¹ Wayahini, dingsanak-dingsanak, kami handak ikam tahu manganai anugrah Allah nang sudah dijulung ka jamaat-jamaat di Makedonia, ² bahwa dalam banyaknya ujian pandaritaan, kalimpahan sukacita wan kamisikinan buhannya sudah balimpah dalam kakayaan katulusan hati buhannya. ³ Ulun basaksi bahwa buhannya manjulung sasuai lawan kamampuan buhannya, bahkan malabihi kamampuannya atas karalaan buhannya saurang. ⁴ Buhannya mamohon banar ka kami akan anugrah gasan umpat ambil bagian dalam palayanan urang-urang kudus. ⁵ Wan, inilah nang buhannya gawi, lain nangkaya kami harapakan, partama-tama, buhannya manjulung diri buhannya saurang ka Allah, imbah tu ka kami oleh kahandak Allah. ⁶ Jadi, kami mandasak Titus, sabagaimana inya sudah mamulainya, kaya itu jua inya pacang manuntungakan gawian anugrah ini di antara ikam. ⁷ Namun, sama kaya ikam balimpah dalam sagala hal, dalam iman, pandiran, pangatahuan, sagala usaha wan dalam kasih ikam tahadap kami, harusnya ikam jua balimpah dalam anugrah ini. ⁸ Ulun kada baucap hal ini sabagai parintah, tatapi gasan mauji malalui kasungguhan urang lain manganai kaiklasan kasih ikam. ⁹ Sabab, ikam mangatahui anugrah Tuhan kita Yesus Kristus, bahwa walaupun Sidin sugih, Sidin rela jadi miskin demi ikam supaya malalui kamiskinan Sidin, ikam jadi sugih. ¹⁰ Wan,dalam hal ini ulun mambari pandapat ulun, hal ini adalah gasan kauntungan ikam, nang matan tahun lalu, ikam bukan hanya manggawinya, tatapi handak banar manggawinya. ¹¹ Jadi, wayahini, tuntungakan jua gawian nitu supaya sapadan lawan kaiklasan ikam gasan manuntungakan apa nang ada lawan ikam. ¹² Sabab, jika ada kasiapa mambari, pambarian nitu pacang disambut, badasarkan apa nang dimiliki saikung urang, wan bukan badasarkan apa nang kada dimilikinya. ¹³ Hal ini kada gasan maringanakan urang lain wan mambabani ikam, tatapi supaya ada kasaimbangan. ¹⁴ Biarlah kalabihan ikam wayahini mancukupakan kakurangan buhannya supaya kalabihan buhannya kawa mancukupakan kakurangan ikam. Dengan demikian ada kasaimbangan. ¹⁵ Sama kaya nang tatulis dalam Kitab Suci, "Urang nang mangumpulakan banyak kada balabihan wan urang nang mangumpulakan sadikit kada kakurangan." Pangutusan Titus ¹⁶ Namun, syukur gasan Allah nang manaruh dalam hati Titus kasungguhan nang sama lawan nang ulun miliki gasan ikam. ¹⁷ Sabab, Sidin kada hanay manarima anjuran kami, tatapi lawan kasungguhannya nang bujur-bujur, inya datang ka ikam atas kahandaknya saurang. ¹⁸ Baimbai Titus, kami mautus dingsanak nang dipuji-puji di antara sabarataan jamaat dalamhal mahabarakan injil. ¹⁹ Bukan nitu haja, inya jua ditunjuk oleh jamaat-jamaat gasan tulak baimbai kami dalam palayanan anugrah ini, nang kami gawi gasan mambawa kamuliaan gasan Tuhan wan gasan manunjukakan kaiklasan kami. ²⁰ Kami bahati-hati banar supaya kadada urang nang pacang mancala kami dalam hal palayanan nang diaturoleh kami ini. ²¹ Kami bausaha manggawi apa nang bujur, kada hanya dalam pandangan Tuhan, tatapi jua dalam pandangan manusia. ²² Wan, baimbai buhannya kami mautus dingsanak kami nang sudah rancak kami uji wan tabukti rajin dalam banyak hal, talabih lagi wayahini inya magin rajin karana inya baisi kayakinan nang bujur tahadap ikam. ²³ Wayahini manganai Titus, inya adalah pasangan wan kawan sagawian ulun nang pacang baguna gasan ikam. Sadangkan manganai dingsanak-dingsanak kita nang lain, buhannya utusan jamaat-jamaat, suatu kamuliaan gasan Kristus. ²⁴ Jadi, tunjukakanlah ka buhannya, dihadapan jamaat-jamaat bukti kasih ikam wan kabanggaan kami atas ikam.