¹ Karna Hukum Taurat hanya umpu' gaya tantang hal-hal bait da ao' utuk'ng ge' inya gambar da sasungguh'a' umpat'n hal-hal dakoh, maka nige' korban-korban da samu, da ayo'a' mamparsambah tarus-tarusan nyatiap taun, hukum dakoh kati' ao' suah kaat'n nyampurna ayo'a' da ao' utuk'ng ngajiket. ² Sak sabalik'a', inyata pamangkat parsambahan saharus'a' nga kati' agi' da umas karna nyakali gatn nyuci, ayo sok da baribadah dakoh kati' agi' misa ani'a' kasadaran ka duse? ³ Ao' tatapi, sadat'n parsambahan korban dakoh, ayo'a' malah gat'n ngingat ka duse-due ayo'a' umpat'n taun ka taun. ⁴ Sabab, daya' lembu are ge' kambing are kati' mungkin kaat'n ngapus duse. ⁵ Karna dakoh, waktu Kristus utuk'ng ka sadat'n dunia, Ini' muji, " Korban ge' parsambahan kati' Imu' ngingin, tatapi nyungan ungan laka Imu' nyiap bagi-Ko; ⁶ Imu' kati' suka ka korban da gat'n ninu' ge' korban pangapus duse. ⁷ Lalu Iko muji', "Diah ta Iko: Ani gat'n nulis tantang Iko sadat'n gulongan kitab, Iko utuk'ng ya' umas kahandak-Mu', ai' Jabata." ⁸ Laka Kristus ngamuji' , " Korban ge' parsambahan , sarta korban da di ninu' ge' korban pangapus duse kati' Iko ngingin, ge' kati' bakenan ka Imu'" ( da sasue nige' Hukum Taurat). ⁹ Ini' nganambah'a', "Diah ta Iko. Iko utuk'ng ya' umas kahandak-Mu'." Jadi, Yesus ngangapus ta da partama ya' natap da kadua. ¹⁰ Kat kahandak-A, ite' gat'n ngudus nabo' pangurbanan ungan Yesus Kristus, nyakali ya' salama-lama'a'. ¹¹ Satiap imam umas palayanan ano'a' umpat'n waktu ka waktu ya' mamparsambah korban da samu', da kati' suah kaat'n ngapus duse; ¹² tatapi Kristus, ngalaka mamparsembah korban karna duse, nyakali sadi' ya' salama-lama'a', Ini' unyung ka sabalah sentao' Jabata ¹³ ge' nganti waktu ayo munsuh-A gat'n jadi alas kaja'-A. ¹⁴ Nige' nyungan korban, Kristus nyampurna ayo'a' da laka gat'n Ni' nyuci ya' salama-lama'a'. ¹⁵ Roh Kudus uga ngajadi saksi ya' ite' tantang hal diah sabab ngalaka damuji', ¹⁶ "Diah ta parjanjian da ao' Ko umas nige' umat-Ko ngalaka masa dakoh, sarat'n Tuhan: " Iko' ao' napo' hukum-hukum-Ko sadat'n ate ayo'a', ge' Iko' ao' nganulis'a' sadat'n pikiran ayo'a'," ¹⁷ Laka dakoh, Ini' ngalanjut'a', "Iko ao' ngarimut duse-duse ayo'a' ge' kati' ao' ngingat agi' kajahatan ayo'a'." ¹⁸ Mati', waktu pangampunan bagi samaan'a' dakoh laka gat'n nyadia, maka kati' gat'n palalu agi' korban ya' nabos duse. Ngajiket ta ka Jabata ¹⁹ Sabab dakoh, ayo ageko', karna mati' ite' umpu kabaranian ya' maruh ka sadat'n Uhang Mahakudus kat pangorbanan daya' Yesus, ²⁰ nige' gala' da bahu ge' da idup, da laka gat'n muka kat Yesus bagi ite' nabo' muliam , koh ta ungan-A, ²¹ ge' karna ite' nga ani nyungan Imam Ayho da ngapalai ramin Jabata, ²² maka kailah ite' ngajiket ka Jabata nige' ate da tulus sadat'n kayakinan iman da panhu, nige' ate ite' da laka ngabarasih umpat'n nurani da jahe', ge' ungan da laka gat'n nyuci nige' paint murni. ²³ Kai ite bajinte ka pangako pangharapan ite' karna Jabata da ngajanji'a' anilah setia, ²⁴ kai ite nyajo cara ya' kaat'n saling nyurong sadat'n nganyayang ge' mangaraje pabulah-pabulah da bait, ²⁵ ge' usahlah ngajauh adup umpat'n partamuan ibadah ite' da samahu, ulah da gat'n biasa ta kat mani ungan sok. Ao'a', kailah ite' saling nguat age, marabeh agi' karna imu' pane Ano Tuhan ngamangkin jiket. Usah Ngalawan Jabata ²⁶ Sabab, sa' nige' sangaja te' tatap umas duse sak laka kaat'n pangatahuan tantang da taman, maka kati' ani agi' korban ya' ngapus duse-duse dakoh. ²⁷ Da ani ta panganti da ngabuut ao' panghakiman ge' mara api da ao' ngabinasa ayo munsuh jabata. ²⁸ Badampar ka kasaksian umpat'n dua ato taru ungan saksi, asipun da kati' taat ka Hukum Musa ao' kabis kati' kaat'n pamase'. ²⁹ Sak ladakoh, batapa rabeh bahat'a' pangukuman da layak gat'n narima kat sok da nginyak-nginyak Anak Jabata, ge' da nganggap najis daya' parjanjian da laka ngudus'a', ge' da manghina Roh anugerah Jabata? ³⁰ Sabab, ite' manganal Ini' da muji', " Pambalasan anilah hak-Ko; Iko ao' nuntut pambalasan." Ini' uga muji', " Tuhan ao' ngakim umat-A." ³¹ Batapa ngeri ta sak ite' jantu ka sadat'n barek Jabata da idup. Piara ta Kabaranian ge' Kasabaran ³² Ao tatapi , ngingatlah ano-ano da nga lewat, sak laka imu' kat'n pangaratian, imu' batahan sadat'n parjuaganmu' nanggong panderitaan da bahat. ³³ Takadang, imu' gat'n hina ge' gat'n nyanya sacara tabuka ka tura sok da karah, ge' takadang imu' uga' nganang ka sadat'n panderitaan ayo sok da gat'n palaku samu dakoh. ³⁴ Imu' uga mangkat'n pamase' ka ayo'a' da ka panjara, bahkan da narima nige' sukacita waktu harta da mu' umpu gat'n nangkap karna imu' pane bahwa imu' nga ani harta da rabeh bait ge' kekal. ³⁵ Karna dakoh, usahlah mu' matat'n kayakinanmu' karna kayakinanmu' dakoh mangkutuk'ng pahala da ahyo. ³⁶ Sabab imu' mambutuh katakunan ya' umas kahendak Jabata singga imu' kaat'n jai da gat'n Tuhan janji. ³⁷ Sabab, " Kati' tuhi' agi' , Ini' da ao' utuk'ng , ao' sampe, ge' kati' ao' gatn nanggoh. ³⁸ Tapi, sok-Ko' da taman ao' idup kat iman. Ge', sak ni' ngundur karna buut, maka jiwa-Ko kati ao' bakenan kaini'." ³⁹ Ite' inyalah ayo sok da ngundur ka kabinasaan, ngalait'n ayo sok da baiman ka da miara jiwa.