¹ Sa', Saulus, gae narus umas ancaman ge' pangamis tradap murid-murid Tuhan, anu manghadap Imam da Aihyo, ² ge' mahi surat umpat'n'a, da gat'n'a nujo ka sinagoge-sinagoge wak Damsyik sahingga sa' ini' amput asi saja da pacaya ka pagala dakoh, bait are atopun mahu, ini' kaat'n minsakng ayo'a yak nyambaleh wak Yerusalem. ³ Salama ini' sadakng bajalat'n, ini' samangkin riket nige Damsyik, ge' tiba-tiba suatu cahaya umpat'n rangit mamancar kalilikng'a. ⁴ Lalu, ini' jantu ka tana' ge' dangah sarat'n da nyansana ka ini', "Saulus, Saulus, nyai imu' nganiaya Iko'?" ⁵ Saulus mansikat'n, "Asi ta Akup'm, Tuan?" Ge', Ini' nyansana, "Iko'lah Yesus, da imu' aniaya. ⁶ Tapi aok'a, umpat ge' maruhlah ka kota, ge' imu' aok gat'n mangkat'n pane jai da arus imu' bulah." ⁷ Ayo-sok da anu samahu nige Saulus agut'n tanpa nyansana-sana ngalaka dangah sarat'n dakoh, tapi kati mile asi pun. ⁸ Saulus agut'n umpat'n tana', ge' maskipun matu'a tabuka, ini' kati mile jai-jai. Maka, ayo-sok dakoh manuntun'a nige barekng ge' minsakng'a maruh ka Damsyik. ⁹ Ge', salama taru ano, Saulus kati kaat'n mile ge' uga kati uman ato nyucur. ¹⁰ Pas waktu dakoh, ani sook murid wak Damsyik bagaat'n Ananias. Tuhan nyansana ka ini' ka sadat'n nyabuah pamile, "Ananias!" Maka, Ananias nyansana, "Ini' iko', Tuhan." ¹¹ lalu, Tuhan nyansana ka ini', 'Umpat ge' anulah ka pagala da gat'n nyabut Lurus, ge' wak ramin Yudas, najolah sok Tarsus da bagaat'n Saulus barang, milelah, sok dakoh sadakng badoa, ¹² ge' ini' laka kaat'n nyabuah pamile kalo sook bagaat'n Ananias utukng ge' numpang barekng ka samo'a supaya ini' bisa mile agi." ¹³ Barang, Ananias naham, "Tuhan, iko' laka dangah umpat'n karah sok tentang sok diah, batapa karah'a kajahatan da laka ini' bulah tradap umat kudus-Mu' wak Yerusalem, ¹⁴ ge' wak teet'n ini' umpu kuasa umpat'n imam-imam kapala yak nyambaleh samaan sok da maba gaat'n-Mu." ¹⁵ Tapi aok'a, Tuhan nyansana ka ini', "Anulah barang sok diah diu'ta alat da ko'pilih yak minsakng gaat'n-Ko' ka hadapan bangsa-bangsa lait'n, ge' raja-raja, gae bangsa Israel. ¹⁶ Sa', Iko' aok nujo ka ini' batapa karah'a ini' arus manderita demi gaat'n-Ko'." ¹⁷ Maka, Ananias barangkat ge' maruh ka ramin dakoh, ge' ngalaka mana' barekng'a ka samo Saulus, ini' nyansana, "Age Saulus, Tuhan Yesus, da nampak adup ka imu' ka sadat'n pajalat'nmu' ka diah, laka ngutusko' supaya imu' kaat'n mile agi ge' gat'n ngampahnu nige Roh Kudus." ¹⁸ Lalu, jangkah dakoh uga, tarut'n ulah sisik-sisik ikat'n jantu umpat'n matu'a ge' ini' kaat'n mile agi. Lakadakoh, ini' umpat ge' gat'n baptis. Saulus mule Mambrita tentang Yesus ¹⁹ Ge', ngalaka uman, Saulus gat'n nguat. Ini' samahu murid-murid wak Damsyik salama mani ano. ²⁰ Ge', japat ini' nyarita Yesus wak sinagoge-sinagoge nige nyansana, "Yesus diu'ta Anak Jabata." ²¹ Samaan sok da dangah'a takjub ge' nyansana, "Inya ini' diah da ani wak Yerusalem ngamis ayo'a da nyabut gaat'n dakoh ge' laka utukng ka diah nige maksud minsakng ayo'a ka sadat'n kaadaan nyambaleh ka tura imam-imam kapala?" ²² Tapi aok'a, Saulus jadi samangkin kuat ge' mambingung ayo-spk Yahudi da madi wak Damsyik nige mambuktikan