¹ Ngalaka dakoh, iko' mile' nyabuah pintu tabuka ka surga, ge' saratn ijah, da iko' dangah ulah mihu tarumpet nyansana nige'ko', damuji', "Makkalah ka diah ge' Iko' ao' ngadumu' mile' jai da arus tajadi ngalaka diah." ² Ano dakoh uga, iko' gatn Roh nguasa ge' milekta, nyabuah tahta ani ka surga ge' Sook unyung ka tumukng tahta dakoh. ³ Ge', Ini' da unyung ka tumukng tahta dakoh, tile' ulah batu permata yaspis ge' sardis; ge' ani nyabuah maraje ka kalilikng tahta dakoh, da tile' ulah zamrud. ⁴ Ka nyangkalilikng tahta dakoh ani dua puluh ampat tahta ge' ka tumukng tahta -tahta dakoh iko' mile' dua puluh ampat da ama-ama unyung, ngiak jubah ranakng ge' mahkota -mahkota berawatn ani katumukng abak ayoa'. ⁵ Ge', umpatn tahta dakoh mungkas kilat pate' ge' guhukng saratn guntur. Ge' , ani ijo' dian da idup ka tura' tahta dakoh, da anilah ijo' Roh Jabata. ⁶ Ge', ka tura tahta dakoh uga' ani nyabuah ulah laut kaca, ulah Kristal. Ka tuda' ge' kakalilikng tahta dakoh ani ampat mahluk da panhu nige' matu' ka bagian tura ge' buntot a'. ⁷ Mahluk da uru ulah nyungan singa, ge' mahluk da kadua nyungan lembu are, ge' mahluk da kataru bamuka ulah muka talino, ge' mahluk da ka ampat ulah manuk elang da agi' mibir. ⁸ Kaampat mahluk dakoh masing-masing ani umpu' inum arat da panhu nige' matu', bait pihikng sato atopun kasadatn a'; tano ge' ngarum , ka ampat mahluk dakoh kati' suah baranti nyansana, "Kudus, kudus, kudusta Tuhan, Jabata Da Mahakuasa, da nga ani, da ani, ge' da ao' utukng." ⁹ Ge' mani sidah mahluk dakoh mangkat kamuliaan, hormat, ge' ucap syukur wa' Ini' da unyung ka tumukng tahta, da idup salama-lama a', ¹⁰ kadua puluh ampat da ama-ama dakoh sujud ka hadapan Ini' da unyung ka tumukng tahta dakoh ge' menyambah Ini' da idup sampe salama-lama a' dakoh, ge' nyangkahatn mahkota ayoa' ka tura tahta dakoh gae nyansana, ¹¹ " Ai', Tuhan ge' Jabata kai, Imu' layak narima kamuliaan, hormat, ge' kuasa karna Imu' laka mencipta samaan tarutn ge' karna kahendakMu' samaan dakoh ani gatn mencipta."