¹ " Wa' malaikat jemaat ka Efesus nulistalah: diahta saratn Ini' da minte ijo' bintang ka barekng sentao'-A ge' bajalatn ka antara ijo' kaki dian berawatn dakoh: ² Iko' pane samaan pakarajemu' ge' susah payahmu' ge' katekunanmu', langkina imu' kati' tahan tarhadap da jahe', ge' imu' nguji ayo sok da muji' adup a' rasul, tapi da sabanara ayoa' inyata rasul, ge' amput ayoa' palsu. ³ Imu' ani umpu' katekunan ge' bartahan demi gaatn-Ko ge' kati' kanal lalah. ⁴ Tapi ao'a , Iko' nagormu' karna imu' laka ngagatn kasihmu' da mule-mule a'. ⁵ Karna dakoh, ingatta umpatn dume imu' jantu ge' batobat gae umas jai da laka imu' ngaraje umpatn mulea. Sak kati', Iko' ao' utukng wa' imu' ge' naap kaki dianmu' umpatn tampat a', kacuali imu' batobat. ⁶ Tapi ao'a, diah da imu' umpu': imu' rusi' ge' parbuatan-parbuatan ayoa' da nganang Nikolaus, da uga Ko rusi'. ⁷ Ini' da umpu' rajak teaklah dangah jai da gatn Roh muji' wa' jemaat-jemaat. Wa' ini' da manang., Iko' ao' mangkatn a' uman umpatn Puutn Kahidupan da ani ka Taman Jabata." Surat wa' Jemaat ka Smirna ⁸ "Ge', wa' malaikat jemaat ka Smirna nulistalah: Diahta saratn umpatn Da Pamule ge' Da Pangkabas, da laka kabis ge' idup agi': ⁹ Iko' pane kasusahanmu' ge' kamiskinanmu', tapi sabatola imu' kaya! Iko pane fitnah da gatnnuduh wa'imu' da muji' adup a' sok Yahudi, tapi sabanara inya, malahan dakoh sinagoge Balis. ¹⁰ Iya' buut tarhadap jai da ao' imu' derita. Ile'ta, sitan ao' nyangkahatn nyamani umpatn imu' ka panjara supaya imu' gatnuji, ge' imu' ao' marisa panganyayaan tuhi a' 10 ano. Setia mih sampe kabis, ge' Iko' ao' mangkatn imu' mahkota kaidupan. ¹¹ Ini' da umpu' rajak tea'lah dangah jai da gatn Roh muji' wa jemaat-jemaat. Sok da manang kati' ao' manderita gatn pangkabis da kadua." Surat wa Jemaat ka Pergamus ¹² " Ge', wa' malaikat jemaat ka Pergamus nulistalah : Diahta saratn Ini' da umpu' padang ruja' da bamatu' dua: ¹³ Iko' pane kadume imu' madi', ka tampat tahta Balis madi; tapi imu' bajinte wa' gaatn-Ko ge' kati' nyangkal iman-Ko bahkan ka zaman Antipas, saksi-Ko da setia da gatn ngamis ka antaramu', tampat Balis madi'. ¹⁴ Namun, Iko' nagormu' karna ani nyamani ka antaramu' da nganang ajaran Bileam, da ngajar Balak ya' mana' panyingkak ka tura anak-anak Israel, ya' uman pangkuman da gatn mampersambah wa berhala ge' umas duse-duse seksual. ¹⁵ Ladakoh uga, ani nyamani ka antaramu' da bajinte ka ajaran Nikolaus. ¹⁶ Karna dakoh, batobatmih! sak kati', Iko' ao' capat utukng wa' imu' ge' nyarang ayoa' nige' padang umpatn baba-Ko. ¹⁷ Ini' da umpu' rajak teaklah dangah jai da gatn Roh muji' wa' jemaat-jemaat. Wa' ini' da manang, Iko' ao' mangkatn a' manna da gatn nyukatn; ge' Iko' ao' mangkatn wa' ini' nyabuah batu ranakng, ge' nyabuah gaatn bahu tatulis ka batu dakoh, da kati' nyunganpun panane kacuali sok da nyamut a'." Surat wa Jemaat ka Tiatira ¹⁸ "Ge', wa' malaikat jemaat ka Tiatira nulistalah: Diahta saratn Anak Jabata, da matu'-A ulah apo api ge' da kaja'-A mara ulah tamaga sadatn tungko: ¹⁹ Iko' pane parbuatan-parbuatanmu', kasih ge' imanmu', palayananmu', ge' kesabaranmu', bahwa pakaraje-pakarajemu' da pangkabasa' marabeh-abeh umpatn da uru. ²⁰ Namun, Iko' nagormu' karna imu' mambiar mahung Izebel dakoh, da ngako sebage nabiah, ngajar ge' nyasat palayan-palayan-Ko supaya babayu ge' uman pangkuman da laka gatnmampersembah wa' berhala. ²¹ Iko' laka mangkatn a' waktu ya' bertobat, tapi ini' kati' ituh bertobat umpatn babayu a'. ²² Mile'ta, Iko ao' nyangkahatn ini' ka tumukng tampat pabuus penderitaan ge' ayoa' da babayu' nige' ini' ao' gatn nyangkahatn ka sadatn kasusahan ahyo, kacuali ayoa' bertobat umpatn parbuatan-parbuatan mahung dakoh. ²³ Ge', Iko' ao' ngamis anak-anak a' nige' pangkabis; ge' samaan jemaat ao' pananea' bahwa Ikotalah da nguji pikir ge' ate sok, ge' Iko' ao' mangkatn waimu' masing-masing sasue nige' parbuatanmu'. ²⁴ Namun, wa' imu' da laitn ka Tiatira, da kati' nganang ajaran diah, da tinga pane rasia-rasia Balis, Iko muji a': Iko kati' ao' mana' beban laitn ka tumukngmu'. ²⁵ Tapi ao'a, bajintemih terus ka jai da laka imu' umpu' sampe Iko' utukng. ²⁶ Ge' wa' sok da manang ge' da umas karaje-karaje-Ko sampe abas, Iko' ao' mangkatn a' kuasa samo bangsa-bangsa, ²⁷ ge' ayoa' ao' memerintah bangsa-bangsa dakoh nige' tungkat basi, gatnngancur bakapikng-kapikng ulah tambikar tukang pariok, karena Iko' uga laka nyamut kuasa umpatn Sama-Ko. ²⁸ Ge', Iko' ao' mangkatn waini' bintang timur. ²⁹ Ini' da umpu' rajak tea'lah dangah jai da gatn Roh muji' wa' jemaat-jemaat."