kalo Yesus diu'ta Kristus. Saulus Lolos umpat'n mani ungan sok Yahudi ²³ Ngalaka ganap mani ano, ayo-sok Yahudi basakongkol samahu yak ngamis Saulus, ²⁴ tapi pasakongkolan ayo'a dakoh laka gat'n panane uleh Saulus. Ayo'a ngawas pintu-pintu garbang tano ge' ngarum supaya ayo'a kaat'n ngamis'a. ²⁵ Tapi aok'a, murid-murid Saulus minsakng'a pas waktu ngarum ge' ngadisah'a ka saroh wak sadat'n nyabuah karanjang. Saulus wak Yerusalem ²⁶ Jangkah Saulus utukng wak Yerusalem, ini' nyoba yak bagabung nige ayo murid. Tapi aok'a, ayo'a samaan buut ka ini' barang kati pacaya kalo ini' diu'ta murid. ²⁷ Sa', Barnabas nyinte Saulus ge' minsakng'a ka ayo rasul, lalu nyarita ka ayo'a langkina ini' laka mile Tuhan ka sadat'n pagala, ge' kalo Tuhan laka nyansana ka ini', gae langkina ini' nige pagat'n laka nyansana ka sadat'n gaat'n Yesus wak Damsyik. ²⁸ Ge', Saulus samahu-mahu ayo'a jangkah ayo'a maruh ge' mungkas umpat'n Yerusalem gae nyansana nige pagat'n ka sadat'n gaat'n Tuhan. ²⁹ Ge' nyansana ge' badebat nige sok Helenis, tapi ayo'a barusaha ngamis'a. ³⁰ Jangkah ayo-age saiman pane hal diah, ayo'a minsakng'a disah ka Kaisarea ge' ngutus'a ka Tarsus. ³¹ Barang dakoh, jamaat wak samaan Yudea, ge' Galilea, ge' Samaria kaat'n dame ge' batumbuh. Ge', idup ka sadat'n buut aok gat'n Tuhan ge' ka sadat'n panghiburan Roh kudus, ayo'a malar batambah karah. Petrus wak Kota Lida ge' Kota Yope ³² Pas waktu dakoh, saat petrus kalilikng samaan rapo dakoh, ini' uga mangunjung ayo-sok kudus da madi wak Lida. ³³ Wak teet'n, ini' kaat'n sook da bagaat'n Eneas, da laka gurik wak tampat pabuus'a salama mahi'taun barang ini' lumpuh. ³⁴ Lalu, Petrus nyansana ka ini', "Eneas, Kristus Yesus da ngangkawhat'nmu'. Umpatmih ge' da ngamas ta tampat pabuusmu'!" Ge', angkah dakoh uga, Eneas umpat. ³⁵ Maka, samaan sok da madi wak Lida ge' Saron mile'a ge' ayo'a babalik ka Tuhan. ³⁶ Angkah dakoh, wak Yope, ani sook murid da mahu bagaat'n Tabita, da sa' gat'n nerjemah barati Dorkas. Ini' pahnu nige parbuatan bait ge' mangkat'n sadakah. ³⁷ Pas ano-ano dakoh tarjadilah, ini' anap'm ge' kabis. Lalu, jangkah ayo-sok laka mamu'a, ayo'a magurikng'a wak uhakng samo. ³⁸ Barang Lida bariket Yope, ayo murid, ngalaka dangah kalo Petrus madi wak teet'n, ngadu dua ungan ka Petrus ge' mahi ka ini', "Iya' nangoh anu ka tampat kai'!" ³⁹ Maka, Petrus agut'n ge' anu samahu ayo'a. Ge', ini' nyampe, ayo'a minsakng Petrus ka uhakng samo. Samaan janda agut'n wak suut'n Petrus gae munse, gae nujo tunik-tunik ge' pangiak-pangiak lait'n'a da biasa'a gat'n umas uleh Dorkas jangkah ini' masih samahu nige ayo'a. ⁴⁰ Tapi, Petrus ngadu ayo'a samaan mungkas, lalu balutut ge' badoa. Laka dakoh, ini' bapaling ka mayat Tabita ge' ini' nyansana, "Tabita, umpatmih!" Lalu, mahu dakoh muka matu'a ge' jangkah ini' mile Petrus, ini' unyung. ⁴¹ Maka, Petrus nyinte barekng ka ini' ge' nulokng'a agut'n. Laka dakoh, gae maba ayo-sok kudus ge' ayo janda, ini' nujo kalo Tabita idup. ⁴² Ge', kajadian dakoh tasabar wak samaan Yope, ge' karah sok pacaya ka Tuhan. ⁴³ Maka, Petrus madi cukup tuhi wak Yope samahu sook bagaat'n Simon, sook panyamak kurit.