¹ Waktu dakoh, ka Kaisarea, ani nyungan sok da bagaatn Kornelius, nyungan parwira umpatn jai da kat magaatn pasukan Italia, ² sok saleh da buut ka Jubata, samu dakoh uga ge' samaan sok da ani ka ramin'a, ge' da mangkatn karah sadakah ka ayo sok ge' da malar badoa ka Jubata. ³ Ani nyakali waktu ngarami, kira-kira jam sambilan ano dakoh, ini' mile' nige' jalas sadatn nyabuah pamilek, ani nyungan malaikat Jabata utukng ge' muji' ka ini', "Kornelius!" ⁴ Lalu, ini' nyantunung malaikat dakoh nige' buut ge' muji', "Jai diah, Tuan?" Ge', malaikat dakoh muji' ka ini', "Doa-doamu' ge' sadakah-sadakahmu' nga makka sabage paringatan ka hadapan Jabata. ⁵ Mati', ngadulah ayo sok ka Yope ge' mabak ta sook da bagaatn Simon, da uga gaatn mabak Petrus, ⁶ Ini' madi' samahu nige' nyungan panyamak kurit da bagaatn Simon, da ramin'a ani ka tapi laut. ⁷ Waktu malaikat da laka nyansana ka ini' boho, Kornelius maba' dua palayan'a ge' nyungan prajurit da saleh umpatn antara ayo sok da mar malayan kapalaluan adup'a, ⁸ ge laka manjalas jai pun ka ayo'a ini' ngadu ayo'a anu ka Yope. ⁹ Jakkap ano'a, waktu ayo'a agi sadatn paranu'a ge' ngajiket ka kota dakoh, Petrus maka ka samo aro ramin, kira-kira jam inum, ya' badoa. ¹⁰ Lalu, ini' misa siburuk ge' ngate uman, tapi waktu ayo sok agi nyiap pangkuman, Petrus kaatn nyabuah pamile', ¹¹ ge ini' mile' rangit tabuka ge' ani da ulah saput da aso ata disah ge' tasulor umpatn ka ampat pitok'a sampe ka tana. ¹² Kasadatn'a, ani bamacam binatang da bakaja' ampat, ge binatang da ngaragayap ka tana paitn ge' manuk-manuk da ka nyaru. ¹³ Lakadakoh, utukng ta saratn da muji' ka ini', "Umpatlah, Petrus, sambaleh ta ge' uman ta!" ¹⁴ Tapi, Petrus muji', "kati' Tuhan. Sabab, iko kati' suah uman jai pun da haram ato najis." ¹⁵ Ge', saratn dakoh muji' agi ka ini' da kadua kali'a, "Jai da laka Jabata ngudus, iya' nyakali-kali imu' muji' haram." ¹⁶ Hal diah tajadi taru kali, ge' takana samaan dakoh tarantatn ka rangit. ¹⁷ Waktu dakoh, samantara Petrus masih baga-baga mikir jailah rati pamile' da laka gatn ile' dakoh, tilek ta ayo sok da Kornelius ngutus sadang najo kadume ramin Simon, gae agutn ka tura pintu garbang, ¹⁸ ge' gae maba', ayo'a mansikatn anita Simon, da gatn muji' Petrus, manumpang ka teetn. ¹⁹ Samantara Petrus agi ngarenung pamile' dakoh, Roh muji' kaini', "Mile' ta, ani taru ungan are da agi najomu'. ²⁰ Umpat ge' disahlah, anuta ge' ayo'a usah ragu karna Iko ta da ngutus ayo'a." ²¹ Lalu, Petrus disah ka ayo sok dakoh ge' muji', "Mile', iko' ts sok da mu' najo. Jai alasan pajutukngmu'?" ²² Ayo'a muji', "Kornelius, nyungan perwira, sok da taman ge' da buut ka Jabata, da gatn kenal bait ka antara bangse Yahudi, da malaikat kudus nyanuut ya' ngadumu' utukng karamin'a ge' ya' ngadangah saratnmu'." ²³ Petrus ngundang ayo'a maruh ge' mangkatn ayo'a tumpangan ka dakoh. Jakkap ano'a, ini; umpat ge anu samahu ayo'a, ge' mani ungan age nyaiman umpatn Yope namahi'a. ²⁴ Ka nyano'a agi', ayo'a maruh ka Kaisarea. Kornelius nganganti-anti ka ayo'a ge laka ngubu' ayo age'a uga ayo kawan'a da jiket ka ini'. ²⁵ Waktu Petrus maruh, Kornelius notok'a, lalu balutut kakaja' Petrus ge' nyambah'a. ²⁶ Tapi, Petrus mambantu'a agutn gae muji', "Agutn ta! Iko hanya talino biasa uga," ²⁷ Samantara Petrus nyansana nige' Kornelius, Petrus maruh kasadatn ge' amput karah sok da bakumpul basamu. ²⁸ Lalu, Petrus muji' ka ayo'a, " Imu' pane bahwa anita pari ka sok Yahudi sa' bagaul ato ngunjung sok da inya Yahudi, tapi Jabata laka mangkatn tande ka iko' bahwa iko' kati' saharus'a magaatn asipun haram ato najis. ²⁹ Dakohta sabab'a, iko' kati' kabaratan waktu imu' ngadu iko utukng. Karna dakoh, iko mansikat ya' alasan jai imu mabakko?" ³⁰ Ge', Kornelius muji', "Ampat ano da idu sampe jam diah, pas jam sambilan, iko agi badoa karaminko', ge milek ta, ani sook agutn ngiak pangiak da bakilauan. ³¹ Lalu, nyansana, 'Kornelius, doamu' ngalaka gatn dangah ge' sadakahmu' laka gatn ngingat ka hadapan Jabata. ³² Oleh karna dakoh, ngadulah ka Yope ge' mahilah Simon da gatn muji' Petrus ya' utukng. Ini' agi' manumpang ka ramin Simon, nyungan panyamak kurit, ka tapi laut.' ³³ Karna dakoh, iko capat-capat ngadu sok kaimu', ge' imu' laka bait ate ituh utukng. Mati', ite' samaan ani kadiah, kahadapan Jabata ya' ngadangah jai-jai da nga gatn Tuhan ngadu kaimu'." Petus Mangabar Injil ka Ramin Kornelius ³⁴ Lalu, Petrus nika baba'a ge' nyansana, "Mati', iko' batol-batol ngarati bahwa Jabata kati' mambeda-beda asipun. ³⁵ Malahan, ka satiap bangse, sok da buut ka Ini' ge' da umas jai da taman, bakenan ka Ini'. ³⁶ Firman da Jabata nyampe ka bangse Israel mangkatn kabar bait damai sejahtera nabo Kristus Yesus, Ini' ta Tuhan samo samaan'a. ³⁷ Imu' sadi' pane paristiwa da laka tajadi ka saluruh Yudea, mule umpatn Galilea, ngalaka baptisan da Yohanes ngabar, ³⁸ Imu' pane Yesus Sok Nazaret, langkina Jabata mangkabhinyak'A nige' Roh Kudus ge' nige' kuasa. Ini' anu bakaliling umas da bait ge' nyambuh samaan sok da gatn nindas kat roh jahat karna Jabata samahu Ini'. ³⁹ Kai anita saksi-saksi umpatn samaan hal da laka Yesus umas, bait ka daerah sok Yahudi atopun ka Yerusalem. Ayo'a ngalaka ngamis Yesus nige' manggangung-A ka samo kayu salib. ⁴⁰ Tapi, Jabata ngangkidup-A ano ka taru ge' mamparkenan Ini' ya' nampil adup'a, ⁴¹ Inya ka samaan sok, tapi ka kai, saksi-saksi da gatn Jabata milih sabalum'a, da uman ge' nyucur samahu-A sak laka Ini' umpat umpatn antara sok kabis. ⁴² Ge', Ini' ngadu kai ya' ngabar ka ayo sok ge' nyaksi nige' batol-batol bahwa Ini'talah da gatn Jabata natap sabage Hakim samo da idup ge' da kabis. ⁴³ Bagi Ini', samaan nabi nyaksi bahwa asipun sok da pacaya ka sadatn-A ao' nyamut pangampunan duse nabo gaatn-A." Jabata Mangkatn bukti bahwa Ini' Nyamut Samaan Sok ⁴⁴ Samantara Petrus agi' muji' saratn-saratn dakoh, Roh Kudus disah ka samo samaan da dangah firman dakoh. ⁴⁵ Ge, ayo sok pacaya da baturih, da utukng samahu Petrus, heran karna karunia Roh Kudus laka gatn nuntukng, uga ka bangse-bangse laitn. ⁴⁶ Sabab, ayoa'a da dangah ayo sok dakoh nyansana sadatn bamacam saratn ge' ngamulia Jabata. Lalu Petrus muji', ⁴⁷ "Inyata kati' ani nyungan pun da kaatn manghalang paitn ya' ngabaptis ka ayo sok da laka nyamut Roh Kudus samu ulah ite' diah?" ⁴⁸ Maka, Petrus ngadu ayo'a ya' gatn baptis ka sadatn gaatn Kristus Yesus. Lakadakoh, ayo sok dakoh mahi sak Petrus madi samahu ayo'a salama mani ano.