¹ Lakadakoh, iko' mamparhati jangkah Anak Domba muka' nyiteng umpatn ijo' sigel dakoh, ge' iko' dangah nyungan umpatn makhluk dakoh nyansana nige' saratn da ulah guntur, "Kai!" ² Maka, iko' mile' nyungan kuda ranakng ge' ini' da unyung ka tumukng a' minte nyabuah panah; ge' nyabuah mahkota gatn mangkatn wa' ini', ge' ini' maju ya' ngalah a' ge' ngangkamanang. ³ Ge', jangkah Anak Domba dakoh muka sigel da kadua, iko' dangah makhluk da kadua nyansana, "Kai!" ⁴ Maka, majuta nyungan kuda laitn warna a' bajara' ulah apo api, ge' ini' d unyung ka tumukng a' gatn mangkatn kuasa ya' naap kadamaian umpatn bumi singge talino ao' saling ngamis, ge' nyabuah padang da ayho gatn mangkatn wa'ini'. ⁵ Ge' jangkah Anak Domba dakoh muka sigel da kataru, iko' dangah makhluk da kataru nyansana, "Kai! Maka, iko' mile' nyungan kuda itam ge' ini' da unyung ka tumukng a' minte nyabuah timbangan ka barekng a'. ⁶ Lalu, iko' dangah ulah ani saratn umpatn tuda'-tuda' kaampat makhluk dakoh nyansana, "Nyiteng cupak gandum ya' 1 dinar, ge' 3 cupak jelai ya' 1 dinar, tapi iya' ngarusak binyak ge' anggur a'!" ⁷ Ge', jangkah Anak Domba dakoh muka' sigel da kaampat, iko' dangah saratn makhluk da kaampat nyansana, "Kai!" ⁸ Maka, iko' mile' nyungan kuda warna a' ijo pucat ge' ini' da unyung ka tumukng a' bagaatn Maut ge' Hades nganang a'. Ge', kuasa da gatn mangkatn wa' ayoa' samo 1/4 bumi, ya' ngamis nige' padang, siburuk, panyakit, ge' binatang-binatang buas ka bumi. ⁹ Jangkah Anak Domba muka' sigel da kalima, iko' mile' ka saroh altar jiwa-jiwa ayoa' da laka gatn ngamis karna firman Jabata ge' karna kasaksian da lak ayoa' mampartahan. ¹⁰ Ayoa' ngampak nige' saratn da kuat, "Mani tuhi' agi' ai', Tuhan da kudus ge' taman, Imu' ao' nahan adup umpatn manghakim ge' mambalas daya' kai wa' ayoa' da madi' ka bumi?" ¹¹ Ge', wa' masing-masing jiwa dakoh gatn mangkatn nyabuah jubah ranakng ge' ayoa' gatn mangkatn pane bahwa ayoa' arus madi' sabantar agi', sampe jumlah kawan-kawan palayanan ge' age- age ayoa' da ao' gatn ngamis ulah ayoa' jadi ganap. ¹² Ge', iko' mile' jangkah Anak Domba dakoh muka' sigel da kaanam, tajadita gampa bumi da luar biasa; matuano jadi sungut ulah saput karong da gatn umas umpatn abok ge' saman-man buratn jadi ulah daya. ¹³ Ge', bintang-bintang ka rangit banjantu-jantu ka bumi ulah puutn ara ngugur buah a' da ante' waktu gatn nyaru da kuat nguncang a'. ¹⁴ Ge', batahta rangit samu ulah kitab da gatn ngulokng, ge' satiap gunung ge' pulo gatn nginsit umpatn tampat a'. ¹⁵ Maka, raja-raja ka bumi, ge' ayo pajabat, ge' perwira-perwira, ge' ayo sok kaya ge' bakuasa, ge' samaan budak, ge' sok bebas basukatn ka gua-gua ge' ka antara batu-batu ka pagunungan. ¹⁶ Ayoa' nyansana wa' gunung-gunung ge' batu-batu karang dakoh, "Ruruhmih ngantuk kai ge' nyukatn kai umpatn hadapan Ini' da unyung ka tumukng takhta, ge' umpatn pabaji' Anak Domba! ¹⁷ Sabab, hari besar ka pabaji' ayoa' nga utukng ge' asilah da aba' batahan?"