¹ "Ge', wa' malaikat jemaat ka Sardis nulistalah: Diahta saratn Ini' da umpu' ijo' Roh Jabata ge' ijo' bintang dakoh: Iko' pane parbuatan-parbuatanmu'. Sok muji' bahwa imu' idup, tapi sabatola' imu' kabis. ² Waspadamih, ge' nguattalah hal-hal da masih ani, da hampir kabis, karna Iko' tinga amput pakarajemu' sempurna sadatn pandangan Jabata. ³ Karna dakoh, ingatta jai da laka imu' nyamut ge' dangah, taatmih kadakoh ge' bertobatmih! Sak imu' kati' waspada, Iko' ao' utukng ulah nyungan parangko ge' imu' kati' ao' pane jam mani Iko' ao' utukng wa'imu'. ⁴ Tapi ao'a, imu' ani umpu' nyamani sok ka Sardis da tinga ngutor pangiak ayoa'; ge' ayoa' ao' bajalatn samahu-Ko nige' ngiak pangiak ranakng karna ayoa' layak. ⁵ Sok da manang ao' gatnnakkat pangiak ranakng ge' Iko' kati' ao' ngapus gaatn a' umpatn Kitab Kahidupan. Iko' ao' ngako gaatn a' ka hadapan Sama'-Ko ge' kahadan malaikat-malaikat -A. ⁶ Ini' da umpu' rajak teaklah dangah jai da gatn Roh muji' wa' jemaat-jemaat." Surat wa' Jemaat ka Filadelfia ⁷ "Ge', wa' malaikat-malaikat jemaat ka Filadelfia nulistalah: Diahta saratn umpatn Da Kudus ge' Da Taman, da minte kunci Daud , da muka ge' kati' nyunganpun kaatn nutup a'; ge' nutup kati' ani nyunganpun kaatn muka'a': ⁸ Iko' pane parbuatan-parbuatanmu'. Mile'ta, Iko laka muka' pintu ya' dimu' da kati' nyunganpun kaatn nutup a' karna tenagamu inek, tapi imu' laka taat wa' firman-Ko ge' kati' nyangkal gaatn-Ko'. ⁹ Mile' ta, Iko' ao' umas ayo sinagoge Balis dakoh, da ngako sebage sok Yahudi, tapi da sabanara inya, tapi laceh a', Iko' ao' umas ayoa' utukng ge' sujud wa' kajakmu', ge' umas ayoa' pane bahwa Iko' sayang kaimu'. ¹⁰ Karna imu' laka ngadipatn firman ketekunan-Ko, Iko' ao ngadipatnmu' umpatn masa da susah da ao' utukng ka samaan-man dunia, ya' nguji ayoa' da madi' ka bumi. ¹¹ Iko' ao' sacapat a' utukng. Minteta jai da imu' umpu' supaya kati' nyunganpun ao' naap mahkotamu'. ¹² Ini' da manang, Iko' ao' ngadua' jadi tiang panyamok Bait Suci Jabata-Ko, ge' ini' kati' ao' anu agi' umpatn dakoh; ge' Iko' ao' nulis wa' ini' gaatn Jabata-Ko ge' gaatn kota Jabata-Ko, kohta Yerusalem da bahu, da dakoh disah umpatn surga, umpatn Jabata-Ko, ge' gaatn-Ko da bahu. ¹³ Ini' da umpu' rajak tea'lah dangah jai da gatn Roh muji' wa' jemaat-jemaat ka Laodikia ¹⁴ "Ge', wa' malaikat jemaat ka Laodikia nulistalah: Diahta saratn Sang Amin , saksi da setia ge' taman, pamule umpatn samaan ciptaan Jabata: ¹⁵ Iko' pane parbuatan-parbuatanmu' , bahwa imu' kati' panut atopun paras. Bait ata sak imu' panut ato paras. ¹⁶ Jadi, karna imu' angat, kati' paras atopun panut, Iko' ao' ngaramu' umpatn baba'-Ko. ¹⁷ Karna imu' nyansana, ' Iko' kaya, marabeh-abeh, ge' kati' kakurangan jai-jai, ge' iko' kati' pane bahwa sabatola iko' sengsara, malang, papa, buta, ge' ugakng. ¹⁸ Iko' nasehatmu' ya' mari umpatn Iko' berawatn , da gatn marasih nige' api supaya imu' jadi kaya, ge' pangiak-pangiak ranakng supaya imu' kaatn ngiak singge rasa mangun karna ugakngmu kati' ao' tile', ge' ngoles salep ka matumu' supaya imu' kaatn mile'. ¹⁹ Ayoa' da Iko' nyayang, Konagor, ge' Kongajar; karna dakoh atemu arus rela ge' bertobatmih! ²⁰ Mile'mih! Iko' agutn ka tura pintu ge' ngatok. Sak ani sok dangah saratn-Ko ge' muka pintua', Iko' ao' maruh waini' ge' uman samahua', ge' ini' samahu-Ko. ²¹ Ini' da manang, Iko' ao' ngizina' unyung samahu-Ko ka tahta-Ko, samu ulah IKo laka manang ge' unyung samahu Sama-Ko ka tahta-A. ²² Ini' da umpu' rajak teaklah dangah jai da gatn Roh muji' wa jemaat-jemaat."