam. ¹² Kami kada bausaha lagi mamuji-muji diri kami ka ikam, tatapi kami mambari ikam kasampatan supaya bangga tahadap kami. Dengan damikian, ikam pacang baisi jawaban gasan buhannya nang bangga atas hal-hal lahiriah wan bukan atas apa nang ada dalam hati. ¹³ Jika kami kada jadi diri kami, hal nitu adalah gasan Allah. Jika kami jadi diri kami, nitu gasan kapantingan ikam. ¹⁴ Karana kasih Kristus manguasai kami waktu kami manyimpulakan bahwa jika saikung urang mati gasan sabarataan, maka buhannya sabarataan mati. ¹⁵ Wan, Sidin mati gasan sabarataan supaya buhannya nang hidup kada lagi hidup gasan diri buhannya saurang, malainkan gasan Sidin, nang sudah mati wan dibangkitakan gasan buhannya. ¹⁶ Karana nitu, matan wayahini kami kada pinandu saurang pun manurut kaadaan lahiriahnya. Walaupun kami suah pinandu lawan Kristus sacara lahiriah, tatapi wayahini kami kada lagi manilai Sidin kaya nitu. ¹⁷ Jadi, siapa nang ada di dalam Kristus, inya adalah ciptaan hanyar. Hal-hal nang lawas sudah balalu, lihatlah, hal-hal nang hanya sudah datang. ¹⁸ Sabarataan hal ini adalah matan Allah, nang mandamaiakan kita lawan diri Sidin malalui Kristus wan manjulung kita palayanan pandamian nitu, ¹⁹ yaitu dalam Kristus Allah mandamaiakan dunia lawan diri Sidin saurang, lawan kada mahitungakan dosa-dosa buhannya wan sudah mamparcayakan habar pandamaian ka kita. ²⁰ Jadi, kami adalah duta-duta Kristus. Allah manunjukakan panggilan Sidin malalai kami. Kami bapandir ka ikam demi Kristus, barilah diri ikam didamaiakan lawan Allah. ²¹ Sidin nang kada pinandu lawan dosa sudah diolah Sidin badosa karana kita supaya kita dibanarakan Allah di dalam Sidin.