¹ Samantara dakoh, ayo rasul ge' ayo-age saiman da ani wak Yudea dangah kalo ayo-sok inya Yahudi uga ngalaka narima firman Jabata. ² Barang dakoh, sa' maka' ka Yerusalem, ayo-sok da baturih basalisih paham pandapat nige ini', ³ nige nyansana, "Imu' anu ka ayo-sok kati baturih ge' uman samahu ayo'a." ⁴ Tapi aok'a, Petrus mule manjelas'a sacara baurut ka ayo'a, wat'n nak, ⁵ "Iko' sadakng badoa wak kota Yope, ge' ka sadat'n kaadaan da kati sadar, iko' mile nyabuah pangalihatan, tarut'n ulah nyalembar saput labar disah, da tarulur nige kaampat sudut'a umpat'n rangit, ge' benda dakoh ngariketko'. ⁶ Ngalaka iko' manatap'a, iko' mamprati'a ge' mile binatang-binatang bakaja ampat wak bumi, binatang-bintang liar, binatang-binatang malata, ge' manuk-manuk wak udara. ⁷ iko' uga dangah ani sarat'n nyansana ka'iko', 'Umpat, Petrus, nyambaleh ge' umanlah!' ⁸ Sa', iko' nyansana, 'Kati, Tuhan. Barang, kati ani da haram ato najis parnah maruh ka sadat'n babako'.' ⁹ Tapi aok'a, sarat'n dakoh naham ya' kadua kali'a umpat'n rangit, 'Jai da laka Jabata tahirkan, iya' nyakali-kali imu' nyebut haram!' ¹⁰ Hal diah tarjadi taru kali, lalu samaan'a dakoh gat'n narik kambali ka rangit. ¹¹ Ilelah, saat dakoh uga, ani taru sok da gat'n utus ka'iko' utukng ka ramin tampat iko' madi, umpat'n Kaisarea. ¹² Laka dakoh, Roh muji' ka'iko' ya' anu samahu ayo'a nige kati ragu-ragu. Kaanam age saiman diah uga anu samahuko' ge' kai' maruh ka ramin sok dakoh. ¹³ Lalu, ini' nyampe'a ka kai' langkina ini' laka mile malaikat agut'n wak ramin'a ge' muji', 'Ngadulah sok ka Yope ge' mahilah Simon da gat'n nyebut Petrus utukng ka diah, ¹⁴ ge' ini' aok muji' pusut'n ka'imu' aok gat'n nyalamat, imu' ge' samaan sok da madi wak raminmu'.' ¹⁵ Samantara iko' mule nyansana-sana, Roh Kudus disah ka samo ulah da pas awal'a tarjadi ka samo ite. ¹⁶ Maka, iko' taringat pas Tuhan nyansana, waktu Ini' nyansana, 'Yohanes mambaptis nige pait'n, tapi imu' aok gat'n baptis nige Roh Kudus.' ¹⁷ Jadi, sa' Jabata mangkat'n karunia da samu ka ayo'a ulah da Ini' mangkat'n uga ka ite' ngalaka pacaya wak sadat'n Tuhan Yesus Kristus, asi'ta iko' sahingga iko' kaat'n manghalangi Jabata?" ¹⁸ Pas ayo'a dangah hal-hal dakoh, ayo'a jadi tanang ge' mamuji Jabata nige muji', "Kalo ladakoh, Jabata uga laka mangaruniakan ka ayo-sok inya Yahudi partobatan da manuju ka idup." Injil Sampe Ka Antiokhia ¹⁹ Laka dakoh, ayo-sok da bacarae-bare barang panganiayaan da tarjadi tradap Stefanus, manyabar sampe ka Fenisia, siprus, ge' Antiokhia, nige kati nyarita firman Tuhan ka asipun kacuali ka ayo-sok Yahudi. ²⁰ Sa', ani mani ungan sok umpat'n ayo'a diu'ta ayo-sok Siprus ge' Kirene, da utukng ka Antiokhia ge' uga nyansana ka iko' ayo-sok Helenis, sambil nyarita tentang Tuhan Yesus. ²¹ Barekng Tuhan manyertai ayo'a, sajumlah karah sok da jadi pacaya malik ka Tuhan. ²² Barita tentang ayo'a sampe ka rajak jamaat wak Yerusalem, ge' ayo'a mangutus Barnabas Ka antiokhia. ²³ Pas Barnabas utukng ge' mile kasih karunia Jabata, ini' basukacita ge' manasehati ayo'a samaan ya' tatap satia ka Tuhan nige ate da teguh. ²⁴ Barang Barnabas ani'ta sok da bait, pahnu nige Roh Kudus ge' iman, sajumlah aihyo sok gat'n minsakng ka Tuhan . ²⁵ Laka dakoh, Barnabas anu ka Tarsus ya' najo Saulus. ²⁶ Ge', ngalaka ini' amput'a ini' minsakng'a ka Antiokhia. Ge', wak Antiokhia, murid-murid ya pamule kali'a gat'n nyebut "sok Kristen". ²⁷ Pas ano dakoh, mani ungan nabi disah umpat'n Yerusalem utukng ka Antiokhia. ²⁸ Sara' nyungan umpat'n ayo'a ba'gaat'n Agabus, agut'n ge' maramal nige batulokng Roh minsakng aok tarjadi saburuk da hebat wak saluruh dunia. Ge', saburuk dakoh tarjadi wak masa pamrintahan Klaudius. ²⁹ Maka, ayo murid mamutuskan ya' ngirim sumbangan, sasuei nige kamampuan ayo'a masing-masing, ka ayo-age saiman da madi wak Yudea. ³⁰ Ge', da uga ayo'a bulah ngirim sumbangan dakoh ka ayo pangama nabo barekng Barnabas ge' Saulus